ഫിഫ ലോക കപ്പ് സമയത്ത് ഖത്തറില്‍ പ്രതിദിനം 1600 ലധികം വിമാനങ്ങള്‍ ലാന്‍ഡിംഗും ടേക്ക് ഓഫും നടത്തും
അമാനുല്ല വടക്കാങ്ങര
ദോഹ.ഫിഫ ലോക കപ്പ് സമയത്ത് ഖത്തറില്‍ പ്രതിദിനം 1600 ലധികം വിമാനങ്ങള്‍ ലാന്‍ഡിംഗും ടേക്ക് ഓഫും നടത്തുമെന്ന് ഖത്തര്‍ സിവില്‍ ഏവിയേഷന്‍ അതോറിറ്റിയുടെ എയര്‍ നാവിഗേഷന്‍ ഡിപ്പാര്‍ട്ട്മെന്റ് ഡയറക്ടര്‍ അഹമ്മദ് അല്‍ ഇഷാഖ് പറഞ്ഞു.
നിലവില്‍ പ്രതിദിനം 750-800 വിമാനങ്ങളാണ് ഖത്തറില്‍ ലാന്‍ഡിംഗും ടേക്ക് ഓഫും നടത്തുന്നത്. ഇതിന്റെ ഇരട്ടിയോളം എയര്‍ ട്രാഫിക്കാണ് ലോക കപ്പ് സമയത്ത് പ്രതീക്ഷിക്കുന്നതെന്ന് പ്രാദേശിക അറബി ദിനപത്രമായ അല്‍ ശര്‍ഖിന് അനുവദിച്ച പ്രത്യേക അഭിമുഖത്തില്‍ അദ്ദേഹം പറഞ്ഞു. ഇത് ഖത്തറിനെ മിഡില്‍ ഈസ്റ്റിലെ ഏറ്റവും തിരക്കേറിയ രണ്ടാമത്തെ രാജ്യമാക്കി മാറ്റുന്നു, അദ്ദേഹം കൂട്ടിച്ചേര്‍ത്തു.
എയര്‍ ട്രാഫിക് കണ്‍ട്രോള്‍ മേഖലയിലെ എല്ലാ ജീവനക്കാര്‍ക്കും ഖത്തര്‍ വ്യോമാതിര്‍ത്തി കാര്യക്ഷമമായും പ്രൊഫഷണല്‍ രീതിയിലും കൈകാര്യം ചെയ്യുന്നതിനായി ഉയര്‍ന്ന പ്രൊഫഷണല്‍, സാങ്കേതിക മാനദണ്ഡങ്ങള്‍ക്കനുസൃതമായി തീവ്രപരിശീലനം നല്‍കിയിട്ടുണ്ടെന്ന് അദ്ദേഹം ഊന്നിപ്പറഞ്ഞു. എയര്‍ നാവിഗേഷന്‍ മേഖലയിലെ ഏറ്റവും പുതിയ സാങ്കേതികവിദ്യയാണ് ഖത്തറിലുള്ളത്.
2022-ലെ ഫിഫ ലോകകപ്പ് ഖത്തറിനുള്ള തയ്യാറെടുപ്പുകളുടെ പശ്ചാത്തലത്തില്‍, ഹമദ് അന്താരാഷ്ട്ര വിമാനത്താവളത്തിന്റെ മാനേജ്മെന്റ് നിശ്ചയിച്ചിട്ടുള്ള പ്രോഗ്രാമിനും പ്ലാനിനും അനുസൃതമായി വിമാനത്താവളത്തിലെ ശേഷി മെച്ചപ്പെടുത്തുന്നതിനായി എയര്‍ക്രാഫ്റ്റ് പാര്‍ക്കിംഗ് ലോട്ടുകളുടെ എണ്ണം വര്‍ദ്ധിപ്പിച്ചതായി അല്‍ ഇഷാഖ് പറഞ്ഞു. കൂടാതെ മിഡില്‍ ഈസ്റ്റിലെ ഏറ്റവും പുതിയ ഉപകരണമായ ‘വെര്‍ച്വല്‍ ടവര്‍’ സ്ഥാപിക്കുന്നുണ്ട്. ഈ ഉപകരണം എവിടെ വേണമെങ്കിലും ഇന്‍സ്റ്റാള്‍ ചെയ്യാമെന്നും അതിലൂടെ സ്‌ക്രീനിലൂടെയും ഉപകരണത്തിലൂടെയും വിമാനത്തെ നയിക്കാമെന്നും അദ്ദേഹം കൂട്ടിച്ചേര്‍ത്തു. മിഡില്‍ ഈസ്റ്റില്‍ ഈ സൗകര്യം ഖത്തറില്‍ മാത്രമാണുള്ളത്.
ദോഹ വിമാനത്താവളത്തിലും ഹമദ് അന്താരാഷ്ട്ര വിമാനത്താവളത്തിലും നിരവധി ആധുനിക റഡാറുകള്‍ സ്ഥാപിച്ചിട്ടുണ്ടെന്നും അദ്ദേഹം പറഞ്ഞു. ഹമദ് വിമാനത്താവളത്തില്‍ രണ്ട് അധിക റഡാറുകള്‍ സ്ഥാപിക്കുന്നത് ഉടന്‍ പൂര്‍ത്തീകരിക്കും.
