സൗദി ഹജ്ജ്, ഉംറ മന്ത്രാലയം 2025 – 2026 വര്‍ഷത്തേക്കുള്ള ഉംറ സീസണ്‍ കലണ്ടര്‍ പ്രഖ്യാപിച്ചു
ദോഹ: ഉംറ വിസയുമായി എത്തുന്ന അന്താരാഷ്ട്ര തീര്‍ഥാടകര്‍ക്കും പ്രവാചക പള്ളിയിലെ സന്ദര്‍ശകര്‍ക്കും സേവനം നല്‍കുന്നതിനുള്ള തയ്യാറെടുപ്പുകളുടെ ഭാഗമായി സൗദി ഹജ്ജ്, ഉംറ മന്ത്രാലയം 2025 – 2026 വര്‍ഷത്തേക്കുള്ള ഉംറ സീസണ്‍ കലണ്ടര്‍ പ്രഖ്യാപിച്ചു
വിസ ഇഷ്യു ചെയ്യല്‍, സേവന കരാര്‍ സമയപരിധി, രാജ്യത്തിന് പുറത്തുനിന്നുള്ള തീര്‍ഥാടകരുടെ അന്തിമ പ്രവേശന, എക്‌സിറ്റ് തീയതികള്‍ എന്നിവ ഉള്‍പ്പെടെയുള്ള പ്രധാന തീയതികള്‍ കലണ്ടറില്‍ ഉള്‍പ്പെടുത്തിയിട്ടുണ്ട്.
പ്രഖ്യാപനമനുസരിച്ച്, ഉംറ വിസ കൈവശമുള്ള അന്താരാഷ്ട്ര സന്ദര്‍ശകര്‍ക്ക് 2025 ജൂണ്‍ 11 മുതല്‍ (ദുല്‍-ഹിജ്ജ 15) ഉംറ നിര്‍വഹിക്കാന്‍ അനുവാദമുണ്ടാകും, വിസ വിതരണം ഒരു ദിവസം മുമ്പ്, 2025 ജൂണ്‍ 10 മുതല്‍ ആരംഭിക്കും.
ഉംറ കമ്പനികളും വിദേശ ഏജന്‍സികളും തമ്മിലുള്ള എല്ലാ സേവന കരാറുകളും 2025 മെയ് 27-നകം അന്തിമമാക്കണമെന്നും അതില്‍ കൂട്ടിച്ചേര്‍ത്തു.
ഉംറ വിസകള്‍ നല്‍കുന്നതിനുള്ള അവസാന തീയതി 2026 മാര്‍ച്ച് 20 (1 ശവ്വാല്‍ 1447) ഉള്‍പ്പെടെ സമയപരിധി നിശ്ചയിച്ചിട്ടുണ്ട്. തീര്‍ത്ഥാടകര്‍ക്ക് രാജ്യത്ത് പ്രവേശിക്കാനുള്ള അവസാന തീയതി 2026 ഏപ്രില്‍ 3 (15 ശവ്വാല്‍ 1447) ആണ്, എല്ലാ തീര്‍ത്ഥാടകരും 2026 ഏപ്രില്‍ 18-നകം (1 ദുല്‍-ഖിദ് 1447) രാജ്യം വിടണം.
സുഗമവും സുസംഘടിതവുമായ ഉംറ സീസണ്‍ ഉറപ്പാക്കാനുള്ള മന്ത്രാലയത്തിന്റെ വിശാലമായ ശ്രമത്തിന്റെ ഭാഗമാണ് നേരത്തെ തന്നെ ഉംറ സീസണ്‍ കലണ്ടര്‍ പ്രഖ്യാപിച്ചത്.
