ഖത്തര് കെഎംസിസി കാസറഗോഡ് ജില്ലാ കമ്മിറ്റി ഈദ് മുലാഖാത്ത് സംഘടിപ്പിക്കുന്നു
ദോഹ: ഖത്തര് കെഎംസിസി കാസറഗോഡ് ജില്ലാ കമ്മിറ്റിയുടെ നേതൃത്വത്തില് ഈദുല് ഫിത്വര് (ചെറിയ പെരുന്നാള്) ദിനത്തില് ഈദ് മുലാഖാത്ത് സംഘടിപ്പിക്കുമെന്ന് ഭാരവാഹികള് അറിയിച്ചു. പ്രവാസി സമൂഹത്തിന് ഈദിന്റെ സന്തോഷം പരസ്പരം പങ്കുവയ്ക്കാനും സൗഹൃദം പുതുക്കാനും അവസരമൊരുക്കുന്നതിനായി പ്രത്യേക സംഗമം സംഘടിപ്പിക്കും.
കാസറഗോഡ് ജില്ലയില് നിന്നുള്ള പ്രവര്ത്തകരെ ഉള്പ്പെടുത്തി ഒരുക്കുന്ന ഈ വേദി ഐക്യദാര്ഢ്യത്തിന്റെയും സൗഹൃദത്തിന്റെയും ഉദാഹരണമായിരിക്കും. പ്രാദേശികതയുടെ അതിരുകള് മറികടന്ന്, പ്രവാസികളില് ഉള്ള ഭിന്നതകളെ അകറ്റി, കൂടിയുള്ള ഒരുമയുടെയും സ്നേഹത്തിന്റെയും ആഘോഷമായി ഈദ് മുലാഖാത്ത് മാറുമെന്ന് സംഘാടകര് പറഞ്ഞു.
ജില്ലാ കമ്മിറ്റി ഭാരവാഹികള് നല്കിയ വിശദീകരണപ്രകാരം, ഈ സംഗമത്തില് എല്ലാ അംഗങ്ങളും പ്രവര്ത്തകരും സജീവമായി പങ്കെടുക്കും. പരിപാടിയുടെ വിജയത്തിനായി എല്ലാ ഒരുക്കങ്ങളും പൂര്ത്തിയായതായി ഖത്തര് കെഎംസിസി കാസറഗോഡ് ജില്ലാ പ്രസിഡന്റ് ലുക്മാന് തളങ്കര, സെക്രട്ടറി സമീര്, ട്രഷറര് സിദ്ദിഖ് മാണിയംപറ, എന്നിവര് അറിയിച്ചു.
