നാഷണല് ഹെല്ത്ത് ഇന്സിഡന്റ് കമാന്ഡ് സെന്റര് ആരോഗ്യ മന്ത്രി സന്ദര്ശിച്ചു
ഡോ. അമാനുല്ല വടക്കാങ്ങര
ദോഹ: ഹമദ് മെഡിക്കല് കോര്പ്പറേഷന്റെ ആംബുലന്സ് സര്വീസ് ആസ്ഥാനത്തെ നാഷണല് ഹെല്ത്ത് ഇന്സിഡന്റ് കമാന്ഡ് സെന്റര് (എന്എച്ച്ഐസിസി) പൊതുജനാരോഗ്യ മന്ത്രി ഡോ. ഹനാന് മുഹമ്മദ് അല് കുവാരി സന്ദര്ശിച്ചു. സന്ദര്ശന വേളയില്, നിത്യവും 24 മണിക്കൂറും പ്രവര്ത്തിക്കുന്ന കേന്ദ്രത്തിലെ ജോലിയുടെ പുരോഗതി മന്ത്രി പരിശോധിക്കുകയും എച്ച്എംസി, പ്രൈമറി ഹെല്ത്ത് കെയര് കോര്പ്പറേഷന് എന്നിവയില് നിന്നുള്ള ഡ്യൂട്ടിയിലുള്ള ടീമുകളുമായി കൂടിക്കാഴ്ച നടത്തുകയും ചെയ്തു.
കോവിഡ് പാന്ഡെമിക്കിനോടുള്ള ആരോഗ്യസംരക്ഷണ സംവിധാനത്തിന്റെ പ്രതികരണത്തെ ഏകോപിപ്പിച്ച് നാഷണല് ഹെല്ത്ത് ഇന്സിഡന്റ് കമാന്ഡ് സെന്റര് പൊതുജനാരോഗ്യ മന്ത്രാലയവും ഖത്തറിലെ മറ്റ് പ്രധാന ഏജന്സികളുമായി സഹകരിച്ച് പ്രവര്ത്തിക്കുന്നു.
കോവിഡ് ബെഡ് മാനേജ്മെന്റ്, ആശുപത്രി ശേഷി തന്ത്രം എന്നിവ നാഷണല് ഹെല്ത്ത് ഇന്സിഡന്റ് കമാന്ഡ് സെന്റര് മേല്നോട്ടം വഹിക്കുന്നു. ആരോഗ്യസംരക്ഷണം ആവശ്യമുള്ള എല്ലാ കോവിഡ് രോഗികള്ക്കും ഉയര്ന്ന നിലവാരമുള്ള ചികിത്സ നല്കാന് ആരോഗ്യസംരക്ഷണ സംവിധാനത്തിന് മതിയായ ശേഷിയുണ്ടെന്ന് ഈ ഹബ് ഉറപ്പാക്കുന്നു.
കോവിഡ് കേസുകളുടെ എണ്ണം വര്ദ്ധിച്ചുകൊണ്ടിരിക്കുമ്പോള്, നമ്മുടെ കോവിഡ് സ്ട്രാറ്റജിയും പ്രതികരണത്തെയും നിരീക്ഷിക്കുകയും ഏകോപിപ്പിക്കുകയും ചെയ്യുന്ന ഇന്റലിജന്സ് ഹബ് എന്ന നിലയില് നാഷണല് ഹെല്ത്ത് ഇന്സിഡന്റ് കമാന്ഡ് സെന്റര് ഒരു പ്രധാന പങ്ക് വഹിക്കുന്നു. ഈ അവശ്യവും ജീവന് രക്ഷിക്കുന്നതുമായ ജോലികളില് ഭൂരിഭാഗവും തിരശ്ശീലയ്ക്ക് പിന്നിലാണെങ്കിലും നമ്മുടെ ആരോഗ്യ വ്യവസ്ഥയുടെ ദൈനംദിന പ്രവര്ത്തനത്തിന് ഇത് അത്യന്താപേക്ഷിതമാണ്, ”ഡോ. അല് കുവാരി വിശദീകരിച്ചു.
‘കോവിഡ് രംഗത്തും ഞങ്ങളെ വെല്ലുവിളിക്കുന്നത് തുടരുകയാണ്, എന്നാല് സിസ്റ്റത്തിലുടനീളമുള്ള ഞങ്ങളുടെ ആരോഗ്യ പരിപാലന തൊഴിലാളികള് ഈ പകര്ച്ചവ്യാധിക്കെതിരെ അചഞ്ചലമായ പ്രതിബദ്ധതയോടെ പ്രതിരോധിക്കുകയാണ്.
ആശുപത്രികളിലെയും മെഡിക്കല് സെന്ററുകളിലെയും ഞങ്ങളുടെ ക്ലിനിക്കല്, സപ്പോര്ട്ട് സ്റ്റാഫ് എല്ലാ കോവിഡ്, കോവിഡേതര രോഗികള്ക്കും ഉയര്ന്ന നിലവാരത്തിലുള്ള പരിചരണം ലഭിക്കുന്നുണ്ടെന്ന് ഉറപ്പുവരുത്താന് പ്രവര്ത്തിക്കുന്നു. അതേസമയം, നൂറുകണക്കിന് ആരോഗ്യ സംരക്ഷണ വിദഗ്ധര് ഒരു ദിവസം 25,000 പേര്ക്ക് പ്രതിരോധ കുത്തിവയ്പ്പ് നല്കാന് കഠിനമായി പരിശ്രമിക്കുന്നുണ്ട്.
നിങ്ങളുടെ അശ്രാന്ത പരിശ്രമത്തിനും അര്പ്പണബോധത്തിനും എല്ലാ ആരോഗ്യ പ്രവര്ത്തകര്ക്കും മുന്നിര പ്രവര്ത്തകര്ക്കും നന്ദി. ആരോഗ്യമേഖലയിലുടനീളം നടക്കുന്ന എല്ലാ പ്രവര്ത്തനങ്ങളിലും ഞാന് അഭിമാനിക്കുന്നു, അവരുടെ ശ്രദ്ധയും അര്പ്പണബോധവും നമ്മുടെ ആരോഗ്യ വ്യവസ്ഥ ഈ അധിക ഡിമാന്റ് നിറവേറ്റാന് സജ്ജമാണെന്ന് തെളിയിക്കുകയാണെന്ന് മന്ത്രി പറഞ്ഞു.
