ഫിഫ ലോകകപ്പ് ട്രോഫി നേരില് കാണാന് ഇന്നുകൂടി അവസരം
അമാനുല്ല വടക്കാങ്ങര
ദോഹ. ഖത്തറിലുള്ള ഫുട്ബോള് ആരാധകര്ക്ക് ഫിഫ ലോകകപ്പ് ട്രോഫി നേരില് കാണാന് ഇന്നുകൂടി അവസരം. ആസ്പയര് പാര്ക്കില് ഇന്ന് വൈകുന്നേരം 4 മണി മുതല് രാത്രി 10 വരെയാണ് ട്രോഫി നേരില് കാണാനും ഫോട്ടോകളെടുക്കാനും അവസരമുള്ളത്.
ഖത്തറിന്റെ മണ്ണില് നടക്കുന്ന ലോകകപ്പിന്റെ ആവേശകരമായ എഡിഷനില് കപ്പില് ആര് മുത്തമിടുമെന്നറിയാന് ഡിസംബര് 18 വരെ കാത്തിരിക്കേണ്ടിവരുമെങ്കിലും ലോകകപ്പ് ട്രോഫി നേരില് കാണാനും ഫോട്ടോകളെടുക്കാനുമുള്ള അവസരം ഇന്നത്തോടെ അവസാനിക്കും.
ഫിഫ നിയമങ്ങള് അനുസരിച്ച്, മുന് ചാമ്പ്യന്മാര്ക്കും രാഷ്ട്രത്തലവന്മാര്ക്കും മാത്രമേ കപ്പില് തൊടാന് അവകാശമുള്ളൂ. അത് വിജയിക്കുന്ന ടീം താല്ക്കാലികമായി സൂക്ഷിക്കുന്നു. പിന്നീട്, വിജയികള്ക്ക് ടൂര്ണമെന്റിന്റെ പതാക, ആതിഥേയ രാജ്യങ്ങള്, വിജയികളായ ടീമുകള് എന്നിവയുടെ ലിഖിതങ്ങള് ഉള്ക്കൊള്ളുന്ന ഒരു പ്രത്യേക സ്വര്ണ്ണം പൂശിയ പകര്പ്പ് ലഭിക്കും. അതേസമയം, നിയമങ്ങളും ചട്ടങ്ങളും അനുസരിച്ച്, സ്വര്ണ്ണം കൊണ്ട് നിര്മ്മിച്ച യഥാര്ത്ഥ ട്രോഫി ഫിഫയ്ക്ക് തിരികെ നല്കുന്നു.
വിജയിക്കുന്ന ടീമിന് ട്രോഫി നല്കുന്നുണ്ടെങ്കിലും അത് ഫിഫയുടെ സ്വത്താണ്. 6.142 കിലോഗ്രാം ഭാരമുള്ള തങ്കം കൊണ്ടാണ് ട്രോഫി നിര്മ്മിച്ചിരിക്കുന്നത്. അതിന്റെ ഉപരിതലത്തില് ഭൂഗോളത്തെ ഉയരത്തില് വഹിക്കുന്ന രണ്ടുപേരെ കൊത്തിവച്ചിരിക്കുന്നു, അതിന്റെ ഇപ്പോഴത്തെ ഡിസൈന് 1974 മുതലുള്ളതാണ്.
