രണ്ട് എ ഐ പവര്‍ഡ് വെര്‍ച്വല്‍ സേവനങ്ങള്‍ ആരംഭിച്ച് വാണിജ്യ വ്യവസായ മന്ത്രാലയം
ദോഹ. ഡിജിറ്റല്‍ പരിവര്‍ത്തനം പ്രോത്സാഹിപ്പിക്കുന്നതിനും പൊതുജനങ്ങള്‍ക്ക് നല്‍കുന്ന സര്‍ക്കാര്‍ സേവനങ്ങളുടെ ഗുണനിലവാരം മെച്ചപ്പെടുത്തുന്നതിനുമുള്ള തുടര്‍ച്ചയായ ശ്രമങ്ങളുടെ ഭാഗമായി വാണിജ്യ വ്യവസായ മന്ത്രാലയം രണ്ട് എ ഐ പവര്‍ഡ് വെര്‍ച്വല്‍ സേവനങ്ങള്‍ ആരംഭിച്ചു.
മൈക്രോസോഫ്റ്റുമായി സഹകരിച്ച് മന്ത്രാലയം സംഘടിപ്പിച്ച ഒരു പത്രസമ്മേളനത്തിലാണ് സ്മാര്‍ട്ട് അസിസ്റ്റന്റ്, സെയ്ഫ് എന്നീ രണ്ട് സേവനങ്ങളുടെ ലോഞ്ച് നടന്നത്.
സിംഗിള്‍ വിന്‍ഡോ പ്ലാറ്റ്ഫോമിലൂടെയാണ് സ്മാര്‍ട്ട് അസിസ്റ്റന്റ് ലഭ്യമാകുന്നത്, അതേസമയം വിവിധ വിഭാഗത്തിലുള്ള ഗുണഭോക്താക്കള്‍ക്ക് സുഗമവും സംയോജിതവുമായ ഉപയോക്തൃ അനുഭവത്തിന് സംഭാവന നല്‍കിക്കൊണ്ട് മന്ത്രാലയത്തിന്റെ ഔദ്യോഗിക വെബ്സൈറ്റില്‍ വെര്‍ച്വല്‍ അസിസ്റ്റന്റായി സെയ്ഫ് ലോഞ്ച് ചെയ്യപ്പെട്ടു.
ഉപയോക്തൃ അന്വേഷണങ്ങള്‍ക്ക് ഉടനടി പ്രതികരണങ്ങള്‍ നല്‍കുന്നതിലൂടെയും സിംഗിള്‍ വിന്‍ഡോ പ്ലാറ്റ്ഫോമിലൂടെ അവരുടെ ഇടപാടുകളുടെ ഓരോ ഘട്ടത്തിലൂടെയും അവരെ നയിച്ചുകൊണ്ട് നടപടിക്രമങ്ങള്‍ സുഗമമാക്കുന്നതിനും ഇടപാടുകള്‍ പൂര്‍ത്തിയാക്കുന്നതിനും സ്മാര്‍ട്ട് അസിസ്റ്റന്റ് സേവനം ലക്ഷ്യമിടുന്നതായി മന്ത്രാലയത്തിന്റെ സിംഗിള്‍ വിന്‍ഡോ വകുപ്പ് ഡയറക്ടര്‍ മുബാറക് അല്‍-ഖുലൈഫി പറഞ്ഞു.
