ഖത്തറില്‍ ഗള്‍ഫ് ടി 20 ചാമ്പ്യന്‍ഷിപ്പ് നടത്താനൊരുങ്ങി ഖത്തര്‍ ക്രിക്കറ്റ് അസോസിയേഷന്‍
അമാനുല്ല വടക്കാങ്ങര
ദോഹ: ഖത്തറില്‍ ഗള്‍ഫ് ടി 20 ചാമ്പ്യന്‍ഷിപ്പ് നടത്താനൊരുങ്ങി ഖത്തര്‍ ക്രിക്കറ്റ് അസോസിയേഷന്‍. 2023 മാര്‍ച്ചില്‍ ലെജന്‍ഡ്സ് ലീഗ് മാസ്റ്റേഴ്സിനായി ലോകമെമ്പാടുമുള്ള 60 ഇതിഹാസങ്ങള്‍ക്ക് ആതിഥേയത്വം വഹിച്ച ശേഷം, സെപ്റ്റംബര്‍ 13 മുതല്‍ 23 വരെ ഗള്‍ഫ് ടി20 ചാമ്പ്യന്‍ഷിപ്പിന്റെ ഉദ്ഘാടന പതിപ്പിന് ആതിഥേയത്വം വഹിക്കാന്‍ എല്ലാ ഗള്‍ഫ് രാജ്യങ്ങളെയും ഒരുമിച്ച് കൊണ്ടുവരാനാണ് പരിപാടി.
ഖത്തര്‍ ക്രിക്കറ്റ് അസോസിയേഷന്‍ (ക്യുസിഎ) ഈ വര്‍ഷം അവസാനം ഖത്തറില്‍ ഗള്‍ഫ് ടി20 ചാമ്പ്യന്‍ഷിപ്പ് നടത്തുമെന്ന് പ്രഖ്യാപിച്ചു കഴിഞ്ഞു.
മിഡില്‍ ഈസ്റ്റില്‍ ക്രിക്കറ്റ് വളരെയധികം വളരുന്നതിനാല്‍, അസോസിയേറ്റ് ക്രിക്കറ്റിന്റെ വളര്‍ന്നുവരുന്ന ശക്തികേന്ദ്രമായി മാറാനും അന്താരാഷ്ട്ര ക്രിക്കറ്റ് ഇവന്റുകള്‍ ആതിഥേയത്വം വഹിക്കുന്നതില്‍ ഖത്തറിനെ ഏറ്റവും മികച്ച ലക്ഷ്യസ്ഥാനമായി സ്ഥാപിക്കാനും ഖത്തര്‍ ക്രിക്കറ്റ് അസോസിയേഷന്‍ ലക്ഷ്യമിടുന്നു.
ആതിഥേയരായ ഖത്തറിന് പുറമെ യുഎഇ, ഒമാന്‍, കുവൈറ്റ്, ബഹ്റൈന്‍, സൗദി അറേബ്യ എന്നിവിടങ്ങളില്‍ നിന്നുള്ള സീനിയര്‍ പുരുഷ ടീമുകള്‍ പങ്കെടുക്കുന്ന 16 തത്സമയ മത്സരങ്ങളുള്ള ഗള്‍ഫ് ടി20 ചാമ്പ്യന്‍ഷിപ്പ് 10 ദിവസങ്ങളിലായാണ് നടക്കുക.
”ബന്ധങ്ങള്‍ കെട്ടിപ്പടുക്കുന്നതിലും മേഖലയിലെ കായികരംഗം വികസിപ്പിക്കുന്നതിലും ജിസിസി രാജ്യങ്ങളുടെ ശക്തമായ ബന്ധത്തിന്റെയും സഹകരണത്തിന്റെയും തെളിവായിരിക്കും ഈ ടൂര്‍ണമെന്റ്. ഓരോ രാജ്യവും റൊട്ടേഷന്‍ അടിസ്ഥാനത്തില്‍ ആതിഥേയത്വം വഹിക്കുന്ന ചുമതലകള്‍ ഏറ്റെടുക്കുന്നതോടെ ആഗോള ക്രിക്കറ്റ് കലണ്ടറിലെ വാര്‍ഷിക ഫീച്ചറാക്കി മാറ്റാനാണ് പദ്ധതിയെന്ന് ക്യുസിഎ പ്രസിഡന്റ് ഷെയ്ഖ് അബ്ദുല്‍ അസീസ് ബിന്‍ സൗദ് അല്‍താനി പറഞ്ഞു.
ഈ ടൂര്‍ണമെന്റ് നിര്‍ണായകമായ ഒരു വികസനം കൊണ്ടുവരും. കൂടാതെ മിഡില്‍ ഈസ്റ്റിലെ ക്രിക്കറ്റിന് ഒരു പ്രധാന നാഴികക്കല്ലായിരിക്കും. എല്ലാ മത്സരങ്ങളും വെസ്റ്റ് എന്‍ഡ് ഇന്റര്‍നാഷണല്‍ ക്രിക്കറ്റ് സ്റ്റേഡിയത്തില്‍ നടക്കുകയും ഒമ്പത് രാജ്യങ്ങളില്‍ തത്സമയം സംപ്രേക്ഷണം ചെയ്യുകയും ചെയ്യും.
ടൂര്‍ണമെന്റ് ആഗോള പ്രേക്ഷകര്‍ക്ക് വിനോദവും മികച്ച ക്രിക്കറ്റ് കാഴ്ചയും നല്‍കും.
