അമാനുല്ല വടക്കാങ്ങര

ദോഹ. മൂന്നാമത് കത്താറ ഇന്റര്‍നാഷണല്‍ അറേബ്യന്‍ ഹോഴ്‌സ് ഫെസ്റ്റിവല്‍ നാളെ ആരംഭിക്കും. 18 രാജ്യങ്ങളുടെ പങ്കാളിത്തത്തോടെയുള്ള പരിപാടിയുടെ എല്ലാ ഒരുക്കങ്ങളും പൂര്‍ത്തിയായതായി അധികൃതര്‍ അറിയിച്ചു. ഫെസ്റ്റിവല്‍ ഫെബ്രുവരി 11 വരെ തുടരും.

അറേബ്യന്‍ പെനിന്‍സുല കുതിര ചാമ്പ്യന്‍ഷിപ്പ് ഫെബ്രുവരി 1-4 വരെയും ലേലം ഫെബ്രുവരി 6 വരെയും ടൈറ്റില്‍ ഷോ ഫെബ്രുവരി 8 മുതല്‍ 11 വരെയും നടക്കുമെന്ന് കത്താര തിങ്കളാഴ്ച പ്രസ്താവനയില്‍ പറഞ്ഞു.

പ്രദര്‍ശനങ്ങള്‍, കലാ ശില്‍പശാലകള്‍, മത്സരങ്ങള്‍, തത്സമയ കലാപരിപാടികള്‍ എന്നിവയുള്‍പ്പെടെ 30-ലധികം പരിപാടികളുള്ള നിരവധി സാംസ്‌കാരിക പരിപാടികള്‍ ഫെസ്റ്റിവലിന്റെ സവിശേഷതയാണ്. കത്താറ കോര്‍ണിഷിലാണ് ഈ പ്രവര്‍ത്തനങ്ങള്‍ നടക്കുക.

ഖത്തര്‍ ഇക്വസ്ട്രിയന്‍ ഫെഡറേഷന്‍ (ക്യുഇഎഫ്), ഖത്തര്‍ റേസിംഗ് ആന്‍ഡ് ഇക്വസ്ട്രിയന്‍ ക്ലബ് (ക്യുആര്‍ഇസി) എന്നിവയുടെ സഹകരണത്തോടെ കത്താറ – കള്‍ച്ചറല്‍ വില്ലേജ് ഫൗണ്ടേഷനാണ് ഫെസ്റ്റിവല്‍ സംഘടിപ്പിച്ചിരിക്കുന്നത്.