വാക്‌സിനേഷന്‍ പൂര്‍ത്തിയാക്കിയവര്‍ക്ക് ഇനി മുതല്‍ ഇന്ത്യയിലേക്ക് യാത്ര ചെയ്യുവാന്‍ പി.സി.ആര്‍ പരിശോധന വേണ്ട
അമാനുല്ല വടക്കാങ്ങര
ദോഹ. പ്രവാസികള്‍ക്ക് സന്തോഷ വാര്‍ത്ത. വാക്‌സിനേഷന്‍ പൂര്‍ത്തിയാക്കിയവര്‍ക്ക് ഇനി മുതല്‍ ഇന്ത്യയിലേക്ക് യാത്ര ചെയ്യുവാന്‍ പി.സി.ആര്‍ പരിശോധന വേണ്ട . ആരോഗ്യ കുടുംബ ക്ഷേമ മന്ത്രാലയം അന്താരാഷ്ട്ര യാത്രക്കാര്‍ക്കായി ഇന്ന് പുറപ്പെടുവിച്ച മാര്‍ഗ രേഖയിലാണ് ഇക്കാര്യം വ്യക്തമാക്കിയത്. ഫെബ്രുവരി 14 മുതലാണ് ഈ തീരുമാനം നടപ്പിലാവുക.
വിദേശ യാത്രക്കാര്‍ക്ക് നിര്‍ദേശിച്ചിരുന്ന 7 ദിവസത്തെ ഹോം ക്വാറന്റൈന്‍ ഒഴിവാക്കിയതായും മാര്‍ഗ രേഖ വ്യക്തമാക്കുന്നു.
കോവിഡ് സ്ഥിതിഗതികള്‍ മെച്ചപ്പെടുകയും വാക്‌സിനേഷന്‍ പുരോഗമിക്കുകയും ചെയ്യുന്ന സാഹചര്യത്തില്‍ എയര്‍ ബബിള്‍ സംവിധാനം അവസാനിപ്പിച്ച് സാധാരണ നിലയിലുള്ള അന്താരാഷ്ട്ര വിമാന സര്‍വീസുകള്‍ താമസിയാതെ തുടങ്ങിയേക്കുമെന്നാണ് ഈ നടപടികള്‍ നല്‍കുന്ന സൂചനയെന്ന് ഖത്തറിലെ സാമൂഹ്യ പ്രവര്‍ത്തകനും ലോക കേരള സഭ അംഗവുമായ അബ്ദുല്‍ റൗഫ് കൊണ്ടോട്ടി അഭിപ്രായപ്പെട്ടു.
