അറബി തൊപ്പിയില്‍ വര്‍ണ്ണങ്ങള്‍ വിരിഞ്ഞപ്പോള്‍
ഡോ. അമാനുല്ല വടക്കാങ്ങര
ദോഹ. അറബ് സാംസ്‌കാരിക പാരമ്പര്യങ്ങളും പൈതൃകങ്ങളും കോര്‍ത്തിണക്കിയ അറബി തൊപ്പിയുടെ രൂപത്തിലുള്ള 2022 ഫിഫ ഖത്തര്‍ ലോക കപ്പ് വേദിയായ അല്‍തുമാമ സ്റ്റേഡിയം വര്‍ണങ്ങള്‍ വാരി വിതറിയ ആഘോഷരാവില്‍ കായികലോകത്തിനായി സമര്‍പ്പിചപ്പോള്‍ കാല്‍പന്തുകളിയാരാധകരും സംഘാടകരും ആത്മസായൂജ്യത്തിന്റെ നിര്‍വൃതിയില്‍ പുളകം കൊണ്ടു. അറബ് സാംസ്‌കാരിക പൈതൃകങ്ങള്‍ അടയാളപ്പെടുത്തുന്ന പരിപാടികളും മാനത്ത് വര്‍ണവിസ്മയങ്ങള്‍ വാരി വിതറിയ വെടിക്കെട്ടും തുമാമ സ്റ്റേഡിയം ഉദ്ഘാടനം വര്‍ണാഭമാക്കി.
ഖത്തര്‍ അമീര്‍ ശൈഖ് തമീം ബിന്‍ ഹമദ് അല്‍ ഥാനി, ഫിഫ പ്രസിഡണ്ട് ഗിയാനി ഇന്‍ഫാന്റിനോ , കായികതാരങ്ങള്‍, മന്ത്രിമാര്‍ തുടങ്ങി പ്രമുഖരുടെ സാന്നിധ്യം ഉദ്ഘാടന ചടങ്ങ് പ്രൗഡമാക്കി. ഖത്തറിലെ ഏറ്റവും പ്രധാനപ്പെട്ട ഫുട്‌ബോള്‍ മല്‍സരമായ അമീരി കപ്പ് ഫൈനല്‍ മല്‍സരത്തോടനുബന്ധിച്ചാണ് തുമാമ സ്റ്റേഡിയം കായികലോകത്തിനായി സമര്‍പ്പിച്ചത്.
കോവിഡ് മഹാമാരി തീര്‍ത്ത എല്ലാ വേലിക്കെട്ടുകളേയും അതിജീവിച്ച് പ്രതീക്ഷയുടേയും പ്രത്യാശയുടേയും വികാരങ്ങളോടെ സ്‌റ്റേഡിയത്തിലേക്കൊഴുകിയെത്തിയ ആയിരങ്ങള്‍ ഖത്തറിന്റെ കായിക സ്വപ്‌നങ്ങളെ നെഞ്ചേറ്റിപ്പോള്‍ അടുത്ത വര്‍ഷം ഖത്തര്‍ ആതിഥ്യമരുളാനിരിക്കുന്ന ഫിഫ ലോകകപ്പ് അവിസ്മരണീയമാക്കാന്‍ തങ്ങള്‍ ഒരുങ്ങികഴിഞ്ഞുവെന്ന പ്രഖ്യാപനം കൂടിയായി.
നാല്‍പതിനായിരം പേര്‍ക്ക് കളികാണാന്‍ സൗകര്യമുള്ള സ്റ്റേഡിയം നിറഞ്ഞുകവിഞ്ഞതും സംഘാടകരുടെ ആത്മവിശ്വാസം വര്‍ദ്ധിപ്പിച്ചു. ഇന്നലെ നടന്ന അമീര്‍ കപ്പിന്റെ ഫൈനലിലാണ് അല്‍ തുമാമ സ്റ്റേഡിയത്തില്‍ ആദ്യമായി പന്തുരുണ്ടത് . അറബി തൊപ്പിയുടെ രൂപത്തിലുള്ള ഈ സ്റ്റേഡിയം ലോക കപ്പിനായി ഖത്തര്‍ ഒരുക്കുന്ന ആറാമത് സ്റ്റേഡിയമാണ്.
ഖത്തരീ നിര്‍മാണ വൈദഗ്ധ്യത്തിന്റേയും ഡിസൈനിംഗിന്റേയും പുതിയ അധ്യായമാണ് ഇല്‍ തുമാമ സ്റ്റേഡിയം ഉല്ലേഖനം ചെയ്തത്. പ്രമുഖ ഖത്തരീ ആര്‍ക്കിടെക്ടായ ഇബ്രാഹീം അല്‍ ജൈദയാണ് ഈ സ്റ്റേഡിയം രൂപ കല്‍പന ചെയ്തത്. പരമ്പരാഗത അറബ് തൊപ്പിയുടെ രൂപത്തില്‍ നിര്‍മിച്ച ഈ സ്റ്റേഡിയം അറബ് മേഖലയില്‍ ഏറെ പ്രാധാന്യമുള്ളതാണ്.
