രണ്ടാമത് ഖത്തര്‍ ബലൂണ്‍ ഫെസ്റ്റിവല്‍ ഡിസംബര്‍ 9 മുതല്‍ 18 വരെ
ഡോ. അമാനുല്ല വടക്കാങ്ങര
ദോഹ: രണ്ടാമത് ഖത്തര്‍ ബലൂണ്‍ ഫെസ്റ്റിവല്‍ ഡിസംബര്‍ 9 മുതല്‍ 18 വരെ നടക്കുമെന്ന സംഘാടകര്‍ അറിയിച്ചു. ആസ്പയര്‍ പാര്‍ക്കിലെ ആകാശം വീണ്ടും തിളക്കമുള്ളതും വര്‍ണ്ണാഭമായതുമായ ചൂട് എയര്‍ ബലൂണുകളാല്‍ നിറയുമ്പോള്‍ ഈ വര്‍ഷം കൂടുതല്‍ കാണികളെയാണ് പ്രതീക്ഷിക്കുന്നത്.
10 ദിവസത്തെ ഉത്സവത്തില്‍ 40 ബലൂണുകള്‍ പ്രദര്‍ശിപ്പിക്കും. ഇത്തവണ തവള, കരടി, കടുവ, കുറുക്കന്‍, നായ, കോമാളി തുടങ്ങി ഒരു കപ്പല്‍ ഉള്‍പ്പെടെയുള്ള പ്രത്യേക ആകൃതിയിലുള്ള ഹോട്ട് എയര്‍ ബലൂണുകളാണ് പ്രദര്‍ശിപ്പിക്കും.
ഖത്തറിനെ ഒരു ആഗോള ടൂറിസ്റ്റ് ലക്ഷ്യസ്ഥാനമായി ഉയര്‍ത്തിക്കാട്ടാനുള്ള ശ്രമങ്ങള്‍ക്ക് കരുത്ത് പകരുന്നതാണ് ഉത്സവമെന്ന് സംഘാടക സമിതി ചെയര്‍മാന്‍ ശൈഖ് അബ്ദുല്‍റഹ്മാന്‍ ബിന്‍ ഹസന്‍ അല്‍ഥാനി പറഞ്ഞു.
സന്ദര്‍ശകര്‍ക്കും നാട്ടുകാര്‍ക്കും കൂടുതല്‍ ആവേശം നല്‍കുന്നതിനായി ബലൂണ്‍ ഫെസ്റ്റിവലിന്റെ രണ്ടാം പതിപ്പ് ഫിഫ അറബ് ലോകകപ്പ് മല്‍സരങ്ങളുമായി തന്ത്രപരമായി യോജിപ്പിച്ചിരിക്കുന്നു. ഫെസ്റ്റിവല്‍ സബ്സിഡിയുള്ള കുറഞ്ഞ നിരക്കില്‍ പൊതുജനങ്ങള്‍ക്ക് ബലൂണ്‍ റൈഡ് ബുക്ക് ചെയ്യാനുള്ള അവസരമാണ് ഈ ഇവന്റിലെ മുഖ്യ ആകര്‍ഷണം. ഒരാള്‍ക്ക് 299 റിയാല്‍ തോതില്‍ ബലൂണ്‍ സവാരിക്ക് പൊതുജനങ്ങള്‍ക്ക് അവസരം ലഭിക്കും.
ഫെസ്റ്റിവലിന്റെ www.qatarballoonfestival.com എന്ന വെബ്സൈറ്റിലും ദോഹ ഫെസ്റ്റിവല്‍ സിറ്റിയിലും അടുത്ത ആഴ്ചയോടെ ടിക്കറ്റുകള്‍ ലഭ്യമാകും.
കഴിഞ്ഞ വര്‍ഷത്തെ അപേക്ഷിച്ച് സന്ദര്‍ശകരുടെ എണ്ണം 50,000 കവിയുമെന്നാണ് സംഘാടകര്‍ പ്രതീക്ഷിക്കുന്നത്.
