‘മെയ്ഡ് ഇന്‍ ഖത്തര്‍’ പ്രദര്‍ശനത്തില്‍ 450 കമ്പനികള്‍ പങ്കെടുക്കും
അമാനുല്ല വടക്കാങ്ങര
ദോഹ: വാണിജ്യ വ്യവസായ മന്ത്രാലയത്തിന്റെ സഹകരണത്തോടെ ഖത്തര്‍ ചേംബര്‍ ദോഹ എക്സിബിഷന്‍ ആന്‍ഡ് കണ്‍വെന്‍ഷന്‍ സെന്ററില്‍ നവംബര്‍ 29 മുതല്‍ ഡിസംബര്‍ 2 വരെ സംഘടിപ്പിക്കുന്ന മെയ്ഡ് ഇന്‍ ഖത്തര്‍ എക്സിബിഷന്റെ ഒമ്പതാം പതിപ്പില്‍ 450 കമ്പനികള്‍ പങ്കെടുക്കുമെന്ന് ഖത്തര്‍ ചേംബര്‍ ചെയര്‍മാനും മെയ്ഡ് ഇന്‍ ഖത്തര്‍ എക്സിബിഷന്‍ ഹയര്‍ കമ്മിറ്റി ചെയര്‍മാനുമായ ശൈഖ് ഖലീഫ ബിന്‍ ജാസിം അല്‍താനി പറഞ്ഞു. എക്സ്പോയ്ക്കുള്ള എല്ലാ ഒരുക്കങ്ങളും പൂര്‍ത്തിയായതായും എക്സിബിഷനില്‍ വ്യാവസായിക കമ്പനികളുടെ വിപുലമായ പങ്കാളിത്തം ഉണ്ടായതായും അദ്ദേഹം പറഞ്ഞു.
ഫര്‍ണിച്ചര്‍, ഭക്ഷണം, പെട്രോകെമിക്കല്‍സ്, സേവനങ്ങള്‍, ചെറുകിട ഇടത്തരം വ്യവസായങ്ങള്‍, വിവിധ വ്യവസായങ്ങള്‍ എന്നിങ്ങനെ ആറ് മേഖലകളിലായാണ് പ്രധാനമായും കമ്പനികള്‍ പങ്കെടുക്കുന്നത്. 30,000 ചതുരശ്ര മീറ്റര്‍ വിസ്തൃതിയിലാണ് പ്രദര്‍ശനം നടക്കുക.
പ്രാദേശിക വ്യവസായത്തിന്റെ വികസനവുമായി ബന്ധപ്പെട്ട പ്രശ്നങ്ങളും തടസ്സങ്ങളും വിശകലനം ചെയ്യുന്ന പാനല്‍ ചര്‍ച്ചകളും പ്രദര്‍ശനത്തോടൊപ്പം നടക്കും.
വാണിജ്യ വ്യവസായ മന്ത്രാലയം, ഖത്തര്‍ വികസന ബാങ്ക് (ക്യുഡിബി), ഖത്തര്‍ ജനറല്‍ ഓര്‍ഗനൈസേഷന്‍ ഫോര്‍ സ്റ്റാന്‍ഡേര്‍ഡ് ആന്‍ഡ് മെട്രോളജി, ഇന്‍വെസ്റ്റ്മെന്റ് പ്രൊമോഷന്‍ ഏജന്‍സി ഖത്തര്‍ (ഐപിഎ ഖത്തര്‍),ഖത്തര്‍ ഫ്രീ സോണ്‍സ് അതോറിറ്റി, ഖത്തര്‍ ചേംബര്‍ എന്നിവിടങ്ങളില്‍ നിന്നുള്ള പ്രഭാഷകര്‍ പങ്കെടുക്കുന്ന ഖത്തറിലെ വ്യവസായത്തിന്റെ ഭാവി എന്ന തലക്കെട്ടിലുള്ള ഇന്ററാക്ടീവ് സെഷന്‍ ആദ്യ ദിനത്തില്‍ നടക്കുമെന്ന് അദ്ദേഹം പറഞ്ഞു. , .
രണ്ടാം ദിവസം മൂന്ന് സെമിനാറുകള്‍ നടക്കും. ആദ്യ സെമിനാറില്‍ ഖത്തര്‍ എനര്‍ജിയില്‍ നിന്നുള്ള വിദഗ്ധര്‍ പ്രാദേശികവല്‍ക്കരണത്തെ കേന്ദ്രീകരിച്ച് സംസാരിക്കും. രണ്ടാമത്തേതില്‍ ധനമന്ത്രാലയം, പൊതുമരാമത്ത് അതോറിറ്റി, കഹ്റമ എന്നിവിടങ്ങളില്‍ നിന്നുള്ള പ്രസംഗകരും മൂന്നാമത്തേതില്‍ കത്താറ ഹോസ്പിറ്റാലിറ്റിയില്‍ നിന്നുള്ള പ്രസംഗകരുമാണ് വിഷയം കൈകാര്യം ചെയ്യുക.
മൂന്നാം ദിവസം ഖത്തറി സംരംഭകരെ പിന്തുണയ്ക്കുന്നതിനുള്ള നിക്ഷേപ സെമിനാറും അവസാന ദിവസം ഖത്തര്‍ സയന്‍സ് & ടെക്‌നോളജി പാര്‍ക്ക് (ക്യുഎസ്ടിപി), ക്യുഡിബി, ജിഎസ്1 ഖത്തര്‍ എന്നിവിടങ്ങളില്‍ നിന്നുള്ള സ്പീക്കറുകളുമായുള്ള സംവേദനാത്മക സെമിനാറും നടക്കും.
വ്യാവസായിക മേഖലയിലെ ഏറ്റവും പുതിയ ഉല്‍പ്പന്നങ്ങളെയും സേവനങ്ങളെയും കുറിച്ചുള്ള ഉള്‍ക്കാഴ്ചകള്‍ സന്ദര്‍ശകര്‍ക്ക് ലഭ്യമാക്കുകയാണ് എക്സ്പോ ലക്ഷ്യമിടുന്നത്. പങ്കെടുക്കുന്നവര്‍ക്ക് വ്യവസായ മേഖലയിലെ വിദഗ്ധരുമായും നിക്ഷേപകരുമായും ഇടപഴകാനും രാജ്യത്ത് പ്രവര്‍ത്തിക്കുന്ന വിജയകരമായ കമ്പനികളെ പരിചയപ്പെടാനും അവസരം ലഭിക്കും.
ഖത്തരി വ്യവസായം മെച്ചപ്പെടുത്തുക, വ്യാവസായിക വികസനത്തിനായുള്ള രാജ്യത്തിന്റെ ശ്രമങ്ങളെ പിന്തുണയ്ക്കുക, ആഭ്യന്തരമായും ആഗോളതലത്തിലും ഖത്തരി ഉല്‍പന്നങ്ങളെയും വ്യവസായത്തെയും പ്രോത്സാഹിപ്പിക്കുക, പ്രാദേശിക ഉല്‍പ്പന്നങ്ങളുടെ വിനിയോഗം പ്രോത്സാഹിപ്പിക്കുക, ഇറക്കുമതി ചെയ്യുന്ന ഇനങ്ങളെ ആശ്രയിക്കുന്നത് കുറയ്ക്കുക, വ്യാവസായിക പദ്ധതികളില്‍ നിക്ഷേപം നടത്താന്‍ നിക്ഷേപകരെ പ്രേരിപ്പിക്കുക എന്നിവയാണ് പ്രദര്‍ശനം ലക്ഷ്യമിടുന്നത്.
