ഈദ് തിരക്ക്: യാത്രക്കാര്ക്കുള്ള നിര്ദേശങ്ങളുമായി ഹമദ് ഇന്റര്നാഷണല് എയര്പോര്ട്ട്
അമാനുല്ല വടക്കാങ്ങര
ദോഹ: ഈദ് തിരക്ക്, യാത്രക്കാര്ക്കുള്ള നിര്ദേശങ്ങളുമായി ഹമദ് ഇന്റര്നാഷണല് എയര്പോര്ട്ട് രംഗത്ത്. തടസ്സമില്ലാത്ത യാത്ര ഉറപ്പുവരുത്തുന്നതിനായി എല്ലാവരും സഹകരിക്കണമെന്ന് ഹമദ് ഇന്റര്നാഷണല് എയര്പോര്ട്ട് ആവശ്യപ്പെട്ടു.
ഈദുല് ഫിത്വറിനോടനുബന്ധിച്ച് യാത്രക്കാരുടെ എണ്ണം ഗണ്യമായി വര്ദ്ധിക്കുമെന്നതിനാല് 2023 മെയ് 1 വരെക്കാണ് ട്രാവല് അഡ് വൈസറി പുറത്തിറക്കിയത്.
ഹമദ് അന്താരാഷ്ട്ര വിമാനത്താവളത്തിലെ ഹ്രസ്വകാല പാര്ക്കിംഗ് എല്ലാ യാത്രക്കാര്ക്കും ലഭ്യമാകും. ഏപ്രില് 18 മുതല് ഏപ്രില് 22 വരെയും ഏപ്രില് 27 മുതല് മെയ് 1 വരെയും ആദ്യത്തെ 60 മിനിറ്റ് സൗജന്യമാണ്. 60 മിനിറ്റിന് ശേഷം, സ്റ്റാന്ഡേര്ഡ് പാര്ക്കിംഗ് നിരക്കുകള് ബാധകമാകും.
വാഹനങ്ങള് ഹ്രസ്വകാല കാര് പാര്ക്കിംഗ് ഏരിയയില് ആളുകളെ കയറ്റാനും ഇറക്കാനും ഉപയോഗിക്കണം. സ്വകാര്യ വാഹനങ്ങള് അറൈവല്, ഡിപ്പാര്ച്ചര് ഏരിയകളിലെ കര്ബ്സൈഡ് ഉപയോഗിക്കരുത്. എത്തിച്ചേരുന്നതും പുറപ്പെടുന്നതുമായ യാത്രക്കാര്ക്ക് ടാക്സി, ബസ്, മെട്രോ സ്റ്റേഷന് എന്നിങ്ങനെയുള്ള ഒന്നിലധികം പൊതുഗതാഗത ഓപ്ഷനുകള് ലഭ്യമാണ്.
അതത് എയര്ലൈന് വ്യക്തമാക്കിയിട്ടില്ലെങ്കില്, വിമാനം പുറപ്പെടുന്ന സമയത്തിന് 3 മണിക്കൂര് മുമ്പ് എത്തിച്ചേരാന് വിമാനത്താവളം യാത്രക്കാരോട് ശുപാര്ശ ചെയ്തു.
ഏപ്രില് 18 മുതല് ഏപ്രില് 23 വരെ, യുണൈറ്റഡ് സ്റ്റേറ്റ്സ് ഓഫ് അമേരിക്കയും കാനഡയും ഒഴികെയുള്ള വിവിധ ലക്ഷ്യസ്ഥാനങ്ങളിലേക്ക് ഖത്തര് എയര്വേയ്സില് പറക്കുന്ന യാത്രക്കാര്ക്ക് 11-ാം വരിയില്, ഫ്ലൈറ്റ് പുറപ്പെടുന്നതിന് 12 മണിക്കൂര് മുതല് 4 മണിക്കൂര് വരെ നേരത്തെ ചെക്ക്-ഇന് ചെയ്യാനുള്ള സൗകര്യമുണ്ട്. ഇങ്ങനെ നേരത്തെ ചെക്ക് ഇന് ചെയ്യുന്നവര്ക്ക് അഞ്ച്് കിലോ അധികം ലഗേജ് അനുവദിക്കുമെന്ന് ഖത്തര് എയര്വേയ്സ് നേരത്തെ പ്രഖ്യാപിച്ചിട്ടുണ്ട്.
