വിഷു-ഈസ്റ്റര് ഫിയസ്റ്റ 2026 വൈവിധ്യമാര്ന്ന കലാസാംസ്കാരിക പരിപാടികളോടെ വര്ണ്ണാഭമായി ആഘോഷിച്ച് ഗ്ലോബല് റിഥം കള്ച്ചറല് ക്ലബ്ബ്
സംസ്കാരങ്ങളെ കോര്ത്തിണക്കി സൗഹൃദം വളര്ത്തുക എന്ന ക്ലബ്ബിന്റെ മഹത്തായ ലക്ഷ്യം മുന്നിര്ത്തി സംഘടിപ്പിച്ച ഈ സംഗമം, അംഗങ്ങള്ക്കും കുടുംബങ്ങള്ക്കും ഒത്തുചേരാനുള്ള ഹൃദ്യമായ വേദിയായി മാറി.
ആഘോഷരാത്രിയിലെ ഏറ്റവും ആകര്ഷകമായ ഇനം പ്രസിഡന്റ് റോഷ്നി കൃഷ്ണന്റെ ശിക്ഷണത്തില് അണിയിച്ചൊരുക്കിയ കുട്ടികളുടെ ഫാഷന് ഷോ ആയിരുന്നു. വളരെ ചുരുങ്ങിയ പരിശീലനം കൊണ്ട് കുട്ടികള് കാഴ്ചവെച്ച പ്രകടനം പ്രൊഫഷണല് ഷോകളെ വെല്ലുന്നതായിരുന്നു. റോഷ്നി കൃഷ്ണന്റെ ക്രിയാത്മകമായ നേതൃത്വവും കുട്ടികളുടെ ആവേശവും ഒത്തുചേര്ന്നപ്പോള് വേദിയില് അരങ്ങേറിയത് വിസ്മയിപ്പിക്കുന്ന ഒരു കാഴ്ചയായിരുന്നു. സദസ്സിനെ ഒന്നടങ്കം ആവേശത്തിലാഴ്ത്തിയ ഈ പ്രകടനം പരിപാടിയുടെ മാറ്റ് കൂട്ടുകയല്ല, മറിച്ച് അതൊരു പുതിയ ചരിത്രം തന്നെ കുറിക്കുകയായിരുന്നു. കുട്ടികളുടെ ഈ അവിസ്മരണീയമായ പെര്ഫോമന്സ് ഗ്രൂപ്പിന്റെ വരാനിരിക്കുന്ന വലിയ നേട്ടങ്ങളുടെ അടയാളമായി മാറി.
സാന്വി പ്രജോഷിന്റെ ഭരതനാട്യം അരങ്ങേറ്റം പരിപാടികളില് ശ്രദ്ധേയമായി. ക്ലാസിക്കല് കലയുടെ തനിമയും അച്ചടക്കവും ഒത്തുചേര്ന്ന ഈ പ്രകടനം കാണികളെ ഏറെ വിസ്മയിപ്പിച്ചു. കലയോടുള്ള അര്പ്പണബോധം വിളിച്ചോതിയ ഈ നിമിഷം ജി.ആര്.സി.സി. യെ സംബന്ധിച്ചിടത്തോളം ഏറെ അഭിമാനകരമായിരുന്നു. തുടര്ന്ന് നടന്ന ഗ്രൂപ്പ് ഡാന്സുകളും സോളോ പെര്ഫോമന്സുകളും ചടുലമായ നൃത്തച്ചുവടുകള് കൊണ്ട് വേദിയില് ഉന്മേഷം നിറച്ചു. പാട്ടും നൃത്തവും കോര്ത്തിണക്കിയുള്ള ഫ്യൂഷന് പെര്ഫോമന്സുകള്ക്ക് കാണികളില് നിന്ന് വലിയ പ്രോത്സാഹനമാണ് ലഭിച്ചത്.
വര്ണ്ണപ്പെരുന്നാള് ക്രാഫ്റ്റ് കാറ്റ് മത്സരത്തില് വിധികര്ത്താവായ ചിത്രകാരന് വാസു വാണിമേലിനെ ആദരിക്കുകയും ഉപഹാരം കൈമാറുകയിനം ചെയ്യുകയും ചെയ്തു .
