ജാസിം മുഹമ്മദ് അല്‍ ബുദൈവി പുതിയ ജി.സി.സി സെക്രട്ടറി ജനറല്‍
അമാനുല്ല വടക്കാങ്ങര
ദോഹ. ഗള്‍ഫ് കോപറേഷന്‍ കൗണ്‍സിലിന്റെ പുതിയ സെക്രട്ടറി ജനറലായി ജാസിം മുഹമ്മദ് അല്‍ ബുദൈവിയെ നിയമിച്ചു. സെക്രട്ടറി ജനറല്‍ ഡോ.നായിഫ് ഫലാഹ് മുബാറക് അല്‍-ഹജ്റഫ് സ്ഥാനമൊഴിയുന്ന ഒഴിവിലേക്കാണിത്. ഫെബ്രുവരി ഒന്നിന് അദ്ദേഹം ചുമതലയേല്‍ക്കും.
നിലവില്‍ വാഷിംഗ്ടണിലെ കുവൈത്ത് അംബാസഡറായ ജാസിം മുഹമ്മദ് അല്‍ ബുദൈവി 1991-ല്‍ യൂട്ടാ സര്‍വകലാശാലയില്‍ നിന്ന് ബിരുദം നേടി. 1992-ല്‍ വിദേശകാര്യ മന്ത്രാലയത്തില്‍ ഉപപ്രധാനമന്ത്രിയുടെയും വിദേശകാര്യ മന്ത്രിയുടെയും ഓഫീസില്‍ ഡിപ്ലോമാറ്റിക് അറ്റാച്ച് ആയി നിയമിതനായി. 1993-ല്‍ ഓക്‌സ്‌ഫോര്‍ഡ് സര്‍വകലാശാലയില്‍ നിന്ന് ഡിപ്ലോമാറ്റിക് സ്റ്റഡീസില്‍ ഡിപ്ലോമ നേടി.
സിയോളിലെ അംബാസഡറായി സേവനമനുഷ്ഠിക്കുമ്പോള്‍ ‘സോള്‍ സിറ്റി’ മാസികയും ‘എന്‍ഡിഎന്‍ ന്യൂസും’ അല്‍-ബുദൈവിയെ ആദരിച്ചിട്ടുണ്ട്. കൂടാതെ ദക്ഷിണ കൊറിയയും കുവൈത്തും തമ്മിലുള്ള ബന്ധം വികസിപ്പിക്കുന്നതിനുള്ള അദ്ദേഹത്തിന്റെ ശ്രമങ്ങള്‍ക്ക് ‘ബെസ്റ്റ് അംബാസഡര്‍’ അവാര്‍ഡും ലഭിച്ചു.
