ഫിഫ ക്ലബ് കപ്പ് ആദ്യദിനം ടൈഗേര്‍സും അല്‍ അഹ് ലിയും ജേതാക്കള്‍
ഡോ.അമാനുല്ല വടക്കാങ്ങര
ദോഹ: കാല്‍പന്തുകളിയാരാധകര്‍ കാത്തിരുന്ന പതിനേഴാമത് ഫിഫ ക്ലബ് ലോകകപ്പിന്റെ ആദ്യ ദിനം ടൈഗേര്‍സ് യു. എന്‍.ലും അല്‍ അഹ്‌ലി യും ജേതാക്കളായി .
റയ്യാനിലെ അഹ് മദ് ബിന്‍ അലി സ്‌റ്റേഡിയത്തില്‍ നടന്ന ആദ്യ മല്‍സരത്തില്‍ ഒന്നിനെതിരെ രണ്ട് ഗോളുകള്‍ക്ക് ഉല്‍സാന്‍ ഹ്യൂണ്ടായി എഫ്.സിയെ പരാജയപ്പെടുത്തിയാണ് ടൈഗേര്‍സ് യു. എന്‍.എല്‍ ജേതാക്കളായത്.
ആതിഥേയരും ഖത്തരി ചാമ്പ്യന്മാരുമായ അല്‍ ദുഹൈലിലെ എതിരില്ലാത്ത ഒരു ഗോളിന് പരാജയപ്പെടുത്തിയാണ് ആഫ്രിക്കന്‍ ചാമ്പ്യന്മാരായ അല്‍ അഹ് ലി ജേതാക്കകളായി. എഡ്യൂക്കേഷന്‍ സിറ്റി സ്റ്റേഡിയത്തിലെ നടന്ന വാശിയേറിയ മല്‍സരത്തില്‍ അല്‍ ദുഹൈല്‍ പൊരുതി കളിച്ചെങ്കിലും കളിയുടെ മുപ്പതാം മിനിറ്റില്‍ ഹസൈന്‍ അലി ശഹാത്ത് നേടിയ ഗോള്‍ തിരിച്ചുകൊടുക്കാനായില്ല.
കളിയുടെ രണ്ടാം പകുതിയില്‍ ഉടനീളം ദുഹൈലിനായിരുന്നു ആധിപത്യം. എന്നാല്‍ ആഫ്രിക്കന്‍ ചാമ്പ്യന്മാരുടെ ശക്തമായ പ്രതിരോധവലയം ഭേദിച്ച് വല കുലുക്കാനാവാതെ ദുഹൈല്‍ താരങ്ങള്‍ക്ക് സ്വന്തം മണ്ണില്‍ പരാജയം സമ്മതിക്കേണ്ടി വന്നു.