എം.ഇ.എസ്. ഇന്ത്യന്‍ സ്‌കൂള്‍ അലൂംനിക്ക് പുതിയ നേതൃത്വം :ഫാസില്‍ ഹമീദ് പ്രസിഡണ്ട്, സംറ മഹബൂബ് ജനറല്‍ സെക്രട്ടറി , നഈമ ബഷീര്‍ ട്രഷറര്‍
അമാനുല്ല വടക്കാങ്ങര
ദോഹ : ഖത്തറിലെ ആദ്യത്തേതും ഏറ്റവും വലിയതുമായ ഇന്ത്യന്‍ സ്‌കൂളായ എം.ഇ.എസ്. ഇന്ത്യന്‍ സ്‌കൂള്‍ അലൂംനിയുടെ 2023 – 25 കാലത്തേക്കുള്ള പുതിയ പ്രസിഡണ്ടായി ഫാസില്‍ ഹമീദിനെ തെരഞ്ഞെടുത്തു. ഈയിടെ സ്‌കൂളില്‍ നടന്ന വാര്‍ഷിക ജനറല്‍ ബോഡിയാണ് പുതിയ കമ്മറ്റിയെ തെരഞ്ഞെടുത്തത്.
അമാനത് സോളങ്കി (വൈസ് പ്രസിഡന്റ്) സംറ മഹ്ബൂബ് (ജനറല്‍ സെക്രട്ടറി), നഈമ ബഷീര്‍ (ട്രഷറര്‍), ജോയല്‍ മാത്യൂസ്, മുഹമ്മദ് നബീല്‍, എബ്രഹാം വര്‍ഗീസ്, അഷ്ഫാഖ് നസീര്‍
സമീഹ സൂപ്പി, അബിന്‍ അര്‍ജുനന്‍ ജോയിന്റ് സെക്രട്ടറിമാര്‍ എന്നിവരാണ് മറ്റു ഭാരവാഹികള്‍. ബന്ധങ്ങള്‍ ശക്തിപ്പെടുത്തുന്നതിനും ഇടപഴകല്‍ പ്രോത്സാഹിപ്പിക്കുന്നതിനുമായി എംഇഎസ് പൂര്‍വവിദ്യാര്‍ഥി അസോസിയേഷന്റെ പുതിയ കമ്മിറ്റി ഊന്നല്‍ നല്‍കുന്നത്. എംഇഎസ് അലുംനി അസോസിയേഷന്‍ അഡൈ്വസറി ബോര്‍ഡ് ചെയര്‍മാന്‍ സിയാദ് ഉസ്മാന്‍ തെരഞ്ഞെടുപ്പ് നിയന്ത്രിച്ചു. സ്ഥാനമൊഴിയുന്ന പ്രസിഡണ്ട് ഷഹീന്‍ ഷാഫി പുതിയ കമ്മറ്റിക്ക് എല്ലാവിധ ആശംസകളും നേര്‍ന്നു.
1974-ല്‍ സ്ഥാപിതമായ എംഇഎസ് ഇന്ത്യന്‍ സ്‌കൂള്‍ അക്കാദമിക് മികവിനും വിദ്യാര്‍ത്ഥികളുടെ സമഗ്രവികസനത്തിനുമുള്ള പ്രതിബദ്ധതയ്ക്ക് പേരുകേട്ടതാണ്. എംഇഎസ് അലുംനി അസോസിയേഷന്‍ മുന്‍ വിദ്യാര്‍ത്ഥികളുമായി ശക്തമായ ബന്ധം നിലനിര്‍ത്താന്‍ ശ്രമിക്കുന്നതോടൊപ്പം, സ്ഥാപനവും അതിന്റെ പ്രഗത്ഭരായ പൂര്‍വ്വ വിദ്യാര്‍ത്ഥികളും തമ്മില്‍ ആജീവനാന്ത ബന്ധം വളര്‍ത്തിയെടുക്കുകയും ചെയ്യുന്നു.
കഴിഞ്ഞ രണ്ട് വര്‍ഷമായി, 11 മുന്‍ സ്‌കൂള്‍ അധ്യാപകരുള്‍പ്പെടെ 500 ഓളം പേര്‍ പങ്കെടുത്ത ‘മീറ്റ് ദി ടീച്ചര്‍’ ഉള്‍പ്പെടെ, വ്യാപകമായ സാന്നിധ്യമുള്ള നിരവധി പരിപാടികളാണ് അലുംനി അസോസിയേഷന്‍ വിജയകരമായി സംഘടിപ്പിച്ചത്. കൂടാതെ, എംഇഎസ് കാമ്പസില്‍ അസോസിയേഷന്‍ ഡൈനാമിക് ‘മീറ്റ് ദ അലുംനി’ പരിപാടിയും സംഘടിപ്പിച്ചു . രക്തദാന ക്യാമ്പുകള്‍, കായികമേളകള്‍, സ്‌കൂളിലെ മുന്‍ പ്രിന്‍സിപ്പലിനെ ആദരിക്കുന്ന എംഇഎസ് വിദ്യാര്‍ത്ഥികള്‍ക്കുള്ള പ്രസംഗ മത്സരമായ ബി കെ മുഹമ്മദ് കുഞ്ഞി പ്രഭാഷണ മത്സരം എന്നിവയിലൂടെയും എംഇഎസ് അലുംനി ശ്രദ്ധേയമായ പ്രവര്‍ത്തനങ്ങളാണ് കാഴ്ചവെച്ചത്. കൂടാതെ, മുന്‍ വിദ്യാര്‍ത്ഥികള്‍ക്കിടയില്‍ ബാച്ച് പുനഃസമാഗമങ്ങളും നെറ്റ്വര്‍ക്കിംഗ് അവസരങ്ങളും എം.ഇ.എസ് അലുംനി അസോസിയേഷന്‍ സജീവമായി പ്രോത്സാഹിപ്പിക്കുന്നു. ഇഫ്താര്‍, സ്‌പോര്‍ട്‌സ് ദിനാഘോഷങ്ങള്‍, ഓണം ആഘോഷങ്ങള്‍ എന്നിവയില്‍ ഒത്തുചേരലിലൂടെ, പൂര്‍വവിദ്യാര്‍ത്ഥികള്‍ക്ക് പരസ്പരം ബന്ധിപ്പിക്കാനും അവരുടെ ബന്ധം ശക്തിപ്പെടുത്താനും അവസരമൊരുക്കാറുണ്ട്.
എംഇഎസ് ഇന്ത്യന്‍ സ്‌കൂളിന്റെ കീഴിലുള്ള എം.ഇ.എസ് അലുംനി അസോസിയേഷന്‍ ലോകമെമ്പാടുമുള്ള തങ്ങളുടെ പൂര്‍വ വിദ്യാര്‍ത്ഥികളെ സ്ഥാപനവുമായി ബന്ധിപ്പിക്കുന്നതിനുള്ള വ്യക്തമായ ലക്ഷ്യബോധത്തോടെയാണ് ആരംഭിച്ചത്. പൂര്‍വ വിദ്യാര്‍ത്ഥികളുമായി ശക്തമായ ബന്ധം നിലനിര്‍ത്താന്‍ അലുംനി ശ്രമിക്കുന്നു, സ്ഥാപനവും അതിന്റെ പ്രഗത്ഭരായ പൂര്‍വ്വ വിദ്യാര്‍ത്ഥികളും തമ്മില്‍ ആജീവനാന്ത ബന്ധം വളര്‍ത്തിയെടുക്കുന്നു.
