കാല്പന്തുകളി മഹാമേളയുടെ വളണ്ടിയറാവാനുള്ള അപേക്ഷകള് ജൂലൈ 31 വരെ മാത്രം
അമാനുല്ല വടക്കാങ്ങര
ദോഹ: കാല്പന്തുകളി മഹാമേളയുടെ വളണ്ടിയറാവാനുള്ള അപേക്ഷകള് ജൂലൈ 31 വരെ മാത്രം . ഫിഫ ലോകകപ്പ് ഖത്തര് 2022 വളണ്ടിയര് ആകാനുള്ള രജിസ്ട്രേഷന് ജൂലൈ 31 ഞായറാഴ്ച അവസാനിക്കുമെന്നും വ്യക്തിഗത അഭിമുഖങ്ങള് ഓഗസ്റ്റ് 13-നകം പൂര്ത്തിയാക്കുമെന്നും സംഘാടകര് അറിയിച്ചു.
നവംബര് 21 മുതല് ഡിസംബര് 18 വരെ എട്ട് അത്യാധുനിക സ്റ്റേഡിയങ്ങളിലായി നടക്കുന്ന മിഡില് ഈസ്റ്റിലെയും അറബ് ലോകത്തെയും ആദ്യ ഫിഫ ലോകകപ്പിനായി ഫിഫയും ഖത്തറും 20,000 വളണ്ടിയര്മാരെയാണ് റിക്രൂട്ട് ചെയ്യുന്നത്. 45 പ്രവര്ത്തന മേഖലകളെയും 30-ലധികം വ്യത്യസ്ത ഉത്തരവാദിത്തങ്ങളും നിര്വഹിക്കുന്ന വളണ്ടിയര്മാര് ടൂര്ണമെന്റ് പ്രവര്ത്തനങ്ങളുടെ പ്രധാന ഭാഗമായിരിക്കും.
ഈ വര്ഷം മാര്ച്ചില് കത്താറ ആംഫി തിയേറ്ററില് ആരംഭിച്ച ഫിഫ ലോകകപ്പ് ഖത്തര് 2022 വളണ്ടിയര് പ്രോഗ്രാം ദോഹയില് വോളണ്ടിയര് സെന്റര് ആരംഭിച്ച മെയ് പകുതി മുതല് 170 ലധികം രാജ്യങ്ങളില് നിന്നുള്ള ആയിരക്കണക്കിന് ആളുകളെ അഭിമുഖം നടത്തി കഴിഞ്ഞു.
സന്നദ്ധപ്രവര്ത്തനത്തില് താല്പ്പര്യമുള്ളവര്ക്ക് volunteer.fifa.com ല് രജിസ്റ്റര് ചെയ്ത് അപേക്ഷാ ഫോം പൂരിപ്പിക്കുക, ‘ടേക്ക് ഓണ് ദി ട്രയല്സ്’ (ഒരു ഓണ്ലൈന് ഗെയിമിഫൈഡ് വിലയിരുത്തല്) പ്ലേ ചെയ്യുക, അഭിമുഖം ബുക്ക് ചെയ്യുക എന്നിവ പൂര്ത്തിയാക്കി ഇനിയും അപേക്ഷിക്കാം
വളണ്ടിയര്മാര് 2022 ഒക്ടോബര് 1-നകം 18 വയസോ അതില് കൂടുതലോ പ്രായമുള്ളവരും ഇംഗ്ലീഷ് സംസാരിക്കുന്നവരും ടൂര്ണമെന്റിനിടെ കുറഞ്ഞത് 10 ഷിഫ്റ്റുകളിലെങ്കിലും സേവനം ചെയ്യാന് സന്നദ്ധരുമായിരിക്കണം. ചില വളണ്ടിയര് റോളുകള് ഒക്ടോബര് 1 മുതല് ആരംഭിക്കും.
