കോവിഡ് വാക്സിന്‍ ഇന്‍സ്റ്റഗ്രാമില്‍ തല്‍സമയ ചോദ്യോത്തര സെഷനുമായി പൊതുജനാരോഗ്യ മന്ത്രാലയം
ഡോ. അമാനുല്ല വടക്കാങ്ങര
ദോഹ: കോവിഡ് വാക്സിന്‍ സംബന്ധിച്ച് ഇന്‍സ്റ്റഗ്രാമില്‍ തല്‍സമയ ചോദ്യോത്തര സെഷനുമായി പൊതുജനാരോഗ്യ മന്ത്രാലയം . ജനങ്ങള്‍ക്കുണ്ടായേക്കാവുന്ന സംശയങ്ങളും ആശങ്കകളും ദൂരീകരിക്കുന്നതിനായാണ് ഇംഗ്ളീഷിലും അറബിയിലും വെവ്വേറെയായി പരിപാടി നടത്തുന്നത്. കഴിഞ്ഞ ആഴ്ച നടത്തിയ പരിപാടി വിജയകരമായതിനെ തുടര്‍ന്നാണ് ഈ ആഴ്ചയും പരിപാടി നടത്തുന്നത്.
പൊതുജനാരോഗ്യ മന്ത്രാലയം ഇന്‍സ്റ്റാഗ്രാം ചാനലില്‍ ഇന്ന് വൈകുന്നേരം 4 മണിക്ക് ഇംഗ്ലീഷിലും 5 മണിക്ക് അറബിയിലുമാണ് ചോദ്യോത്തര പരിപാടി നടക്കുക.
വാക്സിനേഷന് വിഭാഗം മേധാവി ഡോ. സുഹ അല്‍ ബയാത്ത് പരിപാടിക്ക് നേതൃത്വം നല്‍കും.
കോവിഡ് -19 വാക്സിന്‍ സുരക്ഷിതമാണെന്നും എല്ലാ പ്രോട്ടോക്കോളുകളും റെഗുലേറ്ററി അംഗീകാരങ്ങളും നേടിയതാണെന്നും അധികൃതര്‍ വ്യക്തമാക്കി. ഇത് സുരക്ഷിതമാണെന്ന് തെളിയിക്കപ്പെട്ടിട്ടുണ്ട്. എഴുപതിന് മേല്‍ പ്രായമുള്ളവര്‍ക്കും ദീര്‍ഘകാല രോഗികള്‍ക്തുമടക്കംം വാക്സിനേഷന് തുടങ്ങി ഒരാഴ്ച പിന്നിട്ടപ്പോള്‍ കാര്യമായ പ്രശ്‌നങ്ങളൊന്നുമുണ്ടായിട്ടില്ല എന്നതും ഏറെ ആശ്വാസകരമാണ്.