ഡോ. അമാനുല്ല വടക്കാങ്ങര :

ദോഹ:അല്‍ ബെയ്ത് സ്റ്റേഡിയം പാര്‍ക്കില്‍ കഴിഞ്ഞയാഴ്ച തുടങ്ങിയ അല്‍ ഖോര്‍ കാര്‍ണിവല്‍ ഇനിയൊരറിയിപ്പുണ്ടാകുന്നതുവരെ നിര്‍ത്തിവെച്ചതായി സംഘാടകര്‍ അറിയിച്ചു. ജനുവരി 30 ന് അണുനശീകരണത്തിന് വേണ്ടി അടക്കുകയാണെന്നാണ് സംഘാടകര്‍ ആദ്യം പറഞ്ഞത്. എന്നാല്‍ കാര്‍ണിവെല്‍ ഇനിയൊരറിയിപ്പുണ്ടാകുന്നതുവരെ നിര്‍ത്തിവെക്കുകയാണെന്ന് ഇന്നലെയാണ് സംഘാടകര്‍ ട്വിറ്റ് ചെയ്തത്.

സമൂഹത്തിന്റെ വിവിധ തട്ടുകളിലെ നിരവധി പേരുടെ പങ്കാളിത്തത്തില്‍ രണ്ടാഴ്ച നീണ്ടുനില്‍ക്കുന്ന കാര്‍ണിവലിലേക്ക് തുടക്കം മുതല്‍ തന്നെ വമ്പിച്ച ജനക്കൂട്ടമാണ് ഒഴുകിയെത്തിയത് .കോവിഡ് ഭീഷണി വര്‍ദ്ധിച്ച സാഹചര്യത്തിലാണ് കാര്‍ണിവല്‍ നിര്‍ത്തിവെച്ചതെന്നാണറിയുന്നത്.

ആകര്‍ഷകമായ റൈഡുകള്‍, വിവിധ തരം സാംസ്‌കാരിക പരിപാടികള്‍, കുടുംബസമേതമുള്ള ഷോപ്പിങ് എന്നിവയ്ക്ക് പുറമെ കലാസാംസ്‌കാരിക പ്രകടനങ്ങളും വിഷ്വല്‍ ഡിസ്പ്ലേകളും അല്‍ ഖോര്‍ കാര്‍ണിവലിന്റെ ഭാഗമായിരുന്നു. രുചി വൈവിധ്യങ്ങളാല്‍ സമൃദ്ധമായ ഭക്ഷണശാലകളും ഫുഡ് കൗണ്ടറുകളും കാര്‍ണിവലിനെ ജനകീയമാക്കി.

കൊവിഡ് മുന്‍കരുതല്‍ നടപടികളുടെ ഭാഗമായി അണുനശീകരണ പ്രക്രിയകള്‍ നടത്തുന്നതിനായി അല്‍ ഖോര്‍ കാര്‍ണിവെല്‍ കൂടുതല്‍ അറിയിപ്പ് ഉണ്ടാകുന്നതുവരെ നിര്‍ത്തിവെക്കുകയാണെന്ന സംഘാടകര്‍ അറിയിപ്പ് വന്നതറിയാതെ കഴിഞ്ഞ ദിവസവും ധാരാളമാളുകള്‍ അല്‍ ഖോറില്‍ പോയി മടങ്ങി