നിലവില് രാജ്യത്ത് സുരക്ഷ ഭീഷണിയില്ല
ദോഹ: ഖത്തറിലെ ചില സ്ഥലങ്ങള് സന്ദര്ശിക്കുന്നത് ഒഴിവാക്കുകയോ മുന്കരുതലുകള് എടുക്കുകയോ ചെയ്യണമെന്ന് നിരവധി എംബസികള് അവരുടെ പൗരന്മാര്ക്ക് നല്കിയ ഉപദേശം, ലോകമെമ്പാടുമുള്ള അവരുടെ പൗരന്മാര്ക്കുള്ള യാത്രാ മാര്ഗ്ഗനിര്ദ്ദേശങ്ങളും സുരക്ഷാ അപ്ഡേറ്റുകളും സംബന്ധിച്ച് വിവിധ രാജ്യങ്ങള് പിന്തുടരുന്ന പൊതു നയങ്ങളുടെ ഭാഗമാണെന്നും, പ്രത്യേക ഭീഷണികളുടെ സാന്നിധ്യം അവ പ്രതിഫലിപ്പിക്കുന്നില്ലെന്നും പ്രധാനമന്ത്രിയുടെ ഉപദേഷ്ടാവും വിദേശകാര്യ മന്ത്രാലയത്തിന്റെ ഔദ്യോഗിക വക്താവുമായ ഡോ. മാജിദ് ബിന് മുഹമ്മദ് അല്-അന്സാരി സൂചിപ്പിച്ചു.
രാജ്യത്തെ സുരക്ഷാ സ്ഥിതി സുസ്ഥിരമാണെന്നും, രാജ്യത്തെ അധികാരികള് സ്ഥിതിഗതികള് സൂക്ഷ്മമായി നിരീക്ഷിക്കുന്നുണ്ടെന്നും പൗരന്മാരുടെയും താമസക്കാരുടെയും സന്ദര്ശകരുടെയും സുരക്ഷ ഉറപ്പാക്കാന് ആവശ്യമായ എല്ലാ നടപടികളും സ്വീകരിക്കാന് തയ്യാറാണെന്നും ഡോ. അല്-അന്സാരി ഖത്തര് വാര്ത്താ ഏജന്സിക്ക് നല്കിയ പ്രസ്താവനയില് ഊന്നിപ്പറഞ്ഞു.
‘അറിയിപ്പോ നടപടിയോ ആവശ്യമായി വരുന്ന ഏതൊരു സംഭവവികാസങ്ങളെക്കുറിച്ചും പൊതുജനങ്ങളെ അറിയിക്കും, ഔദ്യോഗിക സ്രോതസ്സുകളില് നിന്ന് മാത്രമേ വിവരങ്ങള് സ്വീകരിക്കാവൂവെന്ന് അദ്ദേഹം ഊന്നിപ്പറഞ്ഞു.
