കോവിഡ് മരണങ്ങളെ ചില രക്തഗ്രൂപ്പുകളുമായി ബന്ധിപ്പിക്കുന്നതിന് തെളിവില്ല

അമാനല്ല വടക്കാങ്ങര

ദോഹ. ആഗോളതലത്തില്‍ സമൂഹത്തിന്റെ ചില കോണുകള്‍ക്കിടയില്‍ പ്രചരിക്കുന്ന ചില സിദ്ധാന്തങ്ങള്‍ക്കും വിശ്വാസങ്ങള്‍ക്കും വിരുദ്ധമായി, കോവിഡ് -19 മൂലമോ ചില രോഗികള്‍ക്കിടയിലെ അണുബാധയുടെ തീവ്രത മൂലമോ ഉണ്ടാകുന്ന ഏതെങ്കിലും മരണങ്ങളുമായി ചില രക്തഗ്രൂപ്പുകളെ ബന്ധിപ്പിക്കുന്നതിന് വ്യക്തമായ തെളിവുകളൊന്നും ഇല്ലെന്ന് ഖത്തറില്‍ നടത്തിയ ഒരു പഠനം കണ്ടെത്തി.

”എബിഒ രക്തഗ്രൂപ്പുകളും ഗുരുതരാവസ്ഥയിലുള്ള കോവിഡ് -19 രോഗികളിലെ പ്രതികൂലമായ ക്ലിനിക്കല്‍ ഫലങ്ങളും തമ്മില്‍ യാതൊരു ബന്ധവുമില്ലെന്ന് ഈ പഠനം വെളിപ്പെടുത്തി. ആര്‍എച്ച് നെഗറ്റീവ് രക്തഗ്രൂപ്പ്കാര്‍ക്ക് ആര്‍എച്ച് പോസിറ്റീവ് രക്തഗ്രൂപ്പുകാരെക്കാള്‍ മരണ സാധ്യത അല്‍പം കൂടുതലായേക്കുമെന്ന് ”ക്യൂ സയന്‍സ്.കോമില്‍ പ്രസിദ്ധീകരിച്ച പഠനം അഭിപ്രായപ്പെട്ടു.

”തീവ്രമായ അക്യൂട്ട് റെസ്പിറേറ്ററി സിന്‍ഡ്രോം കൊറോണ വൈറസ് 2 (സാര്‍സ്-കോവി-2) ബാധിച്ച രോഗികളില്‍ ഒരു ചെറിയ വിഭാഗം ഗുരുതരാവസ്ഥയിലാകുന്നു. വ്യക്തികളുടെ രക്തഗ്രൂപ്പ് അണുബാധയ്ക്കുള്ള അവരുടെ സംവേദനക്ഷമതയെ സ്വാധീനിച്ചേക്കാം. എന്നിരുന്നാലും ഗുരുതരമായ കോവിഡ് -19 ലെ രക്തഗ്രൂപ്പുകളും ക്ലിനിക്കല്‍ ഫലങ്ങളും തമ്മിലുള്ള ബന്ധം തെളിയിക്കപ്പെട്ടിട്ടില്ല. ഈ സാഹചര്യത്തിലാണ് ഗുരുതരമായ അസുഖമുള്ള കോവിഡ് -19 രോഗികളില്‍ രക്തഗ്രൂപ്പുകളും ക്ലിനിക്കല്‍ ഫലങ്ങളും തമ്മിലുള്ള ബന്ധത്തെക്കുറിച്ച് അന്വേഷിക്കാന്‍ ഞങ്ങള്‍ ഒരു പഠനം നടത്തി, ”ഗവേഷകര്‍ പഠനത്തില്‍ പറഞ്ഞു.

ഖത്തര്‍ ആസ്ഥാനമായുള്ള ഒരു കൂട്ടം ഗവേഷകരാണ് ഇക്കാര്യം വിശദമായ ഗവേഷണത്തിനും വിശകലനത്തിനും വിധേയമാക്കിയത്. ‘2020 മാര്‍ച്ച് 7 മുതല്‍ ജൂലൈ 15 വരെ ഹസം മെബൈരിക് ജനറല്‍ ഹോസ്പിറ്റലിലെ തീവ്രപരിചരണ വിഭാഗത്തില്‍ പ്രവേശിപ്പിക്കപ്പെട്ട കോവിഡ്-19 രോഗികളുടെ ഇലക്ട്രോണിക് ആരോഗ്യ രേഖകളാണ് പഠനത്തിന് ഉപയോഗിച്ചത്.