ദോഹ മെട്രോ റെഡ് ലൈനിലും ലുസൈല് ട്രാമിലും നാളെ ബദല് സര്വീസുകള്
അമാനുല്ല വടക്കാങ്ങര
ദോഹ. ദോഹ മെട്രോ റെഡ് ലൈനിലും ലുസൈല് ട്രാമിലും നാളെ ബദല് സര്വീസുകളായിരിക്കുമെന്ന് ഖത്തര് റെയില് അറിയിച്ചു.അല് വക്രയ്ക്കും ലുസൈല് ക്യുഎന്ബിക്കും ഇടയില് ഓരോ 5 മിനിറ്റിലും ബസുകള് സര്വീസ് നടത്തും. ഹമദ് ഇന്റര്നാഷണല് എയര്പോര്ട്ടിനും ഫ്രീ സോണിനും ഇടയില് ബസുകള് ഓരോ 15 മിനിറ്റിലുമാണ് സര്വീസ് നടത്തുക.
കത്താറ, റാസ് ബു ഫോണ്ടാസ് മെട്രോ സ്റ്റേഷനുകളില് ഈ ബസുകള് നിര്ത്തില്ലെന്ന് ദോഹ മെട്രോ വ്യക്തമാക്കി. മെട്രോ സ്റ്റേഷന് ഷെല്ട്ടര് 1 ന് സമീപമുള്ള അല് വക്ര ബസ് സ്റ്റേഷനില് നിന്നാണ് ഈ സര്വീസ് പ്രവര്ത്തിക്കുകയെന്നും അവര് കൂട്ടിച്ചേര്ത്തു. എം 126 ഒഴികെയുള്ള എല്ലാ മെട്രോലിങ്കും മെട്രോ എക്സ്പ്രസ്സും സാധാരണ പോലെ പ്രവര്ത്തിക്കും. എം 126, ഓരോ 20 മിനിറ്റിലും റാസ് ബു ഫെണ്ടാസിന് പകരം ഫ്രീ സോണ് ഷെല്ട്ടര് 2 ല് നിന്നാണ് സര്വീസ് നടത്തുക.
ലുസൈല് ഏരിയയില് യാത്ര ചെയ്യാന്, മെട്രോ എക്സ്പ്രസ് ബുക്കിംഗ് നാളെ മുതല് / ലെഗ്തൈഫിയ മെട്രോ സ്റ്റേഷന് വരെ മാത്രമേ ലഭ്യമാകൂ. ഖത്തര് യൂണിവേഴ്സിറ്റി മെട്രോ സ്റ്റേഷനും (എന്ട്രന്സ് 1) ലുസൈല് മറീനയ്ക്കും ഫോക്സ് ഹില്സ് സൗത്തിനും ഇടയിലാണ് മെട്രോലിങ്ക് എം 147 പ്രവര്ത്തിക്കുക.