ദോഹ. ഫൈസര്‍ ആന്റ് ബയോനെടെക്കിന്റെ കോവിഡ് 19 വാക്‌സിന്‍ ആദ്യ ബാച്ച് ഇന്നലെ രാത്രി ദോഹയിലെത്തി. നാളെ മുതല്‍ മുന്‍ഗണനാടിസ്ഥാനത്തില്‍ നല്‍കി തുടങ്ങുമെന്ന് പൊതുജനാരോഗ്യ മന്ത്രാലയം അറിയിച്ചു. വജബ, ലബീബ്, റുവൈസ്, ഉമ്മുസ്വലാല്‍, റൗദതുല്‍ ഖൈല്‍, തുമാമ, മൈദര്‍ എന്നീ 7 ഹെല്‍ത്ത്് സെന്ററുകളിലാണ് വാക്സിന്‍ വിതരണം നടക്കുക.ഡിസംബര്‍ 23 മുതല്‍ ജനുവരി 31 വരെയുളള ആദ്യ ഘട്ടത്തില്‍ 70 വയസ്സിന് മേല്‍ പ്രായമുള്ളവര്‍, ക്രോണിക് രോഗമുള്ളവര്‍, മുന്‍നിര ആരോഗ്യ പ്രവര്‍ത്തകര്‍ , വിവിധ മന്ത്രാലയങ്ങളിലെ മുന്‍നിര പ്രവര്‍ത്തകര്‍ എന്നിവര്‍ക്കാണ് വാക്സിന്‍ നല്‍കുകഈ മുന്‍ഗണന വിഭാഗത്തില്‍പ്പെടുന്നവരെ മന്ത്രാലയം ടെലഫോണ്‍ വഴിയും എസ്. എം. എസ്. വഴിയും ബന്ധപ്പെട്ട് അപ്പോയന്റ്മെന്റ് നല്‍കും. ഓരോരുത്തരും രണ്ട് ഡോസുകള്‍ വീതമെടുക്കണം. ആദ്യ ഡോസ് എടുത്ത് 21 ദിവസത്തിന് ശേഷമാണ് രണ്ടാമത്തെ ഡോസ് എടുക്കേണ്ടത്. വാക്സിന്‍ നല്‍കുന്നതിന് മുമ്പ് വ്യക്തിയയുടെ ആരോഗ്യ സ്ഥിതി വിലയിരുത്തുകയും രേഖപ്പെടുത്തുകയും ചെയ്യും. കോവിഡ് വാക്സിന്‍ എടുത്ത തിയ്യതി, സ്ഥലം എന്നിവ രേഖപ്പെടുത്തിയ പ്രത്യേക കാര്‍ഡുകള്‍ നല്‍കും. രണ്ടാമത്തെ ഡോസിനുള്ള അപ്പോയന്റ്മെന്റും അപ്പോള്‍ നല്‍കും. വാക്‌സിന്‍ വന്നെങ്കിലും കോവിഡ് പ്രോട്ടോക്കോളുകള്‍ കണിശമായി പാലിക്കുന്നതില്‍ ജനങ്ങള്‍ ജാഗ്രത പുലര്‍ത്തണമെന്ന് പൊതുജനാരോഗ്യ മ്ര്രന്താലയം ആവശ്യപ്പെട്ടു.