തിരശീലുകള് പാടിയിറങ്ങിയ സ്മരണാഞ്ജലി സീസണ് 4
ദോഹ. മലയാള ഗാനലോകത്തിന് അനശ്വര സംഭാവനകള് നല്കിയ ഗാനരചയിതാക്കള്ക്ക് ബാഷ്പാഞ്ജലികള് അര്പ്പിച്ചുകൊണ്ട് സംഗീതത്തിന്റെ പാരമ്പര്യവും സംസ്കാരവും ചേര്ത്തുപിടിച്ചുകൊണ്ട് ഒക്ടോബര് 24 ന് വക്രഡിപിഎസ് ഓഡിറ്റോറിയത്തില് ഗ്രാമഫോണ് സംഘടിപ്പിച്ച ”സ്മരണാഞ്ജലി സീസണ് 4” പ്രേക്ഷകഹൃദയങ്ങളെ ആകര്ഷിച്ചു.
തിരശീലയിലെ ഇശലുകള് കോര്ത്തിണക്കി സംഗീതത്തിന്റെ മാധുര്യവും വാക്കുകളുടെ കാവ്യസൗന്ദര്യവും പകര്ന്നുകൊണ്ട് അതിന്റെ പശ്ചാത്തലം വിവരിച്ചും രചയിതാക്കളെ പരിചയപെടുത്തിയും അവര്ക്ക് ബാഷ്പാഞ്ജലിയും അര്പ്പിച്ചുകൊണ്ട് പഴയ മാപ്പിളപ്പാട്ടുകള് തനിമ നഷ്ടപ്പെടാതെ കാഴ്ചവെച്ചുകൊണ്ട് സമാപിച്ച ഈ പരിപാടി ദോഹയിലെ സംഗീതാസ്വാദര്ക്ക് നവ്യാനുഭവമായി .
ഡോക്ടര് റഷീദ് പട്ടത്തിന്റെ സംവിധാനത്തിലും അവതരണത്തിലും ദോഹയിലെ പ്രശസ്തരായ ഗായകര്ക്കൊപ്പം റിഥം ഓര്ക്കസ്ട്രയും അണിനിരന്നപ്പോള് മാപ്പിളപ്പാട്ടിന്റെ പഴയ മധുരസ്വരങ്ങള് തിരശീലയിലെന്നപോലെ പാടിയിറങ്ങി . പഴയ പാട്ടുകളുടെ ഹൃദയമിടിപ്പ് സഷ്ടപെടാതെ പുതിയ കാലത്തെ ഗായകരായ ശിവപ്രിയ , മൈഥിലി , റിയാസ് , മണികണ്ഠദാസ് , ആതിര ,അനീഷ ,അജ്മല് , രാം രവീന്ദ്രന് ,മുഹമ്മദ് ഉസ്മാന് , റഷാദ് ഖുറൈശി, ലാല്കുമാര് ആലപ്പുഴ എന്നിവര് ആ മധുരസ്വരങ്ങളെ അതുല്യമായി പുനര്ജീവിച്ചപ്പോള് ബിനുവിന്റെ നേതൃത്വത്തില് റിഥം ഓര്ക്കസ്ട്ര ആ സ്വരങ്ങള്ക്ക് നിറവും ആത്മാവും നല്കി. സൗണ്ട് എഞ്ചിനീയര് രഞ്ജിത്ത് ആ സ്വരങ്ങള്ക്ക് കരുത്തും നല്കി.
അവതാരക സുബിന വിജയ് വാക്കുകളുടെ മാധുര്യത്തോട് കൂടി ഗ്രാമഫോണ് ഖത്തറിനെയും സ്മരണാഞ്ജലിയെയും അതിനെ നയിക്കുന്ന ഡോക്ടര് റഷീദ് പട്ടത്തിനെയും വേദിക്ക് പരിചയപ്പെടുത്തി . ഗ്രാമഫോണ് ഖത്തര് സംഗീതകലാരംഗത്തെ നിസ്വാര്ത്ഥ സേവനത്തിന് എല്ലാവര്ഷവും നല്കിവരാറുള്ള ഗ്രാമഫോണ് ഖത്തര് ആനുവല് അവാര്ഡ് ഈ വര്ഷം മുതല് ഖത്തറിന്റെ കലാകായിക സാമൂഹികസാംസ്കാരിക രംഗത്ത് പകരംവെക്കാനാകാത്ത അടയാളപ്പെടുത്തലുകള് നല്കി മരണപെട്ടുപോയ ഈസക്കയുടെ സ്മരണാര്ത്ഥം മുഹമ്മദ് ഈസ മെമ്മോറിയല് ആനുവല് അവാര്ഡ് എന്ന നാമകരണത്തോടെയായിരിക്കും നല്കുക എന്ന് സംഘാടകര് അറിയിച്ചു .
ഈസക്കയുടെ സ്മരണാര്ത്ഥം ഏര്പ്പെടുത്തിയ പ്രഥമ പുരസ്കാരം ദോഹയിലെ നാടകസാഹിത്യലോകത്ത് ചരിത്രത്തോടൊപ്പം സഞ്ചരിച്ച എ വി എം ഉണ്ണി എന്ന പ്രതിഭക്കായിരുന്നു . അതോടൊപ്പം ഏഷ്യനെറ്റ് സ്റ്റാര് സിങ്ങര് മത്സരത്തില് അവസാന പന്ത്രണ്ട് മത്സരാര്ത്ഥികളില് ഇടം പിടിച്ച ഗായിക ശിവപ്രിയക്കുള്ള ഉപഹാരവും വേദിയില് സമ്മാനിച്ചു.
സംഗീതം മനുഷ്യഹൃദയങ്ങളെ ബന്ധിപ്പിക്കുമ്പോള് അതിനൊരു ചിറകായി മാറി കലയുടെ വളര്ച്ചയ്ക്കും സംഗീതപാരമ്പര്യത്തിന്റെ സംരക്ഷണത്തിനുമുള്ള പിന്തുണയോടെ സാമൂഹിക ഉത്തരവാദിത്തത്തിന്റെ പ്രതീകമായ മുഴുവന് സഹകാരികളോടും ഗ്രാമഫോണ് ഖത്തറിന്റെ നന്ദിയും കടപ്പാടും സംഘാടകര് അറിയിച്ചു
