ഇന്ന് രാത്രി ഖത്തറില്‍ അപൂര്‍വമായ ഒരു സൂപ്പര്‍ ബ്ലൂ മൂണ്‍ ദൃശ്യമാകും
അമാനുല്ല വടക്കാങ്ങര
ദോഹ: ഇന്ന് രാത്രി ഖത്തറില്‍ അപൂര്‍വമായ ഒരു സൂപ്പര്‍ ബ്ലൂ മൂണ്‍ ദൃശ്യമാകും. ഓഗസ്റ്റ് അവസാനിക്കുമ്പോള്‍ ചന്ദ്രന്‍ അതിന്റെ ഏറ്റവും തിളക്കത്തില്‍ പ്രകാശിക്കും. ഖത്തറിലും ലോകമെമ്പാടും ഇന്ന് വൈകുന്നേരം അപൂര്‍വമായ ഒരു സൂപ്പര്‍ ബ്ലൂ മൂണ്‍ രാത്രി ആകാശത്തെ പ്രകാശിപ്പിക്കും.
ഖത്തര്‍ കലണ്ടര്‍ ഹൗസ് നല്‍കുന്ന വിവരമനുസരിച്ച്, ഒരേ മാസത്തിനുള്ളില്‍ സംഭവിക്കുന്ന രണ്ടാമത്തെ പൂര്‍ണ്ണചന്ദ്രനെയാണ് ‘ബ്ലൂ മൂണ്‍’ സൂചിപ്പിക്കുന്നത്. ആഗസ്റ്റ് ഒരു പൂര്‍ണ്ണ സൂപ്പര്‍മൂണില്‍ ആരംഭിച്ചു, മറ്റൊരു പൂര്‍ണ്ണ സൂപ്പര്‍മൂണില്‍ അവസാനിക്കും .ഇത് താരതമ്യേന അപൂര്‍വമായ ജ്യോതിശാസ്ത്ര സംഭവം.
ഇന്ന് വൈകുന്നേരം മുതല്‍ നാളെ സൂര്യോദയത്തിന് മുമ്പ്, ചന്ദ്രന്‍ വലുതും കൂടുതല്‍ തിളക്കവുമുള്ളതായിരിക്കുമെന്ന് ക്യുസിഎച്ച് പറഞ്ഞു. സൂപ്പര്‍മൂണിന് തന്നെ വലിപ്പം മാറില്ല, എന്നാല്‍ ഭ്രമണപഥത്തില്‍ ഭൂമിയോട് ഏറ്റവും അടുത്ത് നില്‍ക്കുന്നതിനാല്‍ അത് വലുതും തെളിച്ചമുള്ളതുമായി കാണപ്പെടും.
‘ബ്ലൂ മൂണ്‍’ സാധാരണ തൂവെള്ള-ചാര നിറത്തിലുള്ള പൗര്‍ണ്ണമി പോലെയായിരിക്കുമെന്നും അതിനെ വിളിക്കുന്നത് പോലെ നീലയായിരിക്കില്ലെന്നും ക്യുസിഎച്ച് വ്യക്തമാക്കി. ഇത് യഥാര്‍ത്ഥത്തില്‍ നിറത്തെയല്ല, മറിച്ച് അതിന്റെ ആവൃത്തിയെയാണ് സൂചിപ്പിക്കുന്നത്.
എന്തുകൊണ്ട് സൂപ്പര്‍ ബ്ലൂ മൂണ്‍?
നാസയുടെ അഭിപ്രായത്തില്‍, ഒരു കലണ്ടര്‍ മാസം രണ്ട് പൂര്‍ണ്ണ ചന്ദ്രന്മാരെ കാണുന്നുവെങ്കില്‍, രണ്ടാമത്തേതിനെ ബ്ലൂ മൂണ്‍ എന്ന് വിളിക്കുന്നു, ഒരു മാസത്തിനുള്ളില്‍ രണ്ട് സൂപ്പര്‍മൂണുകളെ ‘സൂപ്പര്‍ ബ്ലൂ മൂണ്‍’ ആക്കുന്നു.
ഇന്ന് വൈകുന്നേരത്തെ ‘ബ്ലൂ സൂപ്പര്‍മൂണ്‍’ ഈ വര്‍ഷത്തെ ഏറ്റവും വലുതും തിളക്കമുള്ളതുമായിരിക്കും. ഇന്ന് രാത്രി ഈ അപൂര്‍വ കാഴ്ച നഷ്ടമായാല്‍, നിങ്ങളുടെ അടുത്ത അവസരത്തിനായി ഒമ്പത് വര്‍ഷം കാത്തിരിക്കേണ്ടിവരും. അതിനാല്‍ അപൂര്‍വമായ ഈ കാഴ്ച നഷ്ടപ്പെടുത്താതിരിക്കുക, ഖത്തര്‍ കലണ്ടര്‍ ഹൗസ് പറഞ്ഞു.
