റമദാനില്‍ ഉറക്കം ശ്രദ്ധിക്കണമെന്ന് പ്രൈമറി ഹെല്‍ത്ത് കെയര്‍ കോര്‍പ്പറേഷന്‍
അമാനുല്ല വടക്കാങ്ങര
ദോഹ: റമദാനില്‍ ജീവിതത്തിന്റെ ഷെഡ്യൂളുകള്‍ മാറുമ്പോള്‍ ഉറക്കത്തിന്റെ കാര്യം ശ്രദ്ധിക്കണമെന്ന് പ്രൈമറി ഹെല്‍ത്ത് കെയര്‍ കോര്‍പ്പറേഷന്‍ ഓര്‍മിപ്പിച്ചു. ശാരീരികവും മാനസികവുമായ ആരോഗ്യം പ്രോത്സാഹിപ്പിക്കുന്നതിന് മതിയായ ഉറക്കം ലഭിക്കേണ്ടതിന്റെ പ്രാധാന്യം പ്രൈമറി ഹെല്‍ത്ത് കെയര്‍ കോര്‍പ്പറേഷന്‍ (പിഎച്ച്‌സിസി) എടുത്തുപറഞ്ഞു, നല്ല ആരോഗ്യം ആസ്വദിക്കാന്‍ മുതിര്‍ന്നവര്‍ക്ക് ദിവസത്തില്‍ 6 മുതല്‍ 8 മണിക്കൂര്‍ വരെ ആവശ്യമാണ്.
വൈകി ഉണര്‍ന്നിരിക്കുന്നതും ഉറക്കമില്ലായ്മയും രോഗപ്രതിരോധ സംവിധാനത്തിന്റെ പ്രവര്‍ത്തനത്തെ പ്രതികൂലമായി ബാധിക്കുമെന്നും ഇത് അണുബാധയ്ക്കുള്ള ഉയര്‍ന്ന അപകടസാധ്യതയ്ക്കും ശ്വാസകോശ സംബന്ധമായ രോഗങ്ങള്‍ക്കും കാരണമാകുമെന്നും ഉമ്മു ഗുവൈലിന ഹെല്‍ത്ത് സെന്ററിലെ കണ്‍സള്‍ട്ടന്റ് ഫാമിലി മെഡിസിന്‍ ഡോ. മൂസ ബഷീര്‍ മന്‍സൂര്‍ പറഞ്ഞു. ഇത് നോര്‍പിനെഫ്രിന്‍, കോര്‍ട്ടിസോള്‍ തുടങ്ങിയ സ്‌ട്രെസ് ഹോര്‍മോണുകളുടെ പ്രകാശനത്തിന് കാരണമാകുമെന്നും പ്രത്യുല്‍പാദനശേഷി വര്‍ദ്ധിപ്പിക്കുന്ന ഹോര്‍മോണുകളുടെ സ്രവണം കുറയ്ക്കുമെന്നും അദ്ദേഹം കൂട്ടിച്ചേര്‍ത്തു.
വൈകി ഉണരുന്നത് വിശപ്പും സംതൃപ്തിയും നിയന്ത്രിക്കുന്ന ഹോര്‍മോണുകളെ ബാധിക്കുന്നു. അതിനാല്‍, ഉറക്കത്തിലെ മാറ്റങ്ങള്‍ ശരീരത്തിലെ കൊഴുപ്പ് സംഭരിക്കുന്നതോടൊപ്പം ടൈപ്പ് 2 പ്രമേഹത്തിനും അമിതവണ്ണത്തിനും സാധ്യത വര്‍ദ്ധിപ്പിക്കും.
