ഡോ. അമാനുല്ല വടക്കാങ്ങര

ദോഹ: ലോക വന്യജീവി ദിനത്തോടനുബന്ധിച്ച് ഖത്തര്‍ മ്യൂസിയം ചെയര്‍പേഴ്‌സണ്‍ ശൈഖ മയാസ ബിന്‍ത് ഹമദ് ബിന്‍ ഖലീഫ അല്‍ഥാനി രാജ്യത്തിന്റെ പ്രകൃതിവിഭവങ്ങള്‍ സംരക്ഷിക്കുന്നതിനായി കീപ് ഖത്തര്‍ ക്ലീന്‍ കാമ്പയിന്‍ ആരംഭിച്ചു.

2022 ലോകകപ്പിന് ആതിഥേയത്വം വഹിക്കുന്നതിന് 20 മാസം മാത്രം ശേഷിക്കെ ഖത്തറിലെ ചരിത്ര പൈതൃകഗ്രാമങ്ങള്‍ കണ്ടെത്താനും അവ വൃത്തിയാക്കി സൂക്ഷിക്കുവാനും സ്വദേശികളേയും വിദേശികളേയും ആഹ്വാനം ചെയ്യുന്ന കാമ്പയിനാണിത്. ഖത്തറിലെ പുരാവസ്തു സൈറ്റുകളെക്കുറിച്ചുള്ള രസകരമായ വസ്തുതകള്‍ തന്റെ സോഷ്യല്‍ മീഡിയ വഴി പങ്കുവെക്കുമെന്ന് ശൈഖ മായാസ ട്വീറ്റ് ചെയ്തു.

ട്വീറ്റിനൊപ്പം, സിക്രീത്തില്‍ പ്ലാസ്റ്റിക് മാലിന്യങ്ങളുമായി പൊരുതുന്ന ഒരു അറേബ്യന്‍ ഒറിക്‌സിന്റെ 38 സെക്കന്‍ഡ് ദൈര്‍ഘ്യമുള്ള വീഡിയോ ക്ലിപ്പ് അവര്‍ പങ്കുവെച്ചു, ‘അറേബ്യന്‍ ഒറിക്സ് ഖത്തറിന്റെ ദേശീയ ഐക്കണാണ്. കാലങ്ങളായി, ഒറിക്സിനെ സംരക്ഷിക്കുന്നതിലും വംശനാശത്തില്‍ നിന്ന് സംരക്ഷിക്കുന്നതിലും ഖത്തര്‍ പ്രധാന പങ്ക് വഹിച്ചിട്ടുണ്ട്. നമ്മുടെ പ്ലാസ്റ്റിക് ഉപഭോഗം നമ്മുടെ സ്വഭാവത്തെ എങ്ങനെ ബാധിക്കുന്നുവെന്നും സിക്രീത്തില്‍ അവശേഷിക്കുന്ന പ്ലാസ്റ്റിക് മാലിന്യം എവിടേക്കാണ് പോകുന്നതെന്നും കാണുമ്പോള്‍ സങ്കടമുണ്ട്, അവര്‍ ട്വീറ്റ് ചെയ്തു.