ഫിഫ ലോകകപ്പ് ഖത്തര്‍ 2022 സെക്യൂരിറ്റി ലാസ്റ്റ് മൈല്‍ കോണ്‍ഫറന്‍സ് ഇന്നും നാളെയും ദോഹയില്‍
അമാനുല്ല വടക്കാങ്ങര
ദോഹ: ഫിഫ ലോകകപ്പ് ഖത്തര്‍ 2022 സെക്യൂരിറ്റി ലാസ്റ്റ്-മൈല്‍ കോണ്‍ഫറന്‍സ് ഇന്നും നാളെയുമായി ദോഹയില്‍ നടക്കും. ഫിഫ 2022 ഖത്തര്‍ ലോക കപ്പിനുള്ള ഖത്തറിന്റെ സുരക്ഷാ സന്നദ്ധത വിശകലനം ചെയ്യുകയും മികച്ച ലോക കപ്പ് അനുഭവം സമ്മാനിക്കാനാശ്യമായ അവസാന വട്ട സുരക്ഷ തയ്യാറെടുപ്പുകളും വിവിധ വകുപ്പുകളുടെ ഏകോപനവും സഹകരണവും ഉറപ്പാക്കുകയുമാണ് സമ്മേളനത്തിന്റെ ലക്ഷ്യമെന്ന് ഫിഫ ലോകകപ്പ് ഖത്തര്‍ 2022 ന്റെ സുരക്ഷാ സമിതിയുടെ സുരക്ഷ ആന്റ്് സുരക്ഷ ഓപ്പറേഷന്‍സ് കമ്മിറ്റി വാര്‍ത്താസമ്മേളനത്തില്‍ അറിയിച്ചു.
ലോക കപ്പ് യോഗ്യത നേടിയ രാജ്യങ്ങളെ പ്രതിനിധീകരിക്കുന്ന പ്രതിനിധികള്‍, ഐക്യരാഷ്ട്രസഭ, ഫിഫ, സുപ്രീം കമ്മറ്റി ഫോര്‍ ഡെലിവറി ആന്റ് ലെഗസി, അന്താരാഷ്ട്ര, പ്രാദേശിക സ്ഥാപനങ്ങളില്‍ നിന്നുള്ള പ്രതിനിധികള്‍, മറ്റ് പ്രസക്തമായ പങ്കാളികളുടെ പ്രതിനിധികള്‍ എന്നിവരുള്‍പ്പെടെ നിരവധി വ്യക്തികള്‍ സമ്മേളനത്തില്‍ പങ്കെടുക്കും. ടൂര്‍ണമെന്റ് അവലോകനം, സുരക്ഷാ അപകടസാധ്യത വിലയിരുത്തല്‍, സുരക്ഷാ ആസൂത്രണം, ടൂര്‍ണമെന്റ് സൗകര്യങ്ങളിലെ സുരക്ഷാ നടപടിക്രമങ്ങള്‍, സൈബര്‍ സുരക്ഷാ ആവശ്യകതകള്‍, അന്താരാഷ്ട്ര പങ്കാളികളുമായുള്ള ആശയവിനിമയവും സഹകരണവും എന്നിവ സമ്മേളനം ചര്‍ച്ച ചെയ്യും.
2022 ലോകകപ്പില്‍ എല്ലാ കാണികള്‍ക്കും ഏറ്റവും ഉയര്‍ന്ന സുരക്ഷയും സ്ഥിരതയും ഉറപ്പാക്കുന്നതിനായി, ദോഹയില്‍ ഇന്റര്‍നാഷണല്‍ പോലീസ് കോ-ഓപ്പറേഷന്‍ സെന്റര്‍ സ്ഥാപിച്ചിട്ടുണ്ട്. ഇത് കമ്മിറ്റി നിയന്ത്രിക്കുകയും മേല്‍നോട്ടം വഹിക്കുകയും ചെയ്യുന്ന ഒരു ഓപ്പറേഷന്‍ റൂമാണ്, കൂടാതെ കേന്ദ്രത്തിന് അതിന്റെ പങ്ക് നിര്‍വഹിക്കുന്നതിനും ലക്ഷ്യങ്ങള്‍ കൈവരിക്കുന്നതിനും ഏറ്റവും പുതിയ നൂതന സാങ്കേതിക മാര്‍ഗങ്ങളും ആവശ്യമായ അടിസ്ഥാന സൗകര്യങ്ങളും ഇതിന് നല്‍കിയിട്ടുണ്ട്. മികച്ച നൈപുണ്യമുള്ള യുവ ഉദ്യോഗസ്ഥരുടെ സംഘത്തെയും കേന്ദ്രത്തില്‍ വിന്യസിച്ചിട്ടുണ്ട്.
2022ലെ ഫിഫ ലോകകപ്പ് ഖത്തറിനായുള്ള സേഫ്റ്റി ആന്‍ഡ് സെക്യൂരിറ്റി ഓപ്പറേഷന്‍സ് കമ്മിറ്റി മേധാവി മേജര്‍ ജനറല്‍ എഞ്ചിനിയര്‍ അബ്ദുള്‍ അസീസ് അബ്ദുല്ല അല്‍-അന്‍സാരി, കമ്മിറ്റിയുടെ ലീഗല്‍ അഫയേഴ്സ് ആന്റ് കമ്മ്യൂണിക്കേഷന്‍ യൂണിറ്റ് തലവന്‍ ബ്രിഗ് ഇബ്രാഹിം ഖലീല്‍ അല്‍ മുഹന്നദി, മീഡിയ യൂണിറ്റ് മേധാവി ബ്രിഗേഡിയര്‍േ അബ്ദുല്ല ഖലീഫ അല്‍ -മുഫ്ത എന്നിവര്‍ വാര്‍ത്താസമ്മേളനത്തില്‍ പങ്കെടുത്തു.
