ആരാധനാലയ നിയമം അപ്രസക്തമാക്കാനുള്ള ഗൂഢതന്ത്രം: വഖഫ് ഭേദഗതി ബിലിനെതിരെ ബഷീര്‍ വെള്ളിക്കോത്ത്
ദോഹ: 1991-ല്‍ കൊണ്ടുവന്ന ആരാധനാലയ സംരക്ഷണ നിയമം അപ്രസക്തമാക്കാനും, വഖഫ് സമ്പത്തുകളുടെ സംരക്ഷണം ദുര്‍ബലമാക്കാനും കേന്ദ്ര സര്‍ക്കാര്‍ ശ്രമിക്കുന്നതായി ബഷീര്‍ വെള്ളിക്കോത്ത് ആരോപിച്ചു. കെഎംസിസി ഖത്തര്‍ കാസര്‍ഗോഡ് ജില്ലാ കമ്മിറ്റിയുടെ ആഭിമുഖ്യത്തില്‍ സംഘടിപ്പിച്ച ”വഖഫ് ഭേദഗതി ബില്ലിലെ കാണാപ്പുറങ്ങള്‍” എന്ന വിഷയവതരണ യോഗത്തിലാണ് അദ്ദേഹം സംസാരിച്ചത്.
ഇസ്ലാമിക പാരമ്പര്യത്തിന്റെ പ്രധാന അംശമായ വഖഫ് സമ്പത്തുകള്‍ സാമൂഹിക നന്മയ്ക്കായി സംരക്ഷിക്കപ്പെടേണ്ടതാണെന്ന് ബഷീര്‍ വെള്ളിക്കോത്ത് പറഞ്ഞു. പക്ഷേ, വഖഫ് ഭേദഗതി ബില്‍ വഴി ഈ സമ്പത്തുകളുടെ സ്വതന്ത്രതയെ ബാധിക്കാന്‍ ശ്രമിക്കുന്നതായി അദ്ദേഹം കുറ്റപ്പെടുത്തി.
ആരാധനാലയ സംരക്ഷണ നിയമം, ഇന്ത്യയിലെ മതസൗഹാര്‍ദ്ദത്തിന്റെയും മതസ്ഥാപനങ്ങളുടെ അവകാശസംരക്ഷണത്തിന്റെയും അടിസ്ഥാന പാതയാണ്. 1947 ഓഗസ്റ്റ് 15നുള്ള ആരാധനാലയങ്ങളുടെ അവസ്ഥ തുടര്‍ന്നുനില്‍ക്കണമെന്ന് ഉറപ്പാക്കുന്നതാണ് ഈ നിയമത്തിന്റെ പ്രധാന ലക്ഷ്യം. ഈ നിയമത്തെ അപ്രസക്തമാക്കാന്‍ ഇടയാക്കുന്ന നീക്കങ്ങള്‍ മതവിശ്വാസങ്ങളുടെ സ്വാതന്ത്ര്യത്തിനും, ഇന്ത്യയുടെ മതേതര ചേരുവയ്ക്കും ഗുരുതരമായ ഭീഷണിയാകുമെന്ന് യോഗത്തില്‍ പങ്കെടുത്തവര്‍ ചൂണ്ടിക്കാട്ടി.
വഖഫ് സമ്പത്തുകള്‍ സര്‍ക്കാര്‍ നിയന്ത്രണത്തിലേക്ക് കൊണ്ടുവരാനുള്ള ശ്രമങ്ങള്‍, മതവിശ്വാസങ്ങളെ അപമാനിക്കുന്നതിനും സാമൂഹിക നീതി തകര്‍ക്കുന്നതിനും ഇടയാകുമെന്ന് പ്രസംഗകര്‍ ചൂണ്ടിക്കാട്ടി. രാജ്യത്തിന്റെ മതേതര ഘടനയെ സംരക്ഷിക്കാന്‍ മതസമുദായങ്ങള്‍ ജാഗരൂകരാകേണ്ടതിന്റെ അതീവ അനിവാര്യത ഇന്ന് പ്രതീക്ഷിക്കേണ്ടിയിരിക്കുന്നു.
റഫീഖ് റഹ്‌മാനിയുടെ ഖിറാഅോടെ ആരംഭിച്ച യോഗം ജില്ലാ പ്രസിഡണ്ട് ലുഖ്മാനുല്‍ ഹക്കീമിന്റെ അദ്ധ്യക്ഷതയില്‍ നടന്നു. സംസ്ഥാന ഉപദേശക സമിതി ചെയര്‍മാന്‍ ഡോ. എം.പി. ഷാഫിഹാജി യോഗം ഉദ്ഘാടനം ചെയ്തു. വേള്‍ഡ് കെഎംസിസി ഉപാധ്യക്ഷന്‍ എസ്.എ.എം. ബഷീര്‍, വേള്‍ഡ് കെഎംസിസി സെക്രട്ടറി അബ്ദു നാസര്‍ നാച്ചി, സംസ്ഥാന ജനറല്‍ സെക്രട്ടറി സലീം നാലകത്ത്, സംസ്ഥാന വൈസ് പ്രസിഡണ്ട് ആദം കുഞ്ഞി, സംസ്ഥാന സെക്രട്ടറി താഹിര്‍ താഹക്കുട്ടി, ഉപദേശക സമിതി അംഗം സാദിഖ് പാക്യാര തുടങ്ങിയവര്‍ ആശംസാപ്രസംഗങ്ങള്‍ നടത്തി.
ജില്ലാ നേതാക്കളായ നാസര്‍ കൈതക്കാട്, അലി ചേരൂര്‍, മെയ്തു ബേക്കല്‍, മുഹമ്മദ് ബായാര്‍, സഗീര്‍ ഇരിയ, റസാഖ് കല്ലട്ടി, ഹാരിസ് ഏരിയാല്‍, മാക് അടൂര്‍, അന്‍വര്‍ കാഞ്ഞങ്ങാട്, അന്‍വര്‍ കാടങ്കോട്, അബ്ദുറഹിമാന്‍ എരിയാല്‍ , ഹാരിസ് ചൂരി എന്നിവര്‍ നേതൃത്വം നല്‍കി.
ജില്ലാ ജനറല്‍ സെക്രട്ടറി സെമീര്‍ ഉദുമ്പുന്തല സ്വാഗതവും, ജില്ലാ സെക്രട്ടറി ഷാനിഫ് പൈക്ക നന്ദിയും പറഞ്ഞു
