ഒക്ടോബര് 2 മുതല് 90 പുതിയ ഇലക്ട്രിക് ബസുകള് സര്വീസ് നടത്തുമെന്ന് മെട്രോലിങ്ക്
അമാനുല്ല വടക്കാങ്ങര
ദോഹ. ഒക്ടോബര് 2 മുതല് 90 പുതിയ ഇലക്ട്രിക് ബസുകള് സര്വീസ് നടത്തുമെന്ന് മെട്രോലിങ്ക് അറിയിച്ചു. കഴിഞ്ഞ ദിവസം അല് സദ്ദ് മെട്രോ സ്റ്റേഷനില് നടന്ന ലോഞ്ച് ചടങ്ങിനിടെയായിരുന്നു പ്രഖ്യാപനം.
ചടങ്ങില് മൊവാസലാത്ത് (കര്വ) സിഎഒ അഹമ്മദ് അബ്ദുല്റഹ്മാന് അല് മുഫ്ത, മൊവാസലാത്ത് സിഒഒ അഹ്മദ് ഹസന് അല് ഒബൈദ്ലി, ഖത്തര് റെയിലിന്റെ ചീഫ് ഓഫ് സര്വീസ് ഡെലിവറി എന്ജിനീയര് അബ്ദുല്ല സെയ്ഫ് അല് സുലൈത്തി, തുടങ്ങി നിരവധി പ്രമുഖര് പങ്കെടുത്തു.
മൊവാസലാത്തിന്റെ മൂല്യങ്ങള്ക്കും ഹരിത റോഡ് ഗതാഗത സംവിധാനത്തിലേക്കുള്ള ഖത്തറിന്റെ ദൗത്യത്തിനും അനുസൃതമായി, പുതിയ ഇലക്ട്രിക് ബസുകള് പൂര്ണ്ണമായും സീറോ എമിഷന് മാത്രമല്ല ശബ്ദരഹിതവുമായിരിക്കും.
ദോഹയിലെ പരിസ്ഥിതിക്കനുയോജ്യമായി പൂര്ണ്ണമായും കസ്റ്റമൈസ് ചെയ്തിരിക്കുന്ന ഈ ഫ്ളീറ്റില് യഥാക്രമം 163, 211 കിലോവാട്ട്സ് ബാറ്ററി ശേഷിയുള്ള 60 മിനി ബസുകളും 30 ഇടത്തരം ബസുകളും ഉള്പ്പെടുന്നു.
ഡ്രൈവര്മാരുടെയും യാത്രക്കാരുടെയും സുരക്ഷയെ മുന്നിര്ത്തി, ഡ്രൈവര്മാര്ക്ക് വാഹനത്തിന്റെ ചുറ്റുപാടുകളുടെ പൂര്ണ്ണമായ കാഴ്ച ലഭിക്കുന്നുണ്ടെന്ന് ഉറപ്പാക്കാന് മുഴുവന് ഫ്ളീറ്റിലും 360-ഡിഗ്രി ക്യാമറകളും സെന്സറുകളും സജ്ജീകരിച്ചിരിക്കുന്നു. ബാറ്ററികള് കൂടുതല് നേരം നിലനില്ക്കാന് ഇന്ബില്റ്റ് ഇന്റലിജന്റ് എനര്ജി കണ്ട്രോള് സിസ്റ്റവും ബസുകളുടെ ഇന്റീരിയര് മാറ്റാവുന്ന എല്ഇഡി ലൈറ്റിംഗും കൊണ്ട് സജ്ജീകരിച്ചിരിക്കുന്നു. പ്രത്യേക ആവശ്യങ്ങളുള്ള യാത്രക്കാര്ക്കും ബസുകളില് എളുപ്പത്തില് എത്തിച്ചേരാനാകും.
ഓരോ ബസിലും പ്രത്യേകമായ അലാറം സജ്ജീകരിച്ചിരിക്കുന്നു. ഒരു കാല്നടയാത്രക്കാരന് തെരുവ് മുറിച്ചുകടക്കുമ്പോഴും ലെയിന് പുറപ്പെടുമ്പോഴും ബസ്സ് വേഗത പരിധി കടക്കുമ്പോഴും ഡ്രൈവര്ക്ക് മുന്നറിയിപ്പ് നല്കുന്നു. ഇത് പുതിയ ഫ്ളീറ്റിനെ റെസിഡന്ഷ്യല് ഏരിയകള്ക്ക് പൂര്ണ്ണമായും അനുയോജ്യമാക്കുന്നു.
90 ഇലക്ട്രിക് മെട്രോലിങ്ക് ബസുകളുടെ ഈ പുതിയ ഫ്ളീറ്റ് ഒക്ടോബര് 2 മുതല് ഖത്തറിലെ റോഡുകളില് ഓടിത്തുടങ്ങും. തടസ്സങ്ങളില്ലാത്ത യാത്രാനുഭവം ഉറപ്പാക്കാന്, മൊവാസലാത്ത് (കര്വ) ഈയിടെ ആരംഭിച്ച സമഗ്രമായ ഒരു പരീക്ഷണ പ്രക്രിയ നടപ്പിലാക്കി, അടുത്ത 10 ദിവസത്തേക്ക് 19 റൂട്ടുകളില് ഈ ബസ്സുകള് ഓടും. ഈ മുഴുവന് ടെസ്റ്റിംഗ് പ്രക്രിയയും ഫ്ളീറ്റിന്റെ മൈലേജ് പ്രകടനവും ഊര്ജ്ജ ഉപഭോഗവും പരിശോധിക്കും.