സംഗീതത്തിന് മുന്തൂക്കം നല്കിയ ചടങ്ങില് പ്രിയപ്പെട്ട ഗായകര് അവതരിപ്പിച്ച മെലഡികളും ഫാസ്റ്റ് നമ്പറുകളും ആഘോഷത്തിന്റെ മാറ്റുകൂട്ടി. ക്ലബ്ബിന്റെ പുതിയ അഡ്മിനിസ്ട്രേറ്റീവ് കമ്മിറ്റി അംഗങ്ങളെ പരിചയപ്പെടുത്തുകയും അവരെ ആദരിക്കുകയും ചെയ്തതായിരുന്നു മറ്റൊരു പ്രധാന ചടങ്ങ്. വരാനിരിക്കുന്ന പ്രവര്ത്തനങ്ങളില് പുതിയ ഭാരവാഹികള്ക്ക് എല്ലാവിധ പിന്തുണയും സഹകരണവും അംഗങ്ങള് വാഗ്ദാനം ചെയ്തു. കുട്ടികള്ക്കായി സംഘടിപ്പിച്ച പ്രത്യേക മത്സരങ്ങളും ഗെയിമുകളും ആഘോഷത്തെ കൂടുതല് സജീവവും എല്ലാവരെയും ഉള്ക്കൊള്ളുന്നതുമാക്കി മാറ്റി. വിഭവസമൃദ്ധമായ ഡിന്നറോടെ സമാപിച്ച ഈ വിഷു-ഈസ്റ്റര് സംഗമം സൗഹൃദങ്ങള് പുതുക്കാനും ഐക്യത്തിന്റെ സന്ദേശം പങ്കുവെക്കാനുമുള്ള അവിസ്മരണീയമായ ഒരേടായി മാറി.
വേദിയില് വിസ്മയങ്ങള് തീര്ത്ത ഡാന്സ് പെര്ഫോമന്സുകള് പരിപാടിയുടെ ഊര്ജ്ജം ഇരട്ടിയാക്കി. റീനയും സംഘവും അവതരിപ്പിച്ച ഗ്രൂപ്പ് ഡാന്സ് പരിപാടിക്ക് ചടുലമായ തുടക്കം നല്കി. തുടര്ന്ന് വേദിയിലെത്തിയ മഞ്ജു അജിത്തിന്റെ നൃത്തം ഏറെ ശ്രദ്ധേയമായി. ആസ്തയുടെ സോളോ പെര്ഫോമന്സും, അക്ഷൈനിയും അഞ്ജലിയും ചേര്ന്ന് അവതരിപ്പിച്ച ഗ്രൂപ്പ് ഡാന്സും വൈവിധ്യമാര്ന്ന കൊറിയോഗ്രാഫി കൊണ്ട് കാണികളെ ആവേശത്തിലാഴ്ത്തി. ഓരോ നര്ത്തകരും തങ്ങളുടെ മനോഹരമായ ചുവടുകളിലൂടെ വേദിയില് വശ്യമായ ഒരു ദൃശ്യവിരുന്നാണ് ഒരുക്കിയത്.
സംഗീതസാന്ദ്രമായ സായാഹ്നത്തെ ഓരോ ഗായകരും തങ്ങളുടെ വേറിട്ട ശബ്ദം കൊണ്ട് ധന്യമാക്കി. ജയമോള് സജി ആലപിച്ച ‘ഇസ്രായേലിന് നാഥനായി’ എന്ന ഗാനം സദസ്സില് ഭക്തിനിര്ഭരമായ അന്തരീക്ഷം സൃഷ്ടിച്ചു. ഇര്ഷാദ്, സുബൈര് പാണ്ഡവത്ത് വിനേഷ് ഷെറിന് പൊയ്ലി എന്നിവരുടെ ആലാപനം സംഗീതപ്രേമികളുടെ പ്രശംസ പിടിച്ചുപറ്റിയപ്പോള്, നൗഷാദും ടീമും ചേര്ന്ന് അവതരിപ്പിച്ച ഫാസ്റ്റ് നമ്പറുകള് ആഘോഷത്തിന് പുതിയ വേഗത നല്കി. നൗഷാദും മെഹ്സാനയും ചേര്ന്നുള്ള ഡ്യുയറ്റും, നൗഷാദിന്റെ സോളോ പ്രകടനങ്ങളും അസൈന് അവതരിപ്പിച്ച ചടുല ഗാനങ്ങളും വേദിയ്ക്ക് പൂര്ണ്ണത നല്കി. പരിപാടിയുടെ അവസാനം നടന്ന മഷപ്പ് ഫാസ്റ്റ് നമ്പറുകള് എല്ലാവരെയും ഒരുപോലെ ആനന്ദിപ്പിച്ചുകൊണ്ടാണ് സമാപിച്ചത്.
ലോക കേരള സഭ അംഗം അബ്ദുല് റഊഫ് കൊണ്ടോട്ടി, ഇന്റര്നാഷണല് മലയാളി എഡിറ്റര് ഡോ.അമാനുല്ല വടക്കാങ്ങര എന്നിവര് അതിഥികളായിരുന്നു.
രോഷ്നി കൃഷ്ണന്, ഷെഫിന് ഷംസുദ്ദീന്. ആബിദ് കൂടത്തായി, റിനിഷ റിനീഷ്, ജിഷ സാഗര്, അജിത ശ്രീവത്സന്, ഐഷ സൈബുള്, പ്രസാദ് ദിവാകരന് വിനേഷ് ഹെഗ്ഡെ, സുബൈര് പി.ടി. സുബൈര് പാണ്ഡവത്ത് , മഹേഷ് മോഹനന്, രഞ്ജിത്ത് ചെമ്മാട് എന്നിവര് ചടങ്ങിന് നേതൃത്വം നല്കി
