ലോകത്തിലെ ഏറ്റവും നീളം കൂടിയ എയര്കണ്ടീഷന് ചെയ്ത തുറന്ന കാല്നടപാതയും ജോഗിംഗ് ട്രാക്കും സ്വന്തമാക്കി ഖത്തര്
അമാനുല്ല വടക്കാങ്ങര
ദോഹ. ലോകത്തിലെ ഏറ്റവും നീളം കൂടിയ എയര്കണ്ടീഷന് ചെയ്ത തുറന്ന കാല്നടപാതയും ജോഗിംഗ് ട്രാക്കും സ്വന്തമാക്കി ഖത്തര് . ലോകത്തിലെ ഏറ്റവും നീളം കൂടിയ എയര്കണ്ടീഷന് ചെയ്ത കാല്നടയാത്രക്കാരുടെയും ഓപ്പണ് പാര്ക്കിലെ ജോഗിംഗ് പാതയുടെയും ആസ്ഥാനമായി ദോഹ ഖത്തറിനെ ഔദ്യോഗികമായി പ്രഖ്യാപിച്ചു. 1,143 മീറ്റര് പാത ഉമ്മുല് സെനീം പാര്ക്കിലാണ്, ഗിന്നസ് വേള്ഡ് റെക്കോര്ഡ് നേടുന്നതിനുള്ള ഖത്തറിലെ പൊതുമരാമത്ത് അതോറിറ്റിയുടെ അഞ്ചാമത്തെ പദ്ധതിയാണിത്.
ഖത്തറിലെ റോഡുകളും പൊതുസ്ഥലങ്ങളും മനോഹരമാക്കുന്നതിനുള്ള അഷ്ഗാലിന്റെ സൂപ്പര്വൈസറി കമ്മിറ്റി സംഘടിപ്പിച്ച വൃക്ഷത്തൈ നടല് പരിപാടിയില് ഗിന്നസ് വേള്ഡ് റെക്കോര്ഡ്സ് ഒഫീഷ്യല് അഡ്ജുഡിക്കേറ്റര് പ്രവീണ് പട്ടേലാണ് ഇക്കാര്യം അറിയിച്ചത്.
‘ഉന്നത നിലവാരത്തിലും അന്തര്ദേശീയ മാനദണ്ഡങ്ങള് പാലിച്ചും നഗരങ്ങളുടെ മാനുഷികവല്ക്കരണത്തിനും സൗന്ദര്യവല്ക്കരണത്തിനുമുള്ള തന്ത്രപരമായ പദ്ധതി ഈ പാര്ക്ക് കൈവരിക്കുന്നതിനാല് ഈ തലക്കെട്ടില് ഞങ്ങള് അഭിമാനിക്കുന്നു. എയര്കണ്ടീഷന് ചെയ്ത പാതകളുള്ള സെന്ട്രല് പാര്ക്കുകള് എല്ലാ സീസണുകളിലും ആരോഗ്യകരമായ ജീവിതശൈലി പ്രോത്സാഹിപ്പിക്കുന്നതിനാണ് ലക്ഷ്യമിടുന്നതെന്ന് അഷ്ഗാല് പ്രസിഡന്റ് സഅദ് അഹമ്മദ് ഇബ്രാഹിം അല് മുഹന്നദി അഭിപ്രായപ്പെട്ടു.
ഉമ്മുല് സെനീം പാര്ക്കില് 88,400 ചതുരശ്ര മീറ്റര് ഹരിത ഇടങ്ങള്, 912 മരങ്ങള്, 1,135 മീറ്റര് സൈക്ലിംഗ് പാത, 1,143 മീറ്റര് കാല്നട, ജോഗിംഗ് പാത, ഫിറ്റ്നസ് ഉപകരണങ്ങളുള്ള മൂന്ന് വ്യായാമ മേഖലകള്, രണ്ട് കളിസ്ഥലങ്ങള്, 40 സൈക്കിള് സ്റ്റാന്ഡുകള് എന്നിവയാണുള്ളത്.
തുറന്ന പാര്ക്കില് ഏറ്റവും ദൈര്ഘ്യമേറിയ കാല്നടപാതക്കും ജോഗിംഗ് ട്രാക്കിനും എയര് കണ്ടീഷനിംഗ് സംവിധാനം നടപ്പിലാക്കാന് കഴിഞ്ഞ വര്ക്ക് ടീമിനുള്ള പ്രതിഫലമാണ് ഗിന്നസ് വേള്ഡ് റിക്കാര്ഡെന്ന് അഷ്ഗാലിലെ പ്രോജക്ട് അഫയേഴ്സ് ഡയറക്ടര് യൂസഫ് അല്-ഇമാദി പറഞ്ഞു.കമ്മിറ്റിയുടെ രണ്ടാമത്തെ സെന്ട്രല് എയര്കണ്ടീഷന് ചെയ്ത പാര്ക്കാണ് ഉമ്മുല് സെനീം പാര്ക്ക്.
സോളാര് പാനലുകള് ഉപയോഗിച്ചാണ് എയര്കണ്ടീഷണറുകള് പ്രവര്ത്തിപ്പിക്കുന്നതെന്നതിനാല് പരിസ്ഥിതി സൗഹൃദമായ പദ്ധതിയെന്ന നിലക്കും ശ്രദ്ധേയമാണിത്.
