പത്തൊമ്പതാമത് പ്രൊജക്ട് ഖത്തറിന് ഉജ്വല തുടക്കം

അമാനുല്ല വടക്കാങ്ങര

ദോഹ. നിര്‍മാണ മേഖലയിലെ ഖത്തറിലെ ഏറ്റവും വലിയ പ്രദര്‍ശനമായ പത്തൊമ്പതാമത് പ്രൊജക്ട് ഖത്തറിന് ദോഹ എക്‌സിബിഷന്‍ ആന്റ് കണ്‍വെന്‍ഷന്‍ സെന്ററില്‍ ഉജ്വല തുടക്കം. ഖത്തറിനകത്തും പുറത്തുനിന്നുമുളള മുന്നൂറിലധികം കമ്പനികളാണ് പ്രദര്‍ശനത്തില്‍ പങ്കെടുക്കുന്നത്.

ജൂണ്‍ 1 വരെ നീണ്ടുനില്‍ക്കുന്ന പ്രദര്‍ശനം വാണിജ്യ വ്യവസായ മന്ത്രി ശൈഖ് മുഹമ്മദ് ബിന്‍ ഹമദ് ബിന്‍ ഖാസിം അല്‍-അബ്ദുള്ള അല്‍താനി ഔദ്യോഗികമായി ഉദ്ഘാടനം ചെയ്തു.

പ്രധാനമന്ത്രിയും വിദേശകാര്യ മന്ത്രിയുമായ ശൈഖ് മുഹമ്മദ് ബിന്‍ അബ്ദുള്‍റഹ്‌മാന്‍ ബിന്‍ ജാസിം അല്‍താനിയുടെ രക്ഷാകര്‍തൃത്വത്തില്‍ നടക്കുന്ന നാല് ദിവസത്തെ പരിപാടി നിര്‍മാണ വ്യവസായ രംഗത്തെ പ്രൊഫഷണലുകള്‍ക്കും താല്‍പ്പര്യക്കാര്‍ക്കും ഒരു പ്രധാന വേദിയായി വര്‍ത്തിക്കുന്നു.

വാണിജ്യ-വ്യവസായ മന്ത്രാലയത്തിന്റെ പിന്തുണയോടെയും പൊതുമരാമത്ത് അതോറിറ്റിയുടെ (അഷ്ഗാല്‍) പങ്കാളിത്തത്തോടെയും പ്രൊജക്ട് ഖത്തര്‍ 2023 പ്രതീക്ഷകള്‍ക്കപ്പുറവും നിര്‍മ്മാണ മേഖലയില്‍ നൂതനമായ മാറ്റങ്ങള്‍ക്ക് സഹായകമാകും.

അഷ്ഗാല്‍, ഖത്തര്‍ ചേംബര്‍, ഖത്തര്‍ ദിയാര്‍, ഖത്തര്‍ നാവിഗേഷന്‍, പ്രമുഖ സ്വകാര്യമേഖലാ കമ്പനികള്‍ എന്നിവിടങ്ങളില്‍ നിന്നുള്ള പ്രതിനിധികള്‍ ഉള്‍പ്പെടെ നിരവധി വിശിഷ്ടാതിഥികളും ഔദ്യോഗിക പ്രതിനിധികളും ഉദ്ഘാടന ചടങ്ങില്‍ പങ്കെടുത്തു.കൂടാതെ, പങ്കെടുക്കുന്ന രാജ്യങ്ങളില്‍ നിന്നുള്ള 30 ലധികം അംബാസഡര്‍മാരുടെയും പരിപാടി സന്ദര്‍ശിച്ച നിരവധി അന്താരാഷ്ട്ര വ്യാപാര പ്രതിനിധികളുടെയും സാന്നിധ്യത്തോടെ ചടങ്ങ് ആഗോള ശ്രദ്ധ നേടി.

ഖത്തര്‍ ദേശീയ ദര്‍ശനം 2030 ന്റെ തത്വങ്ങള്‍ ഉള്‍ക്കൊണ്ടുകൊണ്ട്, ഈ വര്‍ഷത്തെ എക്‌സിബിഷന്‍ ഖത്തര്‍ വ്യവസായ മേഖലയെ അന്താരാഷ്ട്ര പ്രേക്ഷകര്‍ക്ക് മുന്നില്‍ അവതരിപ്പിക്കാന്‍ ലക്ഷ്യമിട്ട് ‘ഖത്തര്‍ ഇന്‍ഡസ്ട്രീസ്’ എന്ന ഒരു പ്രത്യേക വിഭാഗം തന്നെ അവതരിപ്പിക്കുന്നുണ്ട് ഈ സംരംഭം പ്രാദേശിക നിര്‍മ്മാതാക്കളുടെ വ്യാപനം വിപുലീകരിക്കാനും അവരുടെ ഉല്‍പ്പന്നങ്ങള്‍ ആഗോള തലത്തില്‍ പ്രോത്സാഹിപ്പിക്കാനും ലക്ഷ്യമിടുന്നു.

കഴിഞ്ഞ ഏതാനും വര്‍ഷങ്ങളായി പ്രാദേശിക വ്യവസായ മേഖലയുടെ വിപുലീകരണത്തില്‍ ഖത്തര്‍ കൈവരിച്ച ശ്രദ്ധേയമായ നേട്ടങ്ങളില്‍ പ്രദര്‍ശനം ശ്രദ്ധ കേന്ദ്രീകരിക്കുന്നു. ഖത്തറിലെ നിര്‍മ്മാണ വ്യവസായത്തിന്റെ ഭാവിയില്‍ ശക്തമായ ശ്രദ്ധ കേന്ദ്രീകരിച്ചുകൊണ്ട്, പ്രോജക്ട് ഖത്തര്‍ 2023 സാങ്കേതിക കണ്ടുപിടുത്തങ്ങളുടെ സുപ്രധാന പങ്ക് ഊന്നിപ്പറയുന്നു.

നിര്‍മ്മാണ പദ്ധതികളില്‍ ഉപയോഗിക്കുന്ന അത്യാധുനിക, വിവിധോദ്ദേശ്യ നൂതന സാങ്കേതിക വിദ്യകള്‍ പ്രദര്‍ശിപ്പിക്കുന്ന നിരവധി ദാതാക്കളെ അവതരിപ്പിക്കുന്ന ‘സ്മാര്‍ട്ട് സിറ്റികള്‍’ പവലിയന്‍ ഏറെ ശ്രദ്ധേയമാണ്.
ഖത്തറിലെ നിര്‍മ്മാണ മേഖലയുടെ ഭാവി രൂപപ്പെടുത്തുന്നതില്‍ ഈ നവീകരണങ്ങളുടെ പരിവര്‍ത്തന സാധ്യതകളെ ഈ പ്ലാറ്റ്‌ഫോം എടുത്തുകാണിക്കുന്നു.