ഖത്തറും ഫിലിപ്പീന്സും 500 മില്യണ് ഡോളറിന്റെ സംയോജിത ഡയറി പദ്ധതിക്ക് ധാരണ
അമാനുല്ല വടക്കാങ്ങര
ദോഹ: ഖത്തറും ഫിലിപ്പീന്സും 500 മില്യണ് ഡോളറിന്റെ സംയോജിത ഡയറി പദ്ധതിക്ക് ധാരണ. ഫിലിപ്പൈന്സിലെ കൃഷി വകുപ്പും വാണിജ്യ വ്യവസായ വകുപ്പും ബലദ്ന ഖത്തര് പബ്ലിക് ഷെയര്ഹോള്ഡിംഗ് കമ്പനിയുമായി ഈ വിഷയത്തില് ധാരണ പത്രത്തില് ഒപ്പുവെച്ചു.
ഫിലിപ്പൈന്സിലെ കൃഷി വകുപ്പ് സെക്രട്ടറി വില്യം ഡാര്, വാണിജ്യ വ്യവസായ വകുപ്പ് സെക്രട്ടറി റാമോണ് ലോപ്പസ്, ബലദ്ന ഇന്ഡിപെന്ഡന്റ് ബോര്ഡ് അംഗം എയ്ഡന് ടൈനാന് എന്നിവര് ദുബൈയില് വെച്ചാണ് കരാറില് ഒപ്പിട്ടത്.
ഭക്ഷ്യസുരക്ഷ, പ്രാദേശിക പാല് ഉല്പ്പാദനം, കാര്ഷിക-വ്യാവസായിക വികസനത്തിലേക്ക് നയിക്കുന്ന സംസ്കരണം എന്നിവയിലൂടെ ഫിലിപ്പൈന് ക്ഷീര വ്യവസായത്തിലെ കുതിച്ചുചാട്ടത്തിന് ഉത്തേജക നിക്ഷേപത്തെ സഹായിക്കുമെന്നതിനാല് ദേശീയ ക്ഷീര അതോറിറ്റി ഈ പുതിയ സംരംഭത്തെ പൂര്ണ്ണമായി പിന്തുണയ്ക്കുകയും സ്വാഗതം ചെയ്യുകയും ചെയ്യുന്നു എന്ന് സെക്രട്ടറി ദാര് പറഞ്ഞു.
ഖത്തറിലെ ഏറ്റവും വലിയ ഭക്ഷ്യ-പാല് ഉല്പ്പാദക സ്ഥാപനമാണ് ബലദ്ന. രാജ്യത്തെ മൊത്തം പാലുല്പ്പന്നങ്ങളുടെ 95 ശതമാനവും വിതരണം ചെയ്യുന്നു. 24,000 ഹോള്സ്റ്റീന് പശുക്കളും 1,650-ലധികം ജീവനക്കാരുമുണ്ട്.
ലോകോത്തര മാനേജ്മെന്റ് സംവിധാനങ്ങള് ഉപയോഗിച്ച് കാലാവസ്ഥാ-സ്വതന്ത്രമായി രൂപകല്പ്പന ചെയ്തിരിക്കുന്ന ഫിലിപ്പീന്സില് വലിയ തോതിലുള്ളതും പൂര്ണ്ണമായും സംയോജിപ്പിച്ചതുമായ ഡയറി സൗകര്യം സ്ഥാപിക്കാന് ബലദ്ന താല്പ്പര്യം പ്രകടിപ്പിച്ചു.
നിലവിലെ പ്രാദേശിക പാലുല്പ്പാദനം 26.71 ദശലക്ഷം ലിറ്ററില് നിന്ന് 120 ദശലക്ഷം ലിറ്ററാക്കി വര്ധിപ്പിക്കും. പ്രാരംഭ ഘട്ടത്തില് 2,000 പുതിയ തൊഴിലവസരങ്ങള് സൃഷ്ടിക്കാന് കഴിയും.
”ബലദ്ന പ്രോജക്റ്റിനായി സാധ്യമായ അഞ്ച് സ്ഥലങ്ങള് കാര്ഷിക വകുപ്പ് ഇതിനകം കണ്ടെത്തിയിട്ടുണ്ട്, ഫിലിപ്പീന്സിലെ സൈറ്റ് സന്ദര്ശനത്തിനായി അടുത്ത ഏതാനും ആഴ്ചകള്ക്കുള്ളില് ബലദ്ന ടീമിനെ സ്വാഗതം ചെയ്യുന്നു. എത്രയും വേഗം പ്രൊജക്ട് ആരംഭിക്കുന്നതിനാവശ്യമായ പിന്തുണ കാര്ഷിക വകുപ്പ് തുടര്ച്ചയായി നല്കും, ”ദാര് പറഞ്ഞു.
