ഓണം

വിനേഷ് ഹെഗ്‌ഡെ

ഓണം വരവായ് പൊന്നോണം വരവായ്‌
ഓർമ്മതൻ പൂന്തോപ്പിൽ സൗരഭ്യമായ്‌
പൊന്നിൻ ചിങ്ങ പുലരിതൻ ശോഭയിൽ
മാനവ ഹൃദയങ്ങൾകാഘോഷമായ്
ഓലപ്പുരയുടെ കോലായിൻ കീഴിലായി
കുഞ്ഞാറ്റ കിളികൾ തൻ ആരവമായ്
കുഞ്ഞിളം കൈകളിൽ കൊട്ടയുമായ്
കുഞ്ഞി കുരുന്നുകൾ പൂ പറിച്ചു
തുമ്പയും ചക്കിയും തിരുതാളിയും
പിന്നെ ചെണ്ടുമല്ലി പൂവും മുക്കുറ്റിയും
ചാണകം മെഴുകിയ ചേലൊത്ത മുറ്റത്തായ്
പൂക്കളം തീർക്കയായ് ഓമനകൾ
കൂട്ടിനായി തുമ്പികൾ പൂമ്പാറ്റകൾ
ആമോദമായ് പറന്നെത്തുന്നല്ലോ
ഓണക്കളികളും കുസൃതിയും പാട്ടുമായ്
ആനന്ദ സ്വർഗമായ് അന്തരംഗം
ഓണം വരവായ് പൊന്നോണം വരവായ്‌
ഓർമ്മതൻ പൂന്തോപ്പിൽ സൗരഭ്യമായ്‌