എ എഫ് സി ഏഷ്യന് കപ്പ് ഖത്തറിന്റെ എന്ട്രി പ്ലാറ്റ്ഫോമായും ഹയ്യ കാര്ഡ് സംവിധാനം പ്രവര്ത്തിക്കും
അമാനുല്ല വടക്കാങ്ങര
ദോഹ. 2024 ജനുവരി 12 മുതല് ഫെബ്രുവരി 10 വരെ ദോഹയില് നടക്കുന്ന എ എഫ് സി ഏഷ്യന് കപ്പ് ഖത്തറിന്റെ എന്ട്രി പ്ലാറ്റ്ഫോമായും ഹയ്യ കാര്ഡ് സംവിധാനം പ്രവര്ത്തിക്കുമെന്ന് ഹയ്യ പ്ലാറ്റ്ഫോം സിഇഒ സയീദ് അലി അല് കുവാരി പറഞ്ഞു. കഴിഞ്ഞ ദിവസം അല് റയ്യാന് ടിവിയോട് സംസാരിക്കവേയാണ് അദ്ദേഹം ഇക്കാര്യം പറഞ്ഞത്.
ഖത്തറിലെ എല്ലാ പരിപാടികള്ക്കും ഹയ്യ കാര്ഡ് ഉപയോഗിക്കാമെന്ന് അദ്ദേഹം പറഞ്ഞു. ”ഖത്തര് സന്ദര്ശിക്കാന് ആഗ്രഹിക്കുന്ന ഏതൊരാളും ഹയ്യ പ്ലാറ്റ്ഫോമില് അപേക്ഷിക്കുകയും ഉചിതമായ വിസ തിരഞ്ഞെടുക്കുകയും വേണം. എ എഫ് സി ഏഷ്യന് കപ്പ് ഖത്തര് 2023, വേള്ഡ് അക്വാട്ടിക്സ് ചാമ്പ്യന്ഷിപ്പ് – ദോഹ 2024, മറ്റ് ഇവന്റുകള് എന്നിവയ്ക്കുള്ള എന്ട്രികള് ഇതില് ഉള്പ്പെടുന്നു.
ഹയ്യ പ്ലാറ്റ്ഫോമില് ആരംഭിച്ച ടൂറിസ്റ്റ് വിസകള് വ്യവസ്ഥകള്ക്കനുസരിച്ച് ഉപയോഗിക്കാം, ”അദ്ദേഹം പറഞ്ഞു.
ഈ വര്ഷം ആദ്യമാണ് ഖത്തര് ടൂറിസം ഹയ്യ പ്ലാറ്റ്ഫോം നവീകരിച്ചത്. ഇത് ഖത്തറിലേക്ക് പ്രവേശിക്കുന്നതിന് വിസ ആവശ്യമുള്ള യാത്രക്കാര്ക്കുള്ള പോര്ട്ടലാക്കി. എല്ലാ വിനോദസഞ്ചാരികള്ക്കും രാജ്യത്തേക്ക് പ്രവേശിക്കുന്നതിനുള്ള രാജ്യത്തിന്റെ ഏക പോര്ട്ടലായി ഹയ്യ പ്ലാറ്റ്ഫോം മാറുമെന്ന് പ്രഖ്യാപിച്ചു.
മൂന്ന് പുതിയ വിഭാഗത്തിലുള്ള സന്ദര്ശകര്ക്ക് ഖത്തറിന്റെ ഇ-വിസയ്ക്ക് അര്ഹതയുണ്ട്. ഹയ്യ ഇ-വിസ സന്ദര്ശകരെ ദേശീയത, റെസിഡന്സി അല്ലെങ്കില് ഒരു യാത്രികന് ഇതിനകം ഉള്ള മറ്റ് അന്താരാഷ്ട്ര വിസ എന്നിവയുടെ അടിസ്ഥാനത്തില് തരംതിരിക്കും. എ1, എ2, എ3 എന്നിങ്ങനെയാണ് വിഭാഗങ്ങള്. മുമ്പത്തെ അറിയിപ്പുകള് പ്രകാരം, ഖത്തറിലേക്കുള്ള വിസ ഓണ്-അറൈവല് അല്ലെങ്കില് വിസ രഹിത പ്രവേശനത്തിന് യോഗ്യത നേടാത്ത എല്ലാ രാജ്യക്കാരും എ1 വിഭാഗത്തില് ഉള്പ്പെടുന്നു.
എ 2 വിഭാഗം എല്ലാ പ്രൊഫഷനുകളിലും ഉള്ള ജി സി സി നിവാസികള്ക്കുള്ളതാണ്. ഷെന്ഗന്, യുകെ, യുഎസ്, കാനഡ, ഓസ്ട്രേലിയ, ന്യൂസിലാന്ഡ് എന്നിവിടങ്ങളില് നിന്നുള്ള വിസയോ റെസിഡന്സിയോ ഉള്ള അന്താരാഷ്ട്ര സന്ദര്ശകര്ക്കുള്ളതാണ് എ 3 വിഭാഗം. അവര് ഖത്തറിന്റെ ഇ-വിസയ്ക്ക് യോഗ്യരായിരിക്കും. 30 ദിവസത്തില് കൂടുതല് താമസിക്കുന്നില്ലെങ്കില് എ 3 വിഭാഗത്തിന് ആരോഗ്യ ഇന്ഷുറന്സ് ആവശ്യമില്ല.
ഹയ്യ കാര്ഡ് എന്ന ആശയം ഫാന് വിസയില് നിന്ന് ടൂറിസ്റ്റ് വിസയിലേക്കും ആരാധകര്ക്കുള്ള പ്ലാറ്റ്ഫോമില് നിന്ന് ഖത്തറിലെ പരിപാടികള്ക്കുള്ള പ്ലാറ്റ്ഫോമിലേക്കും വികസിപ്പിച്ച പ്രക്രിയ വിജയകരമാണെന്ന് അല്-കുവാരി പറഞ്ഞു. ഇപ്പോള് ഖത്തറില് നടക്കുന്ന പല പരിപാടികളും ഹയ്യ പ്ലാറ്റ്ഫോമാണ് ഉപയോഗിക്കുന്നതെന്നും അദ്ദേഹം കൂട്ടിച്ചേര്ത്തു.
