റെക്കോര്‍ഡ് സൃഷ്ടിച്ച് എ എഫ് സി ഏഷ്യന്‍ കപ്പ് ഖത്തര്‍
അമാനുല്ല വടക്കാങ്ങര
ദോഹ: കൂടുതലാളുകള്‍ കളികാണാനെത്തി റെക്കോര്‍ഡ് സൃഷ്ടിച്ച് എ എഫ് സി ഏഷ്യന്‍ കപ്പ് ഖത്തര്‍ . ഖത്തറില്‍ നടന്നുവരുന്ന പതിനെട്ടാമത് എ എഫ് സി ഏഷ്യന്‍ കപ്പിലെ റൗണ്ട് ഓഫ് 16 മല്‍സരത്തില്‍ ഇന്നലെ പലസ്തീനെതിരെ നിലവിലെ ചാമ്പ്യന്മാരായ ഖത്തര്‍ വിജയിക്കുന്നതിന് സാക്ഷ്യം വഹിക്കാന്‍ 63,753 ആരാധകര്‍ അല്‍ ബൈത്ത് സ്റ്റേഡിയത്തില്‍ തിങ്ങിനിറഞ്ഞതോടെയാണ് എഎഫ്സി ഏഷ്യന്‍ കപ്പ് ഖത്തര്‍ 2023 1.06 മില്യണ്‍ ഹാജര്‍ റെക്കോര്‍ഡ് സൃഷ്ടിച്ചത്. 2004-ല്‍ ചൈനയില്‍ നടന്നപ്പോള്‍ സ്ഥാപിച്ച 1.04 മില്യണ്‍ പ്രേക്ഷകരുടെ റെക്കോര്‍ഡാണ് ഏഷ്യയുടെ കിരീട രത്‌നത്തിന്റെ 18-ാം പതിപ്പ് ഔദ്യോഗികമായി മറികടന്നത്. ”തുടക്കം മുതല്‍, ടൂര്‍ണമെന്റിന്റെ ചരിത്രത്തിലെ ഏറ്റവും ആക്സസ് ചെയ്യാവുന്നതും ആകര്‍ഷകവുമായ പതിപ്പായി എഎഫ്സി ഏഷ്യന്‍ കപ്പ് ഖത്തര്‍ 2023 സ്ഥാനം പിടിക്കുമെന്ന് ഞങ്ങള്‍ക്ക് അറിയാമായിരുന്നു. കമ്മ്യൂണിറ്റികളെ ഒന്നിപ്പിക്കാനുള്ള അനിഷേധ്യമായ ശക്തി ഫുട്ബോളിന് ഉണ്ട്. ഏഷ്യയിലെ ഏറ്റവും അഭിമാനകരമായ വേദിയൊരുക്കിയാണ് ഖത്തര്‍ എ എഫ് സി ഏഷ്യന്‍ കപ്പിന് ആതിഥ്യമരുളുന്നത്, ഏഷ്യന്‍ ഫുട്‌ബോള്‍ കോണ്‍ഫെഡറേഷന്‍ (എഎഫ്സി) ജനറല്‍ സെക്രട്ടറി ഡാറ്റക് സെരി വിന്‍ഡ്സര്‍ ജോണ്‍ പറഞ്ഞു
