ഖത്തറിലെ ഇന്ത്യന്‍ സ്‌പോര്‍ട്‌സ് സെന്ററിന്റെ പ്രസിഡന്റും 2021 ലെ പ്രവാസി ഭാരതീയ സമ്മാന്‍ അവാര്‍ഡ് ജേതാവുമായ ഡോ. മോഹന്‍ തോമസിനെ ബെസ്റ്റ്‌കോ അലുമിനിയം ആന്റ് സ്റ്റീല്‍ സ്വീകരണമൊരുക്കി. ഖത്തറിലെ പ്രവാസികളുടെ ക്ഷേമത്തിനും ഉന്നമനത്തിനുമായി അക്ഷീണം പ്രവര്‍ത്തിക്കുന്ന ഡോ. മോഹന്‍ തോമസിന്റെ കോവിഡ് കാലത്തെ നിരന്തരമായ പ്രവര്‍ത്തനങ്ങളെ യോഗം പ്രശംസിക്കുകയും ഇന്‍ഡ്യന്‍ സ്‌പോര്‍ട്ട്‌സ് സെന്ററിന്റെ തുടര്‍പ്രവര്‍ത്തനങ്ങള്‍ക്ക് QKCA യില്‍ നിന്നുള്ള സ്‌പോര്‍ട്ട്‌സ് സെന്റര്‍ അംഗങ്ങള്‍ ആശംസകള്‍ നേരുകയും അഭിപ്രായങ്ങള്‍ പങ്കുവയ്ക്കുകയും ചെയ്തു. ബെസ്റ്റ്‌കോ മാനേജിംഗ് ഡയറക്ടര്‍ ബൈജു പി. മൈക്കിളിന്റെ അദ്ധ്യക്ഷതയില്‍ ചേര്‍ന്ന യോഗത്തില്‍ മുന്‍ കെ പി സി സി ജനറല്‍ സെക്രട്ടറിയും മുന്‍ നോര്‍ക്ക ഡയറക്ടറും ഉപകാര്‍ രക്ഷാധികാരിയുമായ ജോപ്പച്ചന്‍ തെക്കേക്കുറ്റ്, QKCA പ്രസിഡന്റ് ഹാര്‍ലി തോമസ്, ഉപകാര്‍ ജനറല്‍ സെക്രട്ടറിയും എഴുത്തുകാരനുമായ ജിജോയ് ജോര്‍ജ്ജ് എന്നിവര്‍ ആശംസകള്‍ അര്‍പ്പിച്ചു. മറുപടി പ്രസംഗത്തില്‍ ഡോ. മോഹന്‍ തോമസ് ഇന്‍ഡ്യന്‍ സ്‌പോര്‍ട്ട്‌സ് സെന്ററിന്റെ ഭാവി പ്രവര്‍ത്തനങ്ങളേപ്പറ്റിയും പുരോഗതിയേപ്പറ്റിയുമുള്ള പ്രതീക്ഷകള്‍ പങ്കുവയ്ക്കുകയും എല്ലാവരുടെയും സഹകരണം ആഹ്വാനം ചെയ്യുകയും ചെയ്തു.