ടൈം മാഗസിന്റെ 2022 ലെ ലോകത്തിലെ ഏറ്റവും മികച്ച സ്ഥലങ്ങളില്‍ സ്ഥാനം പിടിച്ച് ദോഹയും
അമാനുല്ല വടക്കാങ്ങര
ദോഹ. ടൈം മാഗസിന്റെ 2022 ലെ ലോകത്തിലെ ഏറ്റവും മികച്ച സ്ഥലങ്ങളില്‍ ഒന്നായി ദോഹയും .
ലോകമെമ്പാടുമുള്ള 50 സ്ഥലങ്ങള്‍ ഉള്‍ക്കൊള്ളുന്ന പട്ടികയിലാണ് ദോഹ സ്ഥലം പിടിച്ചത്. മധ്യ പൗരസ്ത്യ ദേശത്ത് ആദ്യമായി നടക്കാനിരിക്കുന്ന ഫിഫ 2022 ലോക കപ്പ് ഫുട്‌ബോള്‍ ടൂര്‍ണമെന്റിനായി രാജ്യം ഒരുങ്ങുന്നതിനിടെയാണ് ദോഹ ഈ സ്ഥാനം സ്വന്തമാക്കിയത്.
ലോകമെമ്പാടുമുള്ള ഫുട്‌ബോള്‍ ആരാധകരെ സ്വാഗതം ചെയ്യാനുള്ള ഖത്തറിന്റെ ഹോസ്പിറ്റാലിറ്റി ഒരുക്കങ്ങള്‍ ഈ വര്‍ഷാവസാനം ആരംഭിക്കാനിരിക്കുന്ന എണ്ണമറ്റ ഹോട്ടലുകളും താമസ സൗകര്യങ്ങളും കൂടാതെ ദോഹയിലേക്ക് തടസ്സമില്ലാത്ത യാത്ര വാഗ്ദാനം ചെയ്യുമെന്ന് പ്രതീക്ഷിക്കുന്ന നാല് ജിസിസി എയര്‍ലൈനുകളുടെ പങ്കാളിത്തത്തോടെ ഷട്ടില്‍ ഫ്ൈളറ്റുകളും മാഗസിന്‍ എടുത്തുകാണിച്ചു.
സ്പോര്‍ട്സിന് മാത്രമായി സമര്‍പ്പിച്ചിരിക്കുന്ന മേഖലയിലെ ആദ്യത്തെ മ്യൂസിയമായ 3-2-1 ഖത്തര്‍ ഒളിമ്പിക്, സ്പോര്‍ട്സ് മ്യൂസിയങ്ങള്‍, ഫിഫ ലോകകപ്പിന് മുന്നോടിയായി വീണ്ടും തുറക്കാന്‍ പ്രതീക്ഷിക്കുന്ന പ്രശസ്തമായ ലാന്‍ഡ്മാര്‍ക്ക് മ്യൂസിയം ഓഫ് ഇസ്ലാമിക് ആര്‍ട്ട് എന്നിവയും മാഗസിന്‍ പരാമര്‍ശിച്ചു.
‘2022-ലെ ലോകത്തിലെ ഏറ്റവും മികച്ച സ്ഥലങ്ങള്‍’ എന്ന 50 സ്ഥലങ്ങളുടെ പട്ടികയില്‍ ഗള്‍ഫ് മേഖലയില്‍ നിന്ന് തിരഞ്ഞെടുക്കപ്പെട്ട രണ്ട് സ്ഥലങ്ങള്‍ ദോഹയും യുഎഇയിലെ റാസല്‍ഖൈമയും മാത്രമാണ് .
