ക്യൂ.എന്.സി.സിയിലെ കോവിഡ് വാക്സിനേഷന് കേന്ദ്രം ഇന്നു മുതല് രണ്ട് ഷിഫ്റ്റ്
ഡോ. അമാനുല്ല വടക്കാങ്ങര
ദോഹ. ക്യൂ.എന്.സി.സിയിലെ കോവിഡ് വാക്സിനേഷന് കേന്ദ്രം ഇന്നു മുതല് രണ്ട് ഷിഫ്റ്റായിരിക്കുമെന്ന് പ്രൈമറി ഹെല്ത്ത് കെയര് കോര്പ്പറേഷന് അറിയിച്ചു. രാവിലെ 9 മണി മുതല് പുലര്ച്ചെ 1 മണിവരെ വരെ ഒരു സ്ട്രെച്ചില് ഓടുന്നതിനുപകരം ഇന്നു മുതല് കേന്ദ്രം രണ്ട് ഷിഫ്റ്റുകളിലായി പ്രവര്ത്തിക്കും – ആദ്യത്തേത് രാവിലെ 8 മുതല് വൈകുന്നേരം 4 വരെയും രണ്ടാമത്തേത് 7 മുതല് 1 വരെയായിരിക്കും. രണ്ട് ഷിഫ്റ്റിലും സമയമവസാനിക്കുന്നതിന്റെ ഒരു മണിക്കൂര് മുമ്പ് വരെ മാത്രമേ പ്രവേശനമനുവദിക്കുകയുള്ളൂ. ആഴ്ചയിലെ ഏഴു ദിവസവും ഇതേ സമയക്രമമായിരിക്കും.
എന്നാല് ലുസൈല്, അല് വകറ എന്നിവിടങ്ങളിലെ ഡ്രൈവ്-ത്രൂ വാക്സിനേഷന് കേന്ദ്രങ്ങളില്, റമദാനിലുടനീളം എല്ലാ ദിവസവും ഉച്ചയ്ക്ക് ഒരു മണി മുതല് അര്ദ്ധരാത്രി വരെ കേന്ദ്രങ്ങള് പ്രവര്ത്തിക്കും. അവസാനത്തെ എന്ട്രി രാത്രി 11 മണിക്കായിരിക്കും.
