ഖരമാലിന്യ വേര്തിരിക്കല് പരിപാടിയുടെ നാലാം ഘട്ടത്തില് സര്ക്കാര് കെട്ടിടങ്ങള്, കായിക സൗകര്യങ്ങള് എന്നിവയും
അമാനുല്ല വടക്കാങ്ങര
ദോഹ. ഖരമാലിന്യ വേര്തിരിക്കല് പരിപാടിയുടെ നാലാമത്തെയും അവസാനത്തെയും ഘട്ടം എല്ലാ സര്ക്കാര്, അര്ദ്ധ സര്ക്കാര് കെട്ടിടങ്ങള്, സെന്ട്രല് ദോഹ, ദോഹ കോര്ണിഷ്, എല്ലാ സ്റ്റേഡിയങ്ങളും കായിക സൗകര്യങ്ങളും ഉള്ക്കൊള്ളുമെന്ന് അധികൃതര് വ്യക്തമാക്കി.
മുനിസിപ്പാലിറ്റി മന്ത്രാലയം, മുനിസിപ്പാലിറ്റികളില് നിന്നുള്ള നിരവധി ഉദ്യോഗസ്ഥരുടെയും പങ്കാളികളുടെയും വിവിധ സ്ഥാപനങ്ങളുടെ അഡ്മിനിസ്ട്രേഷനുകളുടെയും ക്ലീനിംഗ് കമ്പനികളുടെ പ്രതിനിധികളുടെയും സാന്നിധ്യത്തില് നാലാമത്തെയും അവസാനത്തെയും ഘട്ടം നടപ്പിലാക്കുന്നതിനെക്കുറിച്ചുള്ള യോഗം കഴിഞ്ഞ ദിവസം വിളിച്ചുചേര്ത്തതായി ഖത്തര് ന്യൂസ് ഏജന്സി റിപ്പോര്ട്ട് ചെയ്തു .
യോഗത്തില് പബ്ലിക് ക്ലീന്ലിനസ് ഡിപ്പാര്ട്ട്മെന്റ് ഡയറക്ടര് മഖ്ബൂല് മദൗര് അല്-ഷമ്മരി, മാലിന്യങ്ങള് ആന്തരികമായി തരംതിരിക്കേണ്ടതിന്റെ പ്രാധാന്യം ഊന്നിപ്പറയുകയും രണ്ട് ബിന് സമ്പ്രദായം അനുസരിച്ച് അത് ശരിയായി നടക്കുന്നുണ്ടെന്ന് ഉറപ്പാക്കാന് ബന്ധപ്പെട്ടവരോടാവശ്യപ്പെടുകയും ചെയ്തു.
ആദ്യത്തെ കണ്ടെയ്നര് ഖര പുനരുപയോഗം ചെയ്യാവുന്ന മാലിന്യങ്ങള്ക്കുള്ളതാണ്, രണ്ടാമത്തേത് ജൈവ മാലിന്യങ്ങള്ക്കുള്ളതാണ് (ഭക്ഷ്യ അവശിഷ്ടങ്ങള്). സോര്ട്ടിംഗ് പ്രക്രിയയുടെ ആവശ്യമുള്ള ലക്ഷ്യം നേടുന്നതിന് ബാഹ്യ സോര്ട്ടിംഗും 100% കൃത്യതയോടെ നടപ്പാക്കണമെന്ന് അദ്ദേഹം പറഞ്ഞു.
മുനിസിപ്പാലിറ്റി മന്ത്രാലയത്തിന്റെ കെട്ടിടങ്ങള്ക്കായി പുനരുപയോഗിക്കാവുന്ന വസ്തുക്കള് ശേഖരിക്കുന്നതിനുള്ള കണ്ടെയ്നറുകള് പൊതു ശുചിത്വ വകുപ്പ് ആദ്യം നല്കും.
