കണിശമായ കോവിഡ് നിയന്ത്രണങ്ങള്‍ക്കനസരിച്ച് വിവാഹങ്ങളും ഈവന്റുകളും ആസൂത്രണം ചെയ്യണം, ഈവന്റ് മാനേജ്മെന്റ് സ്ഥാപനങ്ങള്‍ക്ക് നിര്‍ദേശങ്ങളുമായി വാണിജ്യ വ്യവസായ മന്ത്രാലയം
ഡോ. അമാനുല്ല വടക്കാങ്ങര
ദോഹ: പൗരന്മാരുടെയും താമസക്കാരുടെയും സുരക്ഷയും ആരോഗ്യവും സംരക്ഷിക്കുന്നതിനും കൊറോണ വൈറസ് (കോവിഡ് -19) വ്യാപനം പരിമിതപ്പെടുത്തുന്നതിനും ഖത്തര്‍ സ്വീകരിച്ച മുന്‍ തീരുമാനങ്ങള്‍ക്കും നടപടികള്‍ക്കും അനുസൃതമായി, കരാറുകാര്‍ക്കും ഇവന്റ് പ്ലാനര്‍മാര്‍ക്കും കണിശമായ നിയന്ത്രണങ്ങള്‍ വാണിജ്യ വ്യവസായ മന്ത്രാലയം നിര്‍ദേശിക്കുന്നു.
വാണിജ്യ, വ്യവസായ മന്ത്രാലയം, പൊതുജനാരോഗ്യ മന്ത്രാലയം, ആഭ്യന്തര മന്ത്രാലയം എന്നിവ നിശ്ചയിച്ചിട്ടുള്ള മുന്‍കരുതല്‍, പ്രതിരോധ നടപടികള്‍ വിവാഹങ്ങളും ഇവന്റ് സംഘാടകരും പൂര്‍ണണമായും പാലിക്കുമെന്ന് ഉറപ്പ് വരുത്തണം.
വീടുകളിലോ മജ്‌ലിസിലോ നടക്കുന്ന ലളിതമായ വിവാഹങ്ങള്‍ ഒഴികെ, ഹാളുകള്‍, ഔട്ട്‌ഡോര്‍ ഇടങ്ങള്‍ എന്നിവിടങ്ങളിലുള്ള വിവാഹങ്ങളും പാര്‍ട്ടികളും ഇിയൊരറിയിപ്പുണ്ടാകുന്നതുവരെ മാറ്റിവയ്ക്കുകയോ റദ്ദാക്കുകയോ ചെയ്യുക.
ക്ഷണിക്കപ്പെട്ടവരുടെ സാന്നിധ്യം ഭാര്യാഭര്‍ത്താക്കന്മാരുടെ കുടുംബാംഗങ്ങള്‍ക്ക് മാത്രമായി പരിമിതപ്പെടുത്തിയിരിക്കുന്നു. അടച്ച സ്ഥലങ്ങളില്‍ (വീട് അല്ലെങ്കില്‍ മജ്‌ലിസ്) 10 ല്‍ കൂടുതലോ വീട്ടില്‍ തുറന്ന സ്ഥലങ്ങളില്‍ 20 ല്‍ കൂടുതലോ ആളുകള്‍ പാടില്ല.
വിവാഹങ്ങള്‍ തയ്യാറാക്കുന്നതിലും സംഘടിപ്പിക്കുന്നതിലും ഏര്‍പ്പെട്ടിരിക്കുന്ന എല്ലാ വ്യക്തികളും പാര്‍ട്ടികളും (മെട്രാഷ് 2) അപേക്ഷയിലൂടെ വിവാഹ ചടങ്ങ് നടത്താന്‍ മുന്‍കൂര്‍ അനുമതി വാങ്ങണം.
ഓരോരുത്തരുടേയും ഇഹ്തിറാസ് അപ്ലിക്കേഷന്‍ പരിശോധിക്കുകയും പച്ച സ്റ്റാറ്റസ് ഉള്ളവരെ മാത്രം പ്രവേശിപ്പിക്കുയും ചെയ്യുക.
എല്ലാ ജീവനക്കാരുടെയും ക്ഷണിതാക്കളുടെയും ശരീരോഷ്മാവ് പരിശോധിക്കുകയും താപനില 38 ഡിഗ്രി സെല്‍ഷ്യസില്‍ താഴെയുള്ള വ്യക്തികള്‍ക്ക് മാത്രം പ്രവേശനം അനുവദിക്കുകയും ചെയ്യുക.
ക്ഷണിക്കപ്പെട്ടവരുടെ വരവും പോക്കും സുരക്ഷിതമാണെന്ന് ഉറപ്പുവരുത്തുന്നതിനുള്ള നിയന്ത്രണങ്ങളും മുന്‍കരുതല്‍ നടപടികളും നടപടികള്‍ സ്വീകരിക്കുക. ചടങ്ങിലുടനീളം നിയന്ത്രണങ്ങളും മുന്‍കരുതല്‍ നടപടികളും പാലിക്കുക
ഇതുസംബന്ധിച്ച സംഭവവികാസങ്ങള്‍ക്കനുസരിച്ച് ഈ തീരുമാനം ഭേദഗതിക്കും അപ്ഡേറ്റിനും വിധേയമാണെന്നും ഈ തീരുമാനത്തിലെ വ്യവസ്ഥകളുടെ ഏതെങ്കിലും ലംഘനം കുറ്റവാളികളെ നിയമപരമായ നടപടിക്രമങ്ങളിലേക്കും ഉത്തരവാദിത്തത്തിലേക്കും നയിക്കുന്നുവെന്നും മന്ത്രാലയം മുന്നറിയിപ്പ് നല്‍കി
എല്ലാ പൗരന്മാരോടും താമസക്കാരോടും ശരിയായ ഉറവിടങ്ങളില്‍ നിന്ന് മാത്രം വിവരങ്ങള്‍ നേടാനും ഏറ്റവും പുതിയ വാര്‍ത്തകളും സംഭവവികാസങ്ങളും അറിയാന്‍ മന്ത്രാലയത്തിന്റെ ഔദ്യോഗിക പേജുകള്‍ പിന്തുടരാനും മന്ത്രാലയം ആവശ്യപ്പെട്ടു.