ഖത്തറിലെ തിരഞ്ഞെടുത്ത പ്രദേശങ്ങളില് ഡ്രൈവറില്ലാത്ത ഇലക്ട്രിക് ടാക്സികളുടെ പ്രവര്ത്തന പരീക്ഷണവുമായി മൊവാസലാത്ത് രംഗത്ത്
ദോഹ. ഖത്തറിലെ തിരഞ്ഞെടുത്ത പ്രദേശങ്ങളില് ടൂറിസ്റ്റ്, സര്വീസ് റൂട്ടുകള് ഉള്ക്കൊള്ളുന്ന ലെവല് 4 ഓട്ടോണമസ് ഇലക്ട്രിക് ടാക്സികളുടെ പ്രവര്ത്തന പരീക്ഷണങ്ങള് മൊവാസലാത്ത് (കര്വ) ആരംഭിച്ചതായി ഗതാഗത മന്ത്രാലയം പ്രഖ്യാപിച്ചു.
മന്ത്രാലയവുമായി ഏകോപിപ്പിച്ച്, ഓട്ടോണമസ് ടാക്സികളുടെ രണ്ട് ഘട്ട പരീക്ഷണ ഓട്ടത്തിനുള്ള തയ്യാറെടുപ്പിനായി വരും കാലയളവില് കര്വ റൂട്ട് മാപ്പിംഗ് നടത്തും.
ആദ്യ ഘട്ടത്തില് ഒരു പ്രത്യേക സംഘം നിരീക്ഷിക്കുന്ന യാത്രക്കാരില്ലാതെ പരീക്ഷണ ഓട്ടങ്ങള് നടത്തും. രണ്ടാം ഘട്ടത്തില് ഡ്രൈവര് ഇല്ലാതെ യാത്രക്കാരുമായി പൂര്ണ്ണ തോതിലുള്ള പരീക്ഷണം നടക്കും, അടുത്ത വര്ഷം ആദ്യ പാദം വരെ ഇത് തുടരും. നിയന്ത്രണ ചട്ടക്കൂടുകള് സ്ഥാപിക്കുന്നതിനും ആവശ്യമായ അടിസ്ഥാന സൗകര്യങ്ങള് തയ്യാറാക്കുന്നതിനും പുറമെ, ഖത്തറിന്റെ വിശാലമായ ഭാവി സ്മാര്ട്ട് മൊബിലിറ്റി സംരംഭങ്ങളുടെ ഭാഗമായ സാങ്കേതികവിദ്യയുടെ സന്നദ്ധതയും പ്രവര്ത്തന കാര്യക്ഷമതയും വിലയിരുത്തുക എന്നതാണ് പരീക്ഷണങ്ങളുടെ ലക്ഷ്യം.
ഓട്ടോണമസ് ഇലക്ട്രിക് ബസ് പരീക്ഷണങ്ങളുടെ വിജയകരമായ ഫലങ്ങളെ അടിസ്ഥാനമാക്കിയാണ് ഈ പുതിയ പദ്ധതി .
പരീക്ഷണങ്ങളില് ഉപയോഗിക്കുന്ന ഓരോ ഓട്ടോണമസ് ടാക്സിയിലും ആറ് ലോംഗ്, മിഡ് റേഞ്ച് ക്യാമറകള്, നാല് റഡാറുകള്, നാല് ലിഡാര് യൂണിറ്റുകള് എന്നിവ സജ്ജീകരിച്ചിരിക്കുന്നു, ഇത് പ്രവര്ത്തന സമയത്ത് കൃത്യമായ കണ്ടെത്തലും നാവിഗേഷന് നിയന്ത്രണവും സാധ്യമാക്കുന്നു.
