പത്തുലക്ഷം വൃക്ഷത്തൈകള് നട്ടുപിടിപ്പിക്കുന്ന പദ്ധതിയില് ചൈനീസ് എംബസിയും
ഡോ. അമാനുല്ല വടക്കാങ്ങര
ദോഹ. പരിസ്ഥിതി സംരക്ഷണവും ആരോഗ്യകരമായ ജീവിത ചുറ്റുപാടും ഉറപ്പുവരുത്തുന്നതിനായി ഖത്തറില് പത്തുലക്ഷം വൃക്ഷത്തൈകള് നട്ടുപിടിപ്പിക്കുന്ന മുനിസിപ്പല് പരിസ്ഥിതി മന്ത്രാലയത്തിന്റെ പദ്ധതിയില് ഖത്തറിലെ ചൈനീസ് എംബസിയും
പങ്ക് ചേര്ന്നു.പബ്ളിക് പാര്ക് ഡിപ്പാര്ട്ട്മെന്റുമായി സഹകരിച്ച നടന്ന പരിപാടിയില് നിരവധി ചെടികളാണ് നട്ടത്. ചൈനീസ് അംബാസിഡര് സോ ജിയാന്, നിരവധി ചൈനീസ് കമ്മ്യൂണിറ്റി അംഗങ്ങള് എന്നിവര് സംബന്ധിച്ചു.
മരം ഒരു വരം എന്ന സുപ്രധാനമായ ആശയത്തിന് അടിവരയിടുന്നതോടൊപ്പം പ്രകൃതിയുടെ പച്ചപ്പ് നിലനിര്ത്തി പാരിസ്ഥിതിക സന്തുലിതാവസ്ഥ ഉറപ്പുവരുത്തുകയും നഗരത്തിന്റെ സൗന്ദര്യവല്ക്കരണത്തിന് സഹായകമാവുകയും ചെയ്യുന്ന രീതിയിലാണ് കാമ്പയിന് സംവിധാനിച്ചിരിക്കുന്നത്.
ആഗോള താപനവും കാലാവസ്ഥ മാറ്റവുമൊക്കെ ഗുരുതരമായ പ്രത്യാഘാതകങ്ങള് സൃഷ്ടിക്കുന്ന സമകാലിക ലോകത്ത് ഏറ്റവും ശ്രദ്ധേയമായ ഒരു ദൗത്യമാണ് മുനിസിപ്പല് പരിസ്ഥിതി മന്ത്രാലയം ഏറ്റെടുത്തിരിക്കുന്നത്.
ഖത്തറിലെ മുഴുവന് ജനങ്ങളുടേയും സഹകരണവും പങ്കാളിത്തവും ഉറപ്പുവരുത്തിയാണ് ഈ കാമ്പയിന് മന്ത്രാലയം ആവിഷ്ക്കരിച്ചിരിക്കുന്നത്.