2022 ഫിഫ ലോക കപ്പിന്റെ ക്വര്‍ട്ടര്‍ ഫൈനല്‍ മല്‍സരങ്ങള്‍ക്ക് വരെ വേദിയാകുന്ന ഈ സ്റ്റേഡിയം 2021 ഫിഫ അറബ് കപ്പിന്റെ സെമി ഫൈനല്‍ മല്‍സരങ്ങള്‍ക്ക് വരെ വേദിയാകും.
സ്റ്റേഡിയത്തെക്കുറിച്ചുള്ള അഞ്ച് പ്രധാന വസ്തുതകള്‍
മേഖലയോടുള്ള ആദരവ് . അറബികളുടെ പരമ്പരാഗത തൊപ്പിയുടെമാതൃകയിലുള്ള ഈ സ്റ്റേഡിയം മേഖലയോടുള്ള ആദരവ് ഉയര്‍ത്തിപ്പിടിക്കുന്നതാണ് .
ദോഹ സിറ്റി സെന്ററില്‍ നിന്നും ഹമദ് ഇന്റര്‍നാഷണല്‍ എയര്‍പോര്‍ട്ടിന് സമീപം 12 കിലോമീറ്റര്‍ അകലെ സ്ഥിതി ചെയ്യുന്ന അല്‍ തുമാമ ഖത്തറിന്റെ മാത്രമല്ല, അറബ് ലോകത്തെ മുഴുവന്‍ ഭൂതകാലത്തെയും ഭാവിയെയും പ്രതിനിധീകരിക്കുന്നു.
ഖത്തര്‍ ആര്‍ക്കിടെക്റ്റ് ഇബ്രാഹിം എം. ജെയ്ദയാണ് സ്റ്റേഡിയത്തിന്റെ രൂപ കല്‍പന നിര്‍വഹിച്ചത്. മധ്യപൂര്‍വദേശത്തുടനീളമുള്ള പുരുഷന്മാരും ആണ്‍കുട്ടികളും ധരിക്കുന്ന ഒരു പരമ്പരാഗത നെയ്ത തൊപ്പിയായ ‘ഗഹ്ഫിയ’യെ പ്രതിനിധാനം ചെയ്യുന്ന രൂപകല്‍പന മേഖലയുടെ അഭിമാനമാണ് . ഈ പ്രദേശത്തെ പരമ്പരാഗത വസ്ത്രങ്ങളുടെ അടിസ്ഥാന പാളിയായ ഗഹ്ഫിയ. മാന്യതയുടെയും സ്വാതന്ത്ര്യത്തിന്റെയും കൂടി പതീകമാണ് . 2018 ല്‍ തന്നെ ദി ആര്‍ക്കിടെക്ചറല്‍ റിവ്യൂ ഫ്യൂച്ചര്‍ പ്രോജക്റ്റ് അവാര്‍ഡ് നേടിയ സ്റ്റേഡിയം രൂപകല്‍പ്പന പ്രശംസ നേടിയിട്ടുണ്ട്
ഫിഫ ഖത്തര്‍ 2022 ലെ ക്വാര്‍ട്ടര്‍ ഫൈനല്‍ വേദി
ഫിഫ ഖത്തര്‍ 2022-ല്‍, സ്റ്റേഡിയത്തില്‍ ക്വാര്‍ട്ടര്‍ ഫൈനല്‍ സ്റ്റേജ് വരെയുള്ള എട്ട് മത്സരങ്ങള്‍ നടക്കും. ഫിഫ അറബ് കപ്പ് ഖത്തര്‍ 2021 ന്റെ ഒരു പ്രമുഖ ആതിഥേയന്‍ കൂടിയായിരിക്കും വേദി. അല്‍ തുമാമയില്‍ സെമി ഫൈനല്‍ സ്റ്റേജ് വരെയുള്ള ആറ് മത്സരങ്ങള്‍ നടക്കും. ഖത്തര്‍ 2022 -ന് ശേഷം, സ്റ്റേഡിയത്തിന്റെ ശേഷി 20,000 ആയി കുറയ്ക്കുകയും ഫുട്‌ബോളിനും മറ്റ് കായിക മത്സരങ്ങള്‍ക്കും ഉപയോഗിക്കുകയും ചെയ്യും, പൊളിച്ചുമാറ്റിയ കായിക അടിസ്ഥാന സൗകര്യങ്ങള്‍ വികസ്വര രാജ്യങ്ങള്‍ക്ക് സംഭാവന ചെയ്യും.
