സഹകരണം മെച്ചപ്പെടുത്തി ഖത്തര് എയര്വേയ്സും ഒമാന് എയറും
ഡോ. അമാനുല്ല വടക്കാങ്ങര
ദോഹ. സഹകരണം മെച്ചപ്പെടുത്തി ഖത്തര് എയര്വേയ്സും ഒമാന് എയറും. ഗള്ഫ് മേഖലയിലെ പ്രധാനപ്പെട്ട രണ്ട് എയര്ലൈനുകളും തമ്മിലുള്ള പുതിയ കോഡ് ഷെയറിംഗ് സ്ട്രാറ്റജിക് എഗ്രിമെന്റ് ഒമാന്, ഖത്തര് എയര്വേയ്സ് യാത്രക്കാര്ക്ക് കൂടുതല് സൗകര്യങ്ങള് നല്കും.
20 വര്ഷം മുമ്പാണ് ഒമാന് എയറുമായി ആദ്യ സഹകരണം തുടങ്ങിയതെന്നും പുതിയ കരാര് ഇരു എയര്ലൈനുകളും തമ്മിലുള്ളള സഹകരണം കൂടുതല് മെച്ചപ്പെടുത്തുമെന്നും ഖത്തര് എയര്വേയ്സ് ഗ്രൂപ്പ് സി.ഇ.ഒ. അക്ബര് അല് ബാക്കര് അഭിപ്രായപ്പെട്ടു. ഖത്തര് എയര്വേയ്സിന്റെ എണ്പതിലധികം ഡെസ്റ്റിനേഷനുകളിലേക്ക് ടിക്കറ്റ് ബുക്ക് ചെയ്യുവാന് ഈ സഹകരണം ഒമാന് എയര് യാത്രക്കാര്ക്ക് സഹായകമാകുമെന്ന് അദ്ദേഹം പറഞ്ഞു.
ഖത്തറിന്റെ ദേശീയ വിമാന കമ്പനിയായ ഖത്തര് എയര്വേയ്സ് നിലവില് 130 ഡെസ്റ്റിനേഷനുകളിലേക്കാണ് പറക്കുന്നത്. ജൂലൈ അവസാനത്തോടെ 140 ഡെസ്റ്റിനേഷനുകളിലേക്കായി 1200 പ്രതിവാര വിമാനങ്ങള് എന്നതാണ് ലക്ഷ്യം.സേവന മികവിലും സൗകര്യങ്ങളിലും തുടര്ച്ചയായി പഞ്ചനക്ഷത്ര പദവി അലങ്കരിക്കുന്ന ഖത്തര് എയര്വേയ്സുമായുള്ള സഹകരണം ഒമാന് എയര് യാത്രക്കാര്ക്ക് ഏറെ പ്രയോജനകരമാകുമെന്നാണ് വിലയിരുത്തപ്പെടുന്നത്.
ലോകത്തിലെ തന്നെ മികച്ച എയര്ലൈനുകളിലൊന്നായി അംഗീകാരം നേടിയ ഖത്തര് എയര്വേയ്സുമായി സഹകരണം ശക്തിപ്പെടുത്തുന്നതില് സന്തോഷമുണ്ടെന്നും ഒമാന് എയര് യാത്രക്കാര്ക്ക് ഇത് ഏറെ പ്രയോജനം ചെയ്യുമെന്നും ഒമാന് എയര് സി.ഇ.ഒ. അബ്ദുല് അസീസ് അല് റയീസ് പറഞ്ഞു. 16 പുതിയ റൂട്ടുകളിലേക്ക് കണക്ഷനുകള് ലഭിക്കുവാന് ഇത് സഹായകമാകും. മേഖലയിലെ ഏറ്റവും മികച്ച വിമാനതാവളങ്ങളിലൊന്നായ ഹമദ് ഇന്റര്നാഷണല് എയര്പോര്ട്ടിന്റെ സൗകര്യങ്ങളാസ്വദിക്കുവാനും ഈ സഹകരണം ഒമാന് എയര് യാത്രക്കാര്ക്ക് അവസരം നല്കും.