ഹമദ് ഇന്റര്നാഷണല് എയര്പോര്ട്ടില് യാത്രക്കാര്ക്ക് സെല്ഫ് സര്വീസ് ചെക്ക്-ഇന്, ബാഗ്-ഡ്രോപ്പ് സൗകര്യങ്ങളും പ്രയോജനപ്പെടുത്താം. ഇത് കൗണ്ടറുകളില് ക്യൂ നില്ക്കാതെ യാത്രക്കാരെ ചെക്ക്-ഇന് ചെയ്യാനും ബോര്ഡിംഗ് പാസുകളും ബാഗ് ടാഗുകളും പ്രിന്റ് ചെയ്യാനും പ്രാപ്തമാക്കുന്നു. അവരവുടെ ബാഗുകള് ടാഗ് ചെയ്യുക; ഇമിഗ്രേഷനിലേക്ക് പോകുന്നതിന് മുമ്പ് ബാഗ് ഡ്രോപ്പില് ഇടുക. ബാഗ് പൊതിയാനുള്ള സൗകര്യവും വിമാനത്താവളത്തില് ലഭ്യമാണ്.
18 വയസ്സിന് മുകളിലുള്ള യാത്രക്കാര്ക്ക് അവരുടെ പാസ്പോര്ട്ട് ഉപയോഗിച്ച് വിമാനത്താവളത്തില് ഇ-ഗേറ്റ് സേവനങ്ങള് പ്രയോജനപ്പെടുത്താം, പുറപ്പെടുന്നതിന് 60 മിനിറ്റ് മുമ്പ് ചെക്ക്-ഇന് അവസാനിക്കുമെന്നും പുറപ്പെടുന്നതിന് 20 മിനിറ്റ് മുമ്പ് ബോര്ഡിംഗ് ഗേറ്റുകള് അടയ്ക്കുമെന്നും യാത്രക്കാരെ ഓര്മ്മിപ്പിക്കുന്നു.
സുരക്ഷാ പരിശോധനയ്ക്കിടെ, ദ്രാവകങ്ങള്, എയറോസോള്, ജെല് എന്നിവ പോലുള്ള നിരോധിത വസ്തുക്കളൊന്നും കൈവശം വയ്ക്കുന്നില്ലെന്ന് ഉറപ്പുവരുത്താനും ഏതെങ്കിലും ദ്രാവക പാത്രങ്ങള് 100 മില്ലിയോ അതില് കുറവോ ഉള്ള വ്യക്തവും വീണ്ടും സീല് ചെയ്യാവുന്നതുമായ പ്ലാസ്റ്റിക് ബാഗില് പായ്ക്ക് ചെയ്യാനും യാത്രക്കാരോട് അഭ്യര്ത്ഥിക്കുന്നു.
മൊബൈല് ഫോണുകളേക്കാള് വലിപ്പമുള്ള ഇലക്ട്രോണിക് സാധനങ്ങള് ബാഗുകളില് നിന്ന് മാറ്റി ട്രേകളില് എക്സ്റേ സ്ക്രീനിങ്ങിനായി വയ്ക്കണം. ലിഥിയം ബാറ്ററികള് ഉപയോഗിച്ച് പ്രവര്ത്തിക്കുന്ന ഹോവര്ബോര്ഡുകള് പോലുള്ള ചെറിയ വാഹനങ്ങള് കൊണ്ടുപോകുന്നത് നിരോധിച്ചിരിക്കുന്നു, ഹമദ് ഇന്റര്നാഷണല് എയര്പോര്ട്ട് വ്യക്തമാക്കുന്നു.