കമ്മ്യൂണിറ്റി ഹബ്
ലെഗസി മോഡില്‍, അല്‍ തുമാമ പ്രാദേശിക സമൂഹത്തിന്റെ ആവശ്യങ്ങള്‍ നിറവേറ്റും, ആസ്‌പെറ്റാര്‍ സ്‌പോര്‍ട്‌സ് ക്ലിനിക്കിന്റെ ഒരു ശാഖ സൈറ്റില്‍ തുറക്കും, സ്റ്റേഡിയത്തിന്റെ മുകളിലെ സ്റ്റാന്‍ഡുകള്‍ക്ക് പകരം ഒരു ബോട്ടിക് ഹോട്ടലും തുറക്കും. ബാസ്‌ക്കറ്റ്‌ബോള്‍, ഹാന്‍ഡ്ബോള്‍, നീന്തല്‍, വോളിബോള്‍ എന്നിവയുള്‍പ്പെടെ ഒന്നിലധികം കായിക വിനോദങ്ങള്‍ക്കുള്ള സൗകര്യമൊരുക്കുന്ന സ്റ്റേഡിയം ഓടുന്നതിനും സൈക്കിള്‍ ചവിട്ടുന്നതിനുമുള്ള ട്രാക്കുകളും ഉള്‍കൊള്ളും. ഈ പ്രദേശം വ്യായാമത്തിന്റെയും പ്രവര്‍ത്തനത്തിന്റെയും തിരക്കേറിയ കേന്ദ്രമായി മാറുന്നതിന് ചില്ലറ, വാണിജ്യ യൂണിറ്റുകളും സൃഷ്ടിക്കും.
പച്ചയും സുസ്ഥിരവും
എല്ലാ ഖത്തര്‍ 2022 സ്റ്റേഡിയങ്ങളെയും പോലെ, അല്‍ തുമാമയും രൂപകല്‍പ്പനയ്ക്കും നിര്‍മ്മാണത്തിനും കുറഞ്ഞത് നാല് നക്ഷത്രങ്ങളുടെ ആഗോള സുസ്ഥിരതാ വിലയിരുത്തല്‍ സിസ്റ്റം സര്‍ട്ടിഫിക്കേഷന്‍ റേറ്റിംഗ് ലക്ഷ്യമിടുന്നു. പ്ലാനിന്റെ ഭാഗമായി നിലവിലുള്ള ഓണ്‍-സൈറ്റ് എനര്‍ജി സെന്റര്‍ പുതുക്കിപ്പണിയുകയും ഏറ്റവും പുതിയ ഊര്‍ജ്ജ കാര്യക്ഷമത മാനദണ്ഡങ്ങള്‍ പാലിക്കുന്നതിനായി നവീകരിക്കുകയും ചെയ്യുന്നു. ഒരു പരമ്പരാഗത സ്റ്റേഡിയവുമായി താരതമ്യപ്പെടുത്തുമ്പോള്‍ 40% കൂടുതല്‍ ശുദ്ധജലം സംരക്ഷിക്കപ്പെടുന്നുവെന്ന് പച്ച നിറത്തിലുള്ള ഡിസൈന്‍ ഉറപ്പുനല്‍കുന്നു. റീ സൈക്കിള്‍ ചെയ്ത ജലമുപയോഗിച്ചാണ് ഹരിത മേഖലയെ നനക്കുക. പ്രാന്തപ്രദേശത്ത് 50000 ചതുരശ്ര മീറ്റര്‍ വിസ്തീര്‍ണ്ണം ഉണ്ടാകും, നാടന്‍ സസ്യങ്ങളും ഏകദേശം 400 മരങ്ങളും 84% ഭൂപ്രകൃതിയെ അനാവരണം ചെയ്യും
ആക്‌സസ് ചെയ്യാവുന്ന വേദി
ദോഹ മെട്രോയും ഷട്ടില്‍ ബസ്സുകളും ഉപയോഗിച്ച് ആരാധകര്‍ക്ക് അല്‍ തുമാമയില്‍ എത്തിച്ചേരാനാകും, റെഡ് ലൈനിലെ ഏറ്റവും അടുത്തുള്ള മെട്രോ സ്റ്റേഷനാണ് ഫ്രീ സോണ്‍. മെട്രോയിലെ ഒരു യാത്രക്ക് രണ്ട് റിയാല്‍ മതിയാകും. ഒരു ദിവസ പാസിന് 6 റിയാലാണ് ചാര്‍ജ്. എല്ലാ യാത്രക്കാരും 10 റിയാല്‍ നല്‍കി പുനരുപയോഗിക്കാവുന്ന യാത്രാ കാര്‍ഡ് വാങ്ങണം.
40000 പേര്‍ക്ക് കളി കാണാന്‍ സൗകര്യമുള്ള തുമാമ സ്റ്റേഡിയം 2022 ഫിഫ ലോക കപ്പിനായി ഖത്തറില്‍ പൂര്‍ത്തിയാകുന്ന ആറാമത് സ്റ്റേഡിയമാണ്. ഖലീഫ സ്റ്റേഡിയം, അല്‍ ജുനൂബ് സ്റ്റേഡിയം, എഡ്യൂക്കേഷന്‍ സിറ്റി സ്റ്റേഡിയം, അഹ് മദ് ബിന്‍ അലി സ്റ്റേഡിയം, അല്‍ ബയാത്ത് സ്റ്റേഡിയം എന്നിവയാണ് ഇതിനകം പണിപൂര്‍ത്തിയായ മറ്റു സ്റ്റേഡിയങ്ങള്‍.
