പോഷകാഹാരം, ശുചിത്വം, സജീവമായ ജീവിതശൈലി എന്നിവയാണ് കുട്ടികളുടെ ആരോഗ്യത്തിന്റെ താക്കോല്‍
ദോഹ: ഒരു നീണ്ട വേനല്‍ അവധിക്ക് ശേഷം കുട്ടികള്‍ സ്‌കൂളിലേക്ക് മടങ്ങുമ്പോള്‍, പൊതുവായ നിരവധി ആരോഗ്യ പ്രശ്നങ്ങള്‍ രക്ഷിതാക്കള്‍ ശ്രദ്ധിക്കണമെന്നും കുട്ടികളുടെ മാനസികവും ശാരീരികവുമായ ക്ഷേമം നിലനിര്‍ത്തണമെന്നും ആരോഗ്യ വിദഗ്ധര്‍ അഭിപ്രായപ്പെടുന്നു. പോഷകാഹാരം, ശുചിത്വം, സജീവമായ ജീവിതശൈലി എന്നിവയാണ് കുട്ടികളുടെ ആരോഗ്യത്തിന്റെ താക്കോല്‍. ഒരു ഷെഡ്യൂള്‍ മാറ്റം ഉറക്കത്തെ തടസ്സപ്പെടുത്തിയേക്കാം. അതിനാല്‍ മതിയായ വിശ്രമം ഉറപ്പാക്കുന്നത് നിര്‍ണായകമാണ്. കുട്ടികള്‍ക്ക് സൂര്യപ്രകാശം ഏല്‍ക്കുന്നത് വര്‍ധിച്ചിട്ടുണ്ടാകാം, ചര്‍മ്മ സംരക്ഷണവും ജലാംശവും പ്രധാനമാണ്.
സോപ്പും വെള്ളവും ഉപയോഗിച്ച് ഇടയ്ക്കിടെ കൈകഴുകുന്നത് പ്രോത്സാഹിപ്പിക്കുക, ശരിയായ ചുമ, തുമ്മല്‍ മര്യാദകള്‍ പഠിപ്പിക്കുക, രോഗികളുമായുള്ള അടുത്ത സമ്പര്‍ക്കം ഒഴിവാക്കുക എന്നിവയിലൂടെ ജലദോഷം, പനി തുടങ്ങിയ സാധാരണ രോഗങ്ങള്‍ പടരുന്നത് തടയാന്‍ മാതാപിതാക്കള്‍ക്ക് മുന്‍കൈയെടുക്കാന്‍ കഴിയും.
