അമാനുല്ല വടക്കാങ്ങര

ദോഹ. ഖത്തറിന്റെ വിവിധ ഭാഗങ്ങളിലായി 179 നഴ്‌സറി സ്‌കൂളുകള്‍ പ്രവര്‍ത്തിക്കുന്നതായും രാജ്യത്തെ എല്ലാ പ്രദേശങ്ങളിലും നഴ്‌സറി സ്‌കൂളുകള്‍ ലഭ്യമാക്കുകയെന്ന ലക്ഷ്യം വിജയകരമായി നടപ്പാക്കാന്‍ സാധിച്ചതായും വിദ്യാഭ്യാസ, ഉന്നത വിദ്യാഭ്യാസ മന്ത്രാലയം. കുട്ടികളുടെ സുരക്ഷയും ബൗദ്ധികവും മാനസികവുമായ വളര്‍ച്ചയും ഉറപ്പുവരുത്തുന്ന പരിസരമാണ് നഴ്‌സറി സ്‌കൂളുകള്‍ നല്‍കുന്നത്.
പ്രവര്‍ത്തനങ്ങള്‍ കൂടുതല്‍ സുതാര്യവും ജനകീയവുമാക്കുന്നതിനായി വിദ്യാഭ്യാസ, ഉന്നത വിദ്യാഭ്യാസ മന്ത്രാലയത്തിലെ സ്വകാര്യ വിദ്യാഭ്യാസ കാര്യ വിഭാഗം മന്ത്രാലയത്തിന്റെ വെബ്സൈറ്റില്‍ നഴ്സറി പേജ് ആരംഭിച്ചിട്ടുണ്ട്. www.edu.gov.qa/en/Pages/nursdefault എന്ന ലിങ്ക് വഴി രക്ഷിതാക്കളുമായും പൊതുജനങ്ങളുമായും ആശയവിനിമയത്തിനുള്ള ഒരു ചാനല്‍ തുറക്കുന്ന പ്രധാനപ്പെട്ട നിരവധി പ്രധാന വിഭാഗങ്ങള്‍ പേജില്‍ ഉള്‍പ്പെടുന്നു.

എല്ലാവര്‍ക്കും ഇപ്പോള്‍ നഴ്‌സറി സ്‌കൂളുകളുമായി ബന്ധപ്പെട്ട വിവരങ്ങള്‍ക്കും ആവശ്യമായ സേവനങ്ങളിലേക്കുള്ള പ്രവേശനത്തിനും പേജ് ആക്‌സസ് ചെയ്യാന്‍ കഴിയും. ‘നഴ്‌സറികളെക്കുറിച്ച്’, ‘ലൈസന്‍സിംഗ് നഴ്‌സറികള്‍’, ‘നഴ്‌സറികളുടെ മേല്‍നോട്ടവും നിയന്ത്രണവും’, ‘നഴ്‌സറികളുടെ പട്ടിക’, ‘ജാഗ്രതയുള്ള മുന്‍കൈ’, ‘ഞങ്ങളെ ബന്ധപ്പെടുക’ എന്നീ വിഭാഗങ്ങള്‍ പേജിലെ ഏറ്റവും ശ്രദ്ധേയമായ വിഭാഗങ്ങളില്‍ ചിലതാണ്.