പലസ്തീന്‍ വിഷയം ഖത്തറിന്റെ നടപടി മാതൃകാപരം :ക്യു.കെ.ഐ.സി
ദോഹ:കൊളോണിയല്‍ ശക്തികളുടെ സഹായത്തോടെ നടക്കുന്ന സയണിസ്റ്റ് അധിനിവേശത്തിനെതിരെയുളള പലസ്തീന്‍ ജനതയുടെ പോരട്ടം നിലനില്‍പിന്റേതാണെന്നും, പ്രദേശത്ത് ശക്തമായിക്കൊണ്ടിരിക്കുന്ന യുദ്ധസാഹചര്യം അവസാനിപ്പിക്കാന്‍ ലോകനേതാക്കള്‍ ഫലപ്രദമായി ഇടപെടണമെന്നും ഖത്തര്‍ കേരള ഇസ് ലാഹി സെന്റര്‍ സംഘടിപ്പിച്ച വിസ്ഡം ഡെ സംഗമങ്ങള്‍ അഭിപ്രായപ്പെട്ടു. പലസ്തീന്‍ വിഷയം ഖത്തറിന്റെ നടപടി മാതൃകാപരമാണെന്ന് സംഗമങ്ങള്‍ വിലയിരുത്തി.
തങ്ങളുടെ മാതൃരാജ്യത്ത് സമാധാനപരമായി ജീവിക്കാന്‍ പലസ്തീനികള്‍ പോരാടിക്കൊണ്ടിരിക്കുകയാണ്. സയണിസ്റ്റുകളുടെ അധിനിവേശത്തിനെതിരെയുള്ള കാലങ്ങളായുള്ള പോരാട്ടത്തിന് അറുതിവരുത്താന്‍ ബന്ധപ്പെട്ടവര്‍ ശ്രദ്ദിക്കണമെന്നും വിഷയത്തില്‍ ഖത്തറിന്റെ ഇടപെടല്‍ സ്വാഗതാര്‍ഹമാണെന്നും സംഗമം കൂട്ടിച്ചേര്‍ത്തു.
ഖത്തര്‍ കേരള ഇസ് ലാഹി സെന്ററിന്റെ വിവിധ പ്രവര്‍ത്തനങ്ങള്‍ക്ക് ഉണര്‍വ്വ് പകര്‍ന്ന വിസ്ഡം ഡെ സംഗമങ്ങള്‍ മതമനുസരിച്ച് ജീവിക്കുന്നവരെ പോലും തട്ടമഴിപ്പിക്കാന്‍ ശ്രമിക്കുന്ന നവനാസ്തിക- ലിബറലിസത്തിന്റ കപടമുഖം തിരിച്ചറിഞ്ഞു സമൂഹത്തെ ബോധവത്കരിക്കാന്‍ എല്ലാവരും മുന്നോട്ടു വരണമെന്നും, പ്രയാസങ്ങക്കിടയിലും സത്യസന്ദേശ പ്രബോധന പ്രവര്‍ത്തനം നിലക്കാതെ മുന്നോട്ട് കൊണ്ട് പോകേണ്ട ഉത്തരവാദിത്തം നാം നിര്‍വഹിക്കണമെന്നും പ്രവര്‍ത്തകരെ ഉണര്‍ത്തി.
നന്മയുടെ വാഹകരാവാനും പ്രസന്ധികളില്‍ തളരാതെ മുന്നോട്ടു പോവാനും സാധിക്കണമെന്നും ‘നന്മയില്‍ ഉറച്ച് നില്‍ക്കുക’ എന്ന പ്രമേയത്തില്‍ മത്വാര്‍ ഖദീം,ഹിലാല്‍,സലത്ത,ബിന്‍ മഹ്‌മൂദ്, ഐന്‍ ഖാലിദ്,മൈദര്‍ ,ഇന്‍ഡസ്ട്രിയല്‍ ഏരിയ,ബിന്‍ ഉംറാന്‍, വക്‌റ, മമ്മൂറ എന്നീ മേഖലകളില്‍ നടന്ന സംഗമം പ്രവര്‍ത്തകരെ ഉണര്‍ത്തി. പരിപാടിയില്‍ വിസ്ഡം ഇസ് ലാമിക് ഓര്‍ഗനൈസേഷന്‍ ജനറല്‍ സെക്രട്ടറി ടി.കെ അഷ്റഫിന്റെ സന്ദേശം പ്രവര്‍ത്തകര്‍ക്ക് ഉണര്‍വ്വേകി.
ക്യു.കെ.ഐ.സി യുടെ പ്രവര്‍ത്തനങ്ങളെ പറ്റി കൂടുതല്‍ അറിയാന്‍ 60004485 എന്ന നമ്പറില്‍ ബന്ധപ്പെടാമെന്നും ഭാരവാഹികള്‍ അറിയിച്ചു. പരിപാടികള്‍ക്കു ഖത്തര്‍ കേരള ഇസ് ലാഹി സെന്റര്‍ ജനറല്‍ സെക്രട്ടറി സലാഹുദ്ധീന്‍ സലാഹി , പ്രസിഡന്റ് മുജീബ് റഹ്‌മാന്‍ മിശ്കാത്തി എന്നിവര്‍ നേതൃത്വം നല്‍കി.
