ഫോര് മൈ ലൗ സീസണ് അഞ്ചിന്റെ ഭാഗമായി 14 പ്രവാസികളുടെ പങ്കാളികള് ദോഹയില്
അമാനുല്ല വടക്കാങ്ങര
ദോഹ. ഖത്തറിലെ പ്രമുഖ മലയാളം റേഡിയോ റേഡിയോ മലയാളം 98.6 എഫ് എമ്മിന്റെ ഏറ്റവും ജനകീയമായ സാമൂഹ്യ പ്രതിബദ്ധത പദ്ധതിയായ ഫോര് മൈ ലൗ സീസണ് അഞ്ചിന്റെ ഭാഗമായി 14 പ്രവാസികളുടെ പങ്കാളികള് ദോഹയിലെത്തി.
അവര്ക്ക് ഇന്ത്യന് കമ്മ്യൂണിറ്റി ഫെബ്രുവരി 19-ന് ദോഹയിലെ ഹോളിഡേ ഇന് ഹോട്ടലില് സംഘടിപ്പിച്ച സ്വീകരണ ചടങ്ങില് ഹൃദയപൂര്വ്വം വരവേല്പ്പ് നല്കി.
30 വര്ഷത്തിലധികമായി സ്വന്തം കുടുംബ പങ്കാളിയില് നിന്നും അകന്നുനിന്നു ഖത്തറില് ജോലി ജോലി ചെയ്യുന്ന 14 പ്രവാസികളുടെ പങ്കാളികള്ക്കാണ് റേഡിയോ മലയാളം 98.6 എഫ്എം എല്ലാ ചെലവുകളും വഹിച്ച് ഖത്തര് സന്ദര്ശിക്കാന് അവസരം ഒരുക്കിയത്.
ഫോര് മൈ ലൗ എന്ന പേരില് 2018-ലാണ് ഈ സാമൂഹിക ഉത്തരവാദിത്വ പദ്ധതിക്ക് തുടക്കം കുറിച്ചത്. മുന് വര്ഷങ്ങളില് (2018, 2019, 2023, 2024) 10, 11, 12, 13 ദമ്പതികള്ക്ക് ഈ പദ്ധതിയിലൂടെ ഖത്തറിലെത്താനുള്ള അവസരം ലഭിച്ചിരുന്നു.
ദീര്ഘകാലം ഖത്തറില് ജീവിച്ചിട്ടും കുടുംബസമേതം കഴിയാനുള്ള അവസരം ലഭിക്കാത്ത 14 പ്രവാസികളാണ് തെരഞ്ഞെടുക്കപ്പെട്ടത്. റേഡിയോ മലയാളം 98.6 എഫ്എമ്മിന്റെ പ്രേക്ഷകരുടെ നാമനിര്ദ്ദേശത്തിലാണ് ഈ തെരഞ്ഞെടുപ്പ് നടന്നത്.
ദമ്പതികള്ക്ക് ഫെബ്രുവരി 23 വരെ നീണ്ടുനില്ക്കുന്ന ഖത്തര് പര്യടനത്തിന്റെ ഭാഗമാകാം. റേഡിയോ മലയാളത്തിന്റെ ഒരു ആര്ജെ കേരളത്തില് നിന്ന് ഖത്തറിലേക്കും തിരിച്ചും ഇവരെ അനുഗമിക്കുന്നുണ്ട്.
സാംസ്കാരിക പരിപാടികള്, പ്രവാസി സംഗമങ്ങള്, മറ്റ് കമ്മ്യൂണിറ്റി ഇവന്റുകള്, സ്വീകരണങ്ങള് എന്നിവ ഈ യാത്രയുടെ ഭാഗമായിരിക്കും.
കമ്മ്യൂണിറ്റി, മാധ്യമങ്ങള്, വ്യാപാര സ്ഥാപനങ്ങള് എന്നിവയുടെ പിന്തുണയോടെ സംഘടിപ്പിച്ചിരിക്കുന്ന ഈ സംരംഭം ഇതിനകം ഏറെ പ്രശംസ നേടി കഴിഞ്ഞു.
സ്വീകരണ ചടങ്ങില് കമ്മ്യൂണിറ്റി നേതാക്കളും, മാധ്യമ പ്രവര്ത്തകരും, വ്യവസായ പ്രമുഖരും, മറ്റു വിശിഷ്ടാതിഥികളും പങ്കെടുത്തു.