ഡിസ്‌കവര്‍ ഖത്തര്‍ അറബിക് വെബ്‌സൈറ്റ് പ്രവര്‍ത്തന സജ്ജമായി

ഡോ. അമാനുല്ല വടക്കാങ്ങര

ദോഹ : അംഗീകൃത വാക്‌സിനേഷന്‍ പൂര്‍ത്തിയാക്കാതെ ഖത്തറിലേക്ക് തിരിച്ചുവരുന്നവര്‍ക്ക് ക്വാറന്റൈന്‍ ബുക്ക് ചെയ്യുന്നതിനുളള ഡിസ്‌കവര്‍ ഖത്തര്‍ അറബിക് വെബ്‌സൈറ്റ് പ്രവര്‍ത്തന സജ്ജമായി. ഇതുവരേയും ഇംഗ്‌ളീഷ് സൈറ്റ് മാത്രമാണ് ഉണ്ടായിരുന്നത്. കഴിഞ്ഞ മാസം തന്നെ അറബിക് വെബ്‌സൈറ്റ് ഉടന്‍ പ്രവര്‍ത്തന സജ്ജമാകുമെന്ന് ഖത്തര്‍ എയര്‍വേയ്‌സ് പ്രഖ്യാപിച്ചിരുന്നു.

ഖത്തര്‍ എയര്‍വേയ്‌സ് ഹോളിഡേയ്‌സിന് കീഴില്‍ പ്രവര്‍ത്തിക്കുന്ന ഡിസ്‌കവര്‍ ഖത്തറില്‍ നിരവധി അറബി സംസാരിക്കുന്ന ജീവനക്കാരേയും നിശ്ചയിച്ചിട്ടുണ്ട്.

മാര്‍ച്ച് മുതല്‍ ഖത്തറിലേക്ക് തിരിച്ചുവരുന്നവരുടെ ഒഴുക്ക് കൂടിയതോടെ ക്വാറന്റൈന്‍ ഹോട്ടലുകള്‍ക്ക് വലിയ ഡിമാന്റാണ് അനുഭവപ്പെടുന്നത്. മിക്ക ദിവസങ്ങളിലും കുറഞ്ഞ നിരക്കിലുള്ള ഹോട്ടലുകള്‍ ലഭ്യമായിരുന്നില്ല. ലോകത്തിന്റെ വിവിധ ഭാഗങ്ങളില്‍ നിന്നായി ആയയിരക്കണക്കിനാളുകളാണ് ക്വാറന്റൈന്‍ ബുക്ക് ചെയ്യുന്നതുമായി ബന്ധപ്പെട്ട് ഡിസ്‌കവര്‍ ഖത്തര്‍ സൈറ്റ് സന്ദര്‍ശിക്കുന്നത്.

ക്വാറന്റൈന്‍ സിസ്റ്റം തുടരുന്നതിനാല്‍ വരും മാസങ്ങളിലും ഡിസ്‌കവര്‍ ഖത്തറിന്റെ സൈറ്റില്‍ തിരക്ക് കൂടാനാണ് സാധ്യത. പൂര്‍ണാര്‍ഥത്തില്‍ അറബിക് വെബ്‌സൈറ്റ് പ്രവര്‍ത്തന സജ്ജമായതോടെ അറബ് ലോകത്തുനിന്നുള്ളവര്‍ക്ക് വലിയ സൗകര്യമാണ് .

ഡിസ്‌കവര്‍ ഖത്തറിന്റെ വെല്‍ക്കം ഹോം പാക്കേജുകള്‍ക്കായി 62 ഹോട്ടലുകളാണ് ഉളളത്. ഇവയില്‍ മൊത്തം പ്രതിദിനം 8,886 മുറികള്‍ ഉണ്ട്.

ഡിസ്‌കവര്‍ ഖത്തര്‍ വെല്‍ക്കം ഹോം ക്വാറന്റൈന്‍ പാക്കേജ് നിലവില്‍ ആഗസ്റ്റ് 31 വരെ ബുക്ക് ചെയ്യുവാനാണ് ഡിസ്‌കവര്‍ ഖത്തര്‍ വെബ്സൈറ്റില്‍ സൗകര്യമുള്ളത്.

https://www.qatarairwaysholidays.com/qa-ar/welcome-home-7-night-booking/overview